Nk’oku Yahandiikirwe Matayo
1 Ekitabu eky’ebyafaayo by’okuzaarwa kwa Yesu Kristo,* omwijukuru wa Daudi, omwijukuru wa Ibburahimu.
2 Ibburahimu akazaara Isaka;
Isaka yazaara Yakobo;
Yakobo yazaara Yuda na bagenzi be;
3 Yuda yazaara Pereezi hamu na Zera, akabazaara omuli Tamali;
Pereezi yazaara Hezirooni;
Hezirooni yazaara Ramu;
4 Ramu yazaara Aminadabbu;
Aminadabbu yazaara Nasooni;
Nasooni yazaara Salimoni;
5 Salimoni yazaara Boazi, akamuzaara omuli Rahabbu;
Boazi yazaara Obbedi, akamuzaara omuli Ruusi;
Obbedi yazaara Yese;
6 Yese yazaara Daudi omukama.
Daudi yazaara Suleimaani, akamuzaara omu mukazi wa Uliya;
7 Suleimaani yazaara Rehobboamu;
Rehobboamu yazaara Abbiya;
Abbiya yazaara Asa;
8 Asa yazaara Yehosafaati;
Yehosafaati yazaara Yehoramu;
Yehoramu yazaara Uziya;
9 Uziya yazaara Yosamu;
Yosamu yazaara Ahazi;
Ahazi yazaara Hezekiya;
10 Hezekiya yazaara Manase;
Manase yazaara Amoni;
Amoni yazaara Yosiya;
11 Yosiya yazaara Yekoniya na bagenzi be, omu kasumi obu baatwairwe omu Bbabburooni.
12 Hanyuma y’okutwarwa Bbabburooni, Yekoniya akazaara Saratiyeri;
Saratiyeri yazaara Zerubabeeri;
13 Zerubabeeri yazaara Abbiyuda;
Abbiyuda yazaara Eriyakimu;
Eriyakimu yazaara Azoli;
14 Azoli yazaara Zadooki;
Zadooki yazaara Akimu;
Akimu yazaara Eliyudi;
15 Eliyudi yazaara Eryeza;
Eryeza yazaara Matani;
Matani yazaara Yakobbo;
16 Yakobbo yazaara Yusufu iba Malyamu, nyina Yesu, arukwetwa Kristo.
17 Obwijukuru* bwona kuruga hali Ibburahimu kuhika hali Daudi bukaba 14; kuruga hali Daudi kuhika h’akasumi ak’okutwarwa Bbabburooni bukaba buli bwijukuru 14; kandi kuruga ha kutwarwa Bbabburooni kuhika hali Kristo, bwijukuru 14.
18 Kunu nukwo kuzaarwa kwa Yesu Kristo. Omu kasumi Malyamu nyina akaba ajumbiirwe Yusufu, akatunga enda habw’omwoyo ogurukwera* atakamutwaire kuba mukazi we. 19 Baitu habwokuba Yusufu iba akaba ali musaija ahikiriire kandi akaba atarukugonza kumuswaza, akagonza kumuleka omu nsita. 20 Baitu hanyuma y’okuteekerezaaho ebintu ebi, dora! Malaika wa Yahwe* akamubonekera omu kirooto, yamugambira ati: “Yusufu, mutabani wa Daudi, otatiina kutwara mukazi waawe Malyamu omu ka, habwokuba enda ei aine agitwaire habw’omwoyo ogurukwera. 21 Alizaara omwana, kandi ibara lye olimuruka Yesu,* habwokuba alijuna abantu be kuruga omu bibi byabo.” 22 Binu byona bikabaho kuhikiiriza Yahwe* ebi yarangire kuraba omuli nabbi we naagamba ati: 23 “Dora! Omwisiki ow’atakabyamaga n’omusaija alitwara enda, azaale omwana omwojo kandi ibara lye balimuruka Imanueri,” ekirukumanyisa, “Ruhanga Ali na Itwe.”
24 Hanyuma, Yusufu akasisiimuka yakora nkooku malaika wa Yahwe* yamugambiire, kandi yatwara mukazi we omu ka. 25 Baitu atateerane na uwe kuhikya obu yazaire omwana omwojo kandi ibara lye yamuruka Yesu.