Ebikorwa by’Abakwenda
24 Hanyuma y’ebiro bitaano, nyakatagara omukuru* Ananiya yaija ali hamu n’abamu h’abakuru b’abantu, n’omutonganirizi wabo arukwetwa Tereturo, kandi baagambira omulemi omusango gwabo ogu barukujunaana Paulo. 2 Obu baamwesere, Tereturo yatandika kumujunaana naagamba ati:
“Habw’okurora ngu nitwegondeza omu businge obwingi habwawe, habw’okurorra hara kwawe olesereho empindahinduka omu ihanga linu, 3 obwire bwona n’omu biikaro byona twikara nitusiima muno habw’ebintu binu Ow’ekitiinisa Ferikisi. 4 Habw’okutakusiisira obwire, ninkusaba otuhuliirize habw’obwire butaito omu mbabazi zaawe. 5 Tukizoire ngu omusaija onu aleetaho akaimukirro, aleetera Abayudaaya boona ab’omu nsi kwemera gavumenti, kandi nuwe arukwebembera akadiini ak’Abanyanazaleesi. 6 Ekindi, akalengaho kusiisa yekaru, twamukwata. 7* —— 8 Kandi na iwe obu oraamukaguliiriza, noija kwerorra wenka ebintu byona ebi turukumujunaana.”
9 Nubwo Abayudaaya boona na bo baamweteeranizaaho nibajumirra Paulo, nibagamba ngu ebintu ebi mananu. 10 Omulemi obu yacikiize Paulo omutwe naamwikiriza kubaza, yagarukamu ati:
“Mmanyire kurungi ngu omazire emyaka nyingi oli mucwi w’emisango w’ihanga linu, nahabweki nyeteekaniize kwetonganaho. 11 Na iwe noosobora kuseruliiriza okakimanya ngu tihakarabireho ebiro ebirukuhingura omu 12 kuruga ngenda kuramya omu Yerusaalemu; 12 bakansanga omu yekaru ntarukuteera empaka n’omuntu weena, noobu kwakuba kuleetaho akaimukirro omu masorrokaniro rundi omu rubuga. 13 Kandi tibaine obwakaiso oburukugumya ebintu ebi barukunjunaana hati. 14 Baitu nyowe kinu nikyo ndukwikiriza, ndamya Ruhanga owa baisenkurunyowe kandi okuramya kwange nibakweta akadiini, kandi ninyikiriza ebintu byona ebiri omu Biragiro, n’ebyahandiikirwe Banabbi. 15 Kandi nyine okunihira omuli Ruhanga, okunihira abasaija banu na bo oku balindiriire ngu nihaija kubaho okuhumbuuka* okw’abahikiriire, n’abatahikiriire. 16 Enu niyo ensonga habwaki nyekamba muno kwikara nyine omuntu ow’omunda omurungi* hali Ruhanga n’abantu. 17 Hanyuma y’emyaka nyingi, nkaija ndeetiire ihanga lyange ebisembo, n’okuhayo ebyonzira. 18 Obu nkaba ninkora ebintu ebi, bakansanga omu yekaru mmazire kweyeza, baitu ntali n’ekitebe ky’abantu kandi hataroho kaimukirro koona. Baitu hakaba haroho Abayudaaya abamu kuruga omu isaza lya Asiya 19 ababaire basemeriire kuba omu maiso gaawe banjunaane obu haraaba haroho ekintu kyona eki nakozere. 20 Rundi leka n’abasaija abali hanu bo bonka bagambe ekibi eki bansangiremu obu naayemeriire omu maiso g’Orukurato Orukuru,* 21 oihireho ekintu kinu kimu kyonka eki naabalize obu nkaba nyemeriire hagati yabo nti: ‘Ninjunaanwa omu maiso ganyu habw’okunihira okw’okuhumbuuka okw’abafu.’”
22 Baitu habwokuba Ferikisi akaba amanyire kurungi amananu agarukukwata ha Muhanda ogu, yayongerayo omusango gwabo naagamba ati: “Lusiya omuduumizi w’amahe obu araija, nubwo ndaacwa omusango gwanyu.” 23 Kandi yaragira mukuru w’ihe aikale amulindiire omu nkomo, baitu amuhe obugabe buke, kandi n’abantu be baikirizibwe kumukorra ebi arukwetaaga.
24 Hanyuma y’ebiro bike kurabaho, Ferikisi yaija ali hamu na mukazi we Durusira, ow’akaba ali Muyudaaya kandi yatumaho Paulo, yahuliiriza ebi akaba naabaza ebirukukwata ha kwikiririza omuli Yesu Kristo. 25 Baitu Paulo obu yabalizeeho ebirukukwata ha kuhikirra, kwetanga, n’okucwa omusango okurukwija, Ferikisi yatiina muno kandi yagamba ati: “Hati banza ogende, baitu obu ndaatunga omugisa ogundi, niinyija kwongera nkutumeho.” 26 Ha murundi nugwo gumu akaba naanihira ngu Paulo naija kumuha sente. Habw’ensonga egi, yaikaraga naamutumaho kwija babaze hamu. 27 Baitu obu haarabireho emyaka ebiri, Porukiyo Fesito yagaruka omu kiikaro kya Ferikisi; kandi habwokuba Ferikisi akaba naagonza kusiimwa Abayudaaya, yaleka Paulo omu nkomo.