Ebikorwa by’Abakwenda
25 Fesito obu yahikire omu isaza kandi yatandika kulema, hakarabaho ebiro bisatu, yaruga Kaisaliya yagenda Yerusaalemu. 2 Kandi bakuru ba banyakatagara* n’abakuru b’Abayudaaya baamugambira ebi bakaba nibajunaana Paulo. Nahabweki baatandika kwesengereza Fesito 3 abaikirize, Paulo aleetwe Yerusaalemu. Baitu bakaba nibateekaniza kutega Paulo omu muhanda nukwo bamwite. 4 Baitu Fesito yabagambira ngu, Paulo akaba aine kulindirwa Kaisaliya kandi ngu uwe weenyini akaba ali haihi kugarukayo. 5 Yagamba ati: “Mananu kwo omusaija onu obu araaba aine ekintu ekibi eki yakozere, abo abaine obusobozi omuli inywe leka baije basirimuke hamu na nyowe bamujunaane.”
6 Hanyuma y’okumara na bo ebiro ebitarukuhingura munaana rundi ikumi, yasirimuka yagenda Kaisaliya, kandi ekiro ekyahondiireho yaikarra ha ntebe ey’okucweramu omusango kandi yaragira ngu Paulo bamuleete. 7 Obu yataahiremu, Abayudaaya abakaba barugire na uwe Yerusaalemu baayemerra baamwehinguliiriza nibamujunaana emisango ey’amaani ei bakaba batasobora kugumya.
8 Baitu Paulo yayetonganaho naagamba ati: “Tinkakoraga kintu kyona ekirukucwa Ebiragiro* by’Abayudaaya rundi kusiisa yekaru rundi kucwa ebiragiro bya Kaisaali.” 9 Fesito habw’okugonza kusiimwa Abayudaaya, yagarukamu Paulo ati: “Waakugondeze kugenda Yerusaalemu nukwo ocwerwe oku omusango ogurukukwata ha bintu binu?” 10 Paulo yagamba ati: “Nyemeriire omu maiso g’entebe ey’okucweramu omusango eya Kaisaali, nambere nsemeriire kucwerwa omusango. Tinyine kibi kyona eki nkozere Abayudaaya kandi na iwe wenka okyeroliire kurungi. 11 Mali, obu ndaaba ndi nkozi y’ebibi, kandi nkozere ekintu kyona ekisemeriire kundeetera kwitwa, tindukwanga kwitwa; baitu ebintu abantu banu ebi barukunjunaana obu biraaba bitahikire, busaho muntu aine obusobozi obw’okumpayo hali bo habw’okugonza kubasemeza. Ninjurra hali Kaisaali!” 12 Hanyuma ya Fesito kubaza n’orukurato orw’abahi b’amagezi, yagarukamu ati: “Ojuliire hali Kaisaali; kandi hali Kaisaali nuho oraagenda.”
13 Hanyuma y’okurabaho ebiro, Omukama Agulipa* hamu na Berenike, bakaija Kaisaliya kubungira Fesito kumutabaarukya. 14 Habwokuba bakaba bali b’okumarayo ebiro bingiho, Fesito akagambira omukama ha musango gwa Paulo, naagamba ati:
“Haroho omusaija Ferikisi ou yalekere ali munyankomo, 15 kandi obu nkaba ndi omu Yerusaalemu, bakuru ba banyakatagara hamu n’abakuru b’Abayudaaya bakaija baangambira ebirukumukwataho, nibasaba mmucwere omusango kandi ngumusingise. 16 Baitu nkabagarukamu nti, teri nkora y’Abarooma kuhayo omuntu weena habw’okugonza kusemeza abantu, ogu arukujunaanwa atakatungire omugisa ogw’okutangaana abarukumujunaana nukwo ayetonganeho habw’ebi barukumujunaana. 17 Nahabweki obu baahikire hanu, ntakerererwe, baitu ekiro ekyahondiireho nkaikarra ha kitebe eky’okucweramu omusango kandi naragira omusaija ogu aleetwe omu maiso g’ekitebe. 18 Abarukumujunaana obu baayemeriire, batahe obwakaiso bwona oburukugumya ebintu byona ebi bakaba nibamujunaana nkooku nkaba ninnihira. 19 Oihireho bakaba nibateera na uwe empaka ha bintu ebirukukwata ha kuramya ruhanga wabo n’ebirukukwata ha musaija ow’arukwetwa Yesu ayafiire, baitu Paulo ou yaikaraga naagamba ngu mwomeezi. 20 Habw’okuburwa omulingo ndaakwatamu obutaikirraniza bunu, nkamukaguza obu araaba yaakugondeze kugenda Yerusaalemu nuho ensonga ze zicwerwemu. 21 Baitu Paulo obu yajuliire kwikara alinzirwe omu nkomo kuhikya Agusto* eki araacwamu, nkaragira aikale akwasirwe kuhikya obu ndaamusindika hali Kaisaali.”
22 Nubwo Agulipa yagambira Fesito ati: “Omusaija onu naakugondeze kumwehulirra nyenka.” Fesito yamugambira ati: “Nyenkya noija kumwehulirra.” 23 Ekiro ekyahondiireho, Agulipa na Berenike bakaizira omu bitiinisa by’amaani, bali hamu n’abaduumizi b’amahe, hamu n’abasaija ab’ebitiinisa ab’omu rubuga, baataha omu kisiika nambere abantu bakaba beesoroliize; hanyuma ya Fesito kuragira, baaleeta Paulo omunda. 24 Kandi Fesito yagamba ati: “Omukama Agulipa hamu n’abantu inywena abali na itwe, murole omusaija onu Abayudaaya boona omu Yerusaalemu na hanu, ou bansabire nibatokera haiguru ngu tasemeriire kuba mwomeezi. 25 Baitu nkakyetegereza ngu taine ekintu kyona eki yakozere ekisemeriire kumuleetera kwitwa. Nahabweki omusaija onu obu yajuliire hali Agusto, nkacwamu kumusindika. 26 Busaho kintu kyona ekirukugumya, eki nsobora kuhandiikira Mukama wange ekirukukwata ha musaija onu. Nahabweki namuleeta omu maiso ganyu inywena, kukira muno omu maiso gaawe iwe Omukama Agulipa, nukwo hanyuma y’okumukaguza, nsobole kutunga eki ndaahandiika. 27 Habwokuba tikirukunzookera nk’ekihikire kusindika omunyankomo, baitu ntoolekere emisango erukumujunaanwa.”