Ebbaruha ya Paulo ey’Okubanza Hali Timoseo

4 Baitu ekigambo ekyatereekereziibwe Ruhanga, nikigamba* ngu omu kasumi ak’omumaiso, abamu baliruga omu kwikiriza, habw’okuhuliiriza ebigambo ebirukuhabisa ebyatereekereziibwe* hamu n’enyegesa eza badaimooni, 2 kuraba omu bugobya obw’abantu abarukubaza ebisuba, omuntu wabo ow’omunda ali nk’ow’ayokiibwe ekyoma. 3 Batanga abantu kutaaha obuswere kandi baragira abantu kutalya ebyokulya Ruhanga ebi yahangire, nukwo abo abaine okwikiriza kandi abamanyiire kimu amananu babiryege hanyuma y’okusiima. 4 Habwokuba buli kimu kyona Ruhanga eki yahangire kirungi kandi busaho kintu kyona ekisemeriire kwangibwa kakuba kiriibwa n’okusiima, 5 habwokuba kiba kyeziibwe n’ekigambo kya Ruhanga hamu n’okusaba.

6 Obu oraaha ab’oruganda obuhabuzi bunu, noija kuba oli muheereza murungi owa Kristo Yesu, ow’alisiibwe kurungi ebigambo eby’okwikiriza hamu n’enyegesa enungi ezi wahondiire n’obwegendereza. 7 Yangira kimu enganikyo ez’ebisuba ezitarukugasa, nk’ezi abakaikuru ezi batebya. Ha rubaju orundi, wetendeke kwemarra hali Ruhanga kandi okifoole kigendererwa kyawe. 8 Habwokuba kutendeka omubiri* nikigasa kake, baitu kwemarra hali Ruhanga* nikigasa omu bintu byona, habwokuba kituha okunihira okw’obwomeezi hati n’okunihira okw’obwomeezi oburukugenda okwija. 9 Ebigambo ebi by’okwesiga kandi bisemeriire kwikirizibwa kimu. 10 Enu niyo ensonga habwaki nitukora n’amaani kandi nitwekamba, habwokuba okunihira kwaitu tukutaire omuli Ruhanga omwomeezi, anyakuli Omujuni ow’abantu aba buli mulingo, kukira muno abeesigwa.

11 Ikara noobaha ebiragiro binu kandi obeegeseege. 12 Omuntu weena atalikugaya habwokuba oli musigazi. Baitu obe kyokurorraho hali abeesigwa omu kubaza, omu ngeso, omu kugonza, omu kwikiriza, n’omu burukwera. 13 Gumizaamu kwekamba kusoma omu rwijwire, kuteererra,* n’okwegesa, kuhikya obu ndiija. 14 Otanagiiriza ekisembo ekyakuhairwe kuraba omu bunabbi, akatebe k’abagurusi obu kaakutaireho emikono. 15 Ikara nooyecumiitirizaaho ebintu binu; obiteho muno omutima,* nukwo okukurakurana kwawe kusobole kurolerwa kimu abantu boona. 16 Ikara nooyekamba muno kuba ekyokurorraho ekirungi kandi omwegesa omurungi. Oikale nookora ebintu binu, habwokuba obu oraakora oti, olyejuna kandi ojune n’abo abarukukuhuliiriza.