Ebikorwa by’Abakwenda
26 Agulipa yagambira Paulo ati: “Noikirizibwa kwetonganaho.” Nubwo Paulo yagorra omukono gwe, yayetonganaho ati:
2 “Omukama Agulipa, habw’ebintu byona Abayudaaya ebi barukunjunaana, nikinsemeza kiro kinu ngu ningenda kwetonganaho omu maiso gaawe, 3 habwokuba omanyire kurungi emigenzo y’Abayudaaya yoona n’empaka zaabo. Nahabweki ninkwesengereza ogumiisirize ompuliirize.
4 “Amananu gali, omulingo natwaizeemu obwomeezi bwange kuruga omu busigazi, omu bantu* bange n’omu Yerusaalemu, gumanyirwe kurungi Abayudaaya boona 5 abakaba baammanyire kurungi kandi obu baraaba nibagonza nibasobora kumpeera obwakaiso ngu nkaba ndi omu kitebe ky’ediini ekirukukirayo kuhondera enyegesa z’ediini yange, obu nkaba ndi Mufalisaayo. 6 Baitu hati ninjunaanwa habw’okunihira oku nyine omu murago Ruhanga yaraganiize baisenkuruitwe; 7 kandi ogu nugwo omurago gwonyini enganda zaitu 12 zirukunihira kurora niguhikirra kuraba omu kwekamba kuheereza Ruhanga nyamusana n’ekiro. Ai Omukama, ninjunaanwa Abayudaaya habw’okunihira oku.
8 “Habwaki nimuteekereza* ngu tikirukusoboka, Ruhanga kuhumbuura abafu? 9 Na nyowe nkaba ninkigumiza kimu ngu nsemeriire kukora ebikorwa bingi kuhakaniza ibara lya Yesu Omunyanazaleesi. 10 Eki kyonyini nikyo nakozere omu Yerusaalemu, nkateeka abarukwera baingi omu nkomo habwokuba nkaba ntungire obusobozi kuruga hali bakuru ba banyakatagara* kandi obu baagendaga kwitwa, nakisagikaga. 11 Nakiraga kubafubira omu masorrokaniro goona, nalengahoga kubahambiriza kuruga omu kwikiriza kwabo, kandi habwokuba nkaba mbakwatiirwe muno ekiniga, nkabahiiganiza n’omu mbuga ezindi.
12 “Obu nkaba ningenda Damasiko kukora ekintu nikyo kimu, ntungire obusobozi n’ebiragiro kuruga hali bakuru ba banyakatagara, 13 obu nkaba ndi omu muhanda omu ihangwe, Ai Omukama, nkarora ekyererezi eky’amaani ekirukukira okwaka kw’izooba kyaruga omu iguru kyanyehinguliriza hamu n’abo aba nkaba ningenda na bo. 14 Itwena obu tukaba tugwire hansi, nkahurra iraka niringambira omu Ruhebburaniya liti: ‘Saulo, Saulo, habwaki nompiiganiza? Kusamba emihunda* nooyesaasa wenka.’ 15 Baitu nagamba nti: ‘Niiwe oha, Mukama wange?’ Mukama waitu yagamba ati: ‘Niinyowe Yesu ou orukuhiiganiza. 16 Imuka oyemerre, enu niyo ensonga habwaki nakubonekera kukukoma nk’omuheereza kandi nka kaiso ow’ebintu byona ebi orozere hamu n’ebintu ebi ndaakwoleka ebirukunkwataho. 17 Kandi ndikujuna hali abantu na hali amahanga nambere ndaakutuma 18 kwigura amaiso gaabo, kubaiha omu mwirima baije omu kyererezi, n’okubaiha omu busobozi bwa Sitaani bagaruke hali Ruhanga, nukwo basobole kutunga okuganyirwa okw’ebibi n’obugwetwa omuli abo abeeziibwe kuraba omu kwikiririza omuli nyowe.’
19 “Nahabweki, Omukama Agulipa, nkoorobera okwolekwa oku natungire kuruga omu iguru, 20 kandi nkatandika n’ab’omu Damasiko nagenda na hali abo abali omu Yerusaalemu, n’omu nsi yoona eya Buyudaaya, na hali ab’omu mahanga, nimbagambira ngu beegarukemu bagaruke hali Ruhanga kuraba omu kukora ebikorwa ebirukwoleka ngu beegarukiremu. 21 Egi niyo ensonga habwaki Abayudaaya bankwatiire omu yekaru kandi baalengaho kunyita. 22 Baitu habwokuba nintunga obukoonyezi kuruga hali Ruhanga, kuhikya na kiro kinu, nyikaire nimpa obwakaiso hali abantu ab’ebitiinisa, n’abantu aba buli kiro nimbagambira ebi byonka ebyabaziibwe banabbi na Musa ngu nibiija kubaho— 23 ngu Kristo akaba ali w’okubonabona kandi ngu yaakubaire w’okubanza okuhumbuurwa omu bafu. Kandi akaba naija kutebeza abantu banu hamu n’ab’amahanga ebirukukwata ha kyererezi.”
24 Paulo obu akaba naabazaaho ebintu binu kwetonganaho, Fesito akabaliza omu iraka erya haiguru ati: “Paulo, ogwire iraro, kusoma muno kikunagire iraro!” 25 Baitu Paulo yagamba ati: “Ow’ekitiinisa Fesito, tingwire iraru, baitu ebigambo ebi ndukubaza by’amananu kandi by’amagezi. 26 Amananu gali, Omukama ou ndukubaza na uwe ntarukutiina, amanyire ebintu binu kurungi; ninkigumya ngu busaho kintu na kimu eki atamanyire habwokuba binu byona bitakorwe omu nsita. 27 Omukama Agulipa, noikiririza omu Banabbi? Nkimanyire ngu noobaikiririzaamu.” 28 Baitu Agulipa yagambira Paulo ati: “Omu bwire buke, noosobora kunsoonasoona kufooka Mukristaayo.” 29 Nubwo Paulo yagamba ati: “Ninsaba Ruhanga ngu ka bube omu bwire buke rundi akasumi akaraihire, hatali iwe wenka, baitu n’abo abarukumpuliiriza kiro kinu, bafooke nka nyowe, baitu batabohwa enjegere zinu ez’enkomo.”
30 Nubwo Omukama yayemerra, omulemi, na Berenike, hamu n’abasaija abakaba baikaliire na bo. 31 Baitu obu bakaba nibagenda, baatandika kugambirangana bati: “Omusaija onu, taine eki yakozere ekisemeriire kumwisa rundi kubohwa omu nkomo.” 32 Hanyuma Agulipa yagambira Fesito ati: “Omusaija onu yaakubaire alekiirwe, kakuba atarajuliire hali Kaisaali.”