Ebbaruha ya Paulo Hali Abefeeso

1 Nyowe Paulo, omukwenda wa Kristo Yesu kuraba omu kugonza kwa Ruhanga, nimpandiikira abarukwera abali omu Efeeso kandi abeesigwa abali omu bumu na Kristo Yesu:

2 Embabazi enyingi muno* hamu n’obusinge kuruga hali Ruhanga Isiitwe hamu na Mukama waitu Yesu Kristo, bibe na inywe.

3 Akugizibwe Ruhanga kandi Ise Mukama waitu Yesu Kristo habwokuba atuhaire buli mugisa ogw’eby’omwoyo omu biikaro eby’omu iguru, tuli omu bumu na Kristo, 4 nkooku yatukomere kuba omu bumu na uwe* ensi etakabaireho nukwo tusobole kuba abarukwera kandi abataine kamogo omu maiso ge omu kugonza. 5 Akatukomamu kara yatufoora abaana be kuraba omu Yesu Kristo, nkooku yasiimire kandi nkooku yagondeze, 6 nukwo akugizibwe habw’embabazi enyingi ez’ekitiinisa ezi yatwolekere kuraba omu Mwana we ou arukugonza. 7 Kuraba omuli uwe, tukalekerwa habw’ekicunguro* kuraba omu sagama y’ogu, ego, kuganyirwa ebibi byaitu kusigikirra ha buguuda obw’embabazi ze enyingi muno.

8 Akasobozesa embabazi zinu enyingi muno kukanya nambere tuli omu magezi goona n’omu kwetegereza 9 kuraba omu kutumanyisa ensita erukwera* ey’ebintu ebi arukugonza. Kandi ensita erukwera enu neesigikirra ha kusiima kwe, hamu n’ekigendererwa kye 10 eky’okuteekaho enteekaniza ey’obwebembezi, akasumi akatairweho obu kalihwayo, asorooze hamu ebintu byona omu Kristo, ebintu eby’omu iguru n’ebintu eby’omu nsi. Ego, birisoroolezebwa omuli uwe 11 ou tuli na uwe omu bumu kandi tukakomwa kuba abagwetwa, habwokuba tukakomwa ira kusigikirra ha kigendererwa ky’ogu ow’ahikiiriza ebintu byona nkooku aba acwiremu, kusigikirra nkooku arukugonza, 12 nukwo itwe abaabandize kunihirra omuli Kristo, tusobole kumuleetera kukugizibwa hamu n’ekitiinisa. 13 Baitu na inywe mukamunihirramu hanyuma y’okuhurra ekigambo ky’amananu, amakuru amarungi agarukukwata ha kujunwa kwanyu. Hanyuma y’okwikiriza, Ruhanga akabateekaho emanyikirizo* naakozesa omwoyo ogurukwera ogwaraganiziibwe, 14 ogunyakuli musimbo* ogurukugumya obugwetwa bwaitu habw’ekigendererwa eky’okulekera abantu ba Ruhanga kuraba omu kicunguro, nukwo asobole kukugizibwa kandi aheebwe ekitiinisa.

15 Egi niyo ensonga habwaki, obu nahuliire ha kwikiriza oku mwine omu Mukama waitu Yesu, n’okugonza oku mwayolekere abarukwera boona, 16 tinkalekaga kusiima Ruhanga habwanyu. Kandi nyikara nimbabazaaho omu saara zange, 17 ngu Ruhanga owa Mukama waitu Yesu Kristo, Isiitwe ow’ekitiinisa abahe omwoyo ogw’amagezi, n’okusuukururwa omu kumanya okuhikire okurukumukwataho. 18 Amulikiire amaiso g’emitima yanyu nukwo musobole kumanya okunihira oku yabeetiire, n’eby’obuguuda eby’ekitiinisa ebi ainiire abarukwera nk’obugwetwa, 19 n’amaani ge amaingi agaayolekere itwe abaikiriza, kandi kusigikirra h’amaani amaingi, 20 aga yayolekere obu yahumbwire Kristo kuruga omu bafu, yamwikaliza ha mukono gwe ogw’obulyo omu biikaro eby’omu iguru, 21 ebirukukirra hara obulemi bwona, obusobozi, amaani, obukama, n’ibara lyona erirukwa hatali omu nteekaniza y’ebintu* enu yonka, baitu n’omu nteekaniza ey’ebintu erukugenda okwija. 22 Kandi ebintu byona akabiteeka hansi y’ebigere bye kandi yamufoora mutwe gw’ebintu byona ebiri omu kitebe, 23 ekinyakuli mubiri gwe, ogwijwire ogu anyakwijuza ebintu byona omu byona.