Ebbaruha ya Paulo Hali Abarooma
11 Kankaguze, Ruhanga akanga abantu be? Nangwa! Na nyowe ndi Munyaisaleeri ow’omu ruzaaro* rwa Ibburahimu, kuruga omu ruganda rwa Benyamiini. 2 Ruhanga atange abantu be aba yamanyire ha kubanza. Timumanyire ekyahandiikirwe eki kirukugamba obukirukuhika hali Eriya, obu akaba naayesengereza Ruhanga naahyemera Isaleeri? 3 “Yahwe,* baisire banabbi baawe, baseesere ebyoto byawe, kandi niinyowe nyenka asigaireho, kandi hati nibagonza kunyita.” 4 Baitu Ruhanga akamugarukamu ki? “Nyesigiireho abasaija 7,000, abatateeriize Bbaali* amaju.” 5 Nahabweki, omulingo nugwo gumu n’omu kasumi kanu, haroho bake abasigaireho abakomerwe kusigikirra ha mbabazi za Ruhanga enyingi muno. 6 Hati obu baraaba bakomwa kusigikirra ha mbabazi za Ruhanga enyingi muno, nibaba batakomerwe kusigikirra ha bikorwa, habwokuba kakuba kiba kiti, embabazi enyingi muno, niziba zitakyali embabazi enyingi muno.
7 Hati, tugambe ki? Ekintu kyonyini Isaleeri eki akaba naaserra atakitunge, baitu abo abaakomerwemu, nubo baakitungire. Abasigaire bakanga kuhuliiriza, 8 nkooku kyahandiikirwe kiti: “Ruhanga akabaha omwoyo ogw’oturo twingi, amaiso agatarukurora n’amatu agatarukuhurra kuhikira kimu kasumi kanu.” 9 Ekindi, Daudi na uwe akagamba ati: “Leka emeeza yabo efooke omutego n’ekiriba n’enkonge hamu n’ekifubiro nambere bali. 10 Leka amaiso gaabo gaswekwe omwirima nukwo batarora, kandi obaleetere kwikara bainamize emigongo yabo.”
11 Kankaguze, bakatabaijuka baagwera kimu? Nangwa! Habwokuba bakasiisa, kikaleetera ab’amahanga kujunwa kandi eki kyabakwasa ihali. 12 Hati, obu kiraaba ngu okusiisa kwabo nikumanyisa obuguuda hali ensi, kandi okukeeha kwabo nikumanyisa obuguuda hali abantu ab’amahanga, omuhendo gwabo gwona obu gulihika, obuguuda bwabo tibulikiraho?
13 Hati ningambira inywe abantu ab’amahanga habwokuba ndi mukwenda hali amahanga, ninyumiza obuheereza bwange, 14 nukwo ndole obu ndaaba ninsobora kuleetera abantu bange kukwatwa ihali kandi njune bamu hali bo. 15 Obu kiraaba ngu okubingwa kwabo nikuleetera ensi okuteeranizibwa na Ruhanga, okugarurwa kwabo, tikulimanyisa kuruga omu kufa kugaruka omu bwomeezi? 16 Ekindi, ekicweka eky’ensaano ey’ekanzirwe ekiheebwayo nk’omuganuro, obu kiba ekirukwera, kyona kiba kiri ekirukwera. Kandi emihama y’emiti obu eba erukwera, n’amataagi nago gaba nigeera.
17 Baitu amataagi agamu obu garaaba gaacwirweho, kandi iwe noobu kiraaba ngu oli omuzaituni ogw’omu kisaka, okaboherwa ha muti ogu, wateeranizibwa h’amataagi agakaba gasigaireho kandi watunga ekiriisa kuruga omu mihama y’omuzaituuni, 18 oteenyumiriza* h’amataagi. Obu oraaba noogenyumirizaaho,* ijuka ngu tali niiwe okwatiriire emihama baitu ngu emihama niyo ekukwatiriire. 19 Hanyuma, oligamba oti: “Amataagi gakacwibwaho nukwo nsobole kuboherwaho.” 20 Ago mananu! Habw’okutaba n’okwikiriza bakacwibwaho, baitu iwe oyemeriire habw’okwikiriza. Otaba n’emyehembo, baitu oyerinde. 21 Habwokuba Ruhanga obu araaba ataralekere kucwaho amataagi agaakuliire ha muti, na iwe tarukwija kukulekaho. 22 Nahabweki, teekerezaaho embabazi za Ruhanga n’ekiniga kye. Ainiire ekiniga abo abaagwire, baitu iwe naija kukwoleka embabazi ze kakuba oziikaramu; kitali eki, na iwe noija kucwibwaho. 23 Na bo obu baraayoleka okwikiriza, nibaija kuboherwaho, habwokuba Ruhanga naasobora kwongera kubaboheraho. 24 Obu oraaba watemerwe ha muti ogw’omuzaituni ogw’omu kisaka kandi waboherwa ha muzaituni ogw’omu musiri, ekintu ekitali ky’obuhangwa, ka kiryanguha muno amataagi agaakuliire ha muzaituni, kugarurwa ha muti ogu!
25 Ab’oruganda, ningonza mumanye eby’ensita binu ebirukwera, nukwo muteetwara kuba ab’amagezi, habwokuba Abaisaleeri abamu bagumangaine emitima kuhikya omuhendo ogw’abantu ab’amahanga gumazire kusoroozebwa, 26 kandi omu mulingo ogu, Isaleeri yoona, erijunwa. Nkooku kyahandiikirwe kiti: “Omucunguzi* aliruga omu Sayuni,* kandi aihe ebikorwa ebibi omu Yakobbo. 27 Kandi kinu nikyo ekiragaano kyange na bo, obu ndiihaho ebibi byabo.” 28 Ky’amananu ngu obukirukuhika h’amakuru amarungi, bali banyanzigwa habwanyu, habwokuba bakakomwa Ruhanga, baagonzebwa habw’abaisenkurubo. 29 Habwokuba ebisembo n’okwetwa kuruga hali Ruhanga biri bintu ebi atarukwija kweyijukya. 30 Nkooku mutarayorobiire Ruhanga ha kubanza, baitu hati mwolekerwe embabazi habw’obutahurra bwabo, 31 na hati banu tibarukuhurra ekyarugirramu inywe kwolekwa embabazi nukwo na bo boolekwe embabazi. 32 Nahabweki, boona Ruhanga abasibiire hamu omu butahurra, nukwo boona asobole kubooleka embabazi.
33 Obuguuda bwa Ruhanga, amagezi ge, n’okumanya kwe, ka bihamire! Omulingo acwamu emisango gugumire kugwetegereza omu bwijwire, n’emihanda ye yoona titusobora kugyetegereza tukagimarayo! 34 “Nooha amanyire ebiteekerezo bya Yahwe,* rundi nooha asobora kumuhabura?” 35 Rundi “nooha ayabandize kumuha ekintu nukwo asobole kukimusasura?” 36 Habwokuba ebintu byona biruga hali uwe kandi biroho habwe. Aheebwe ekitiinisa ebiro n’ebiro. Amiina.