Ebbaruha ya Paulo eya Kabiri Hali Timoseo
4 Ninkuragira omu maiso ga Ruhanga na Kristo Yesu, ow’alicwera omusango aboomeezi n’abafu, obu alyolekwa kandi obu aliija omu Bukama bwe: 2 Tebeza ekigambo; kitebeze n’obwekambi kandi okikole omu bwangu, omu busumi oburungi n’omu busumi obugumire; hana, habura, teererra, n’okugumiiisiriza kwona kandi oyegeseege omu mulingo omurungi. 3 Habwokuba nihaija kubaho akasumi abantu obu balyanga enyegesa ezihikire,* baitu kusigikirra ha kwegomba kwabo, balyesorooleza abeegesa abaraabagambira ebi barukugonza kuhurra. 4 Balihinduka baleke kuhuliiriza amananu kandi bahuliirize enganikyo ez’ebisuba. 5 Baitu iwe, ikara nooyetegereza omu bintu byona, gumira emitalibaine, kora omulimo gw’omutebezi w’enjiri,* hikiiriza kurungi obuheereza bwawe.
6 Habwokuba ndiyo ninseeswa nk’ekihongwa eky’okunywa, kandi obwire obw’okulekerwa kwange buli haihi kuhika. 7 Ndwaine obulemu oburungi, nyirukire empaka ez’okwiruka kuhika ha kumalirra, okwikiriza kwange nkulinzire. 8 Kurugira kimu hati, nyahuliirwe ekondo ey’okuhikirra, Mukama, omucwi w’emisango ow’okuhikirra ei alimpa ha kiro kiri. Kandi taligiha nyowe nyenka, baitu n’abo boona abagondeze okwolekwa kwe.
9 Kora kyona ekirukusoboka kwija nambere ndi omu bwangu. 10 Dema akandekaho, habwokuba akagonza ebintu eby’ensi* enu, kandi akagenda Sesalonika. Kereseke akagenda Garatiya, kandi Tito yagenda Daramatiya. 11 Luka wenka nuwe ali na nyowe. Oije na Marako habwokuba w’omugaso hali nyowe omu buheereza. 12 Baitu ntumire Tukiko omu Efeeso. 13 Obu oraija, ondeetere omwenagiro* gwange ogu nasigiire Karapo omu Terowa, hamu n’emizingo,* kukira muno ey’empu.*
14 Alekizanda omuheesi w’emiringa akankora kubi muno. Yahwe* alimusasura kusigikirra ha bikorwa bye. 15 Na iwe omwerinde, habwokuba akahakaniza muno obutumwa bwaitu.
16 Omu kwetonganaho kwange okw’okubanza busaho muntu n’omu ow’akaba ali ha rubaju rwange, baitu boona bakansigaho—eki kitabajunaanwa. 17 Baitu Mukama waitu akeemerra ha rubaju rwange, yampa amaani nukwo nsobole kutebeza amakuru amarungi omu bwijwire kandi amahanga goona gasobole kugahurra; kandi nkajunwa kuruga omu kanwa k’entale. 18 Mukama waitu naija kundinda hali ebintu byona ebibi, kandi alinjuna antwale omu Bukama bwe obw’omu iguru. Aheebwe ekitiinisa ebiro n’ebiro. Amiina.
19 Ondamukize Purisika na Akura n’ab’omu nju ya Onesiforo.
20 Erasito akasigara omu Kolinso, baitu Tirofimo nkamusiga Mireto arwaire. 21 Kora kyona ekirukusoboka kumpikaho akasumi ak’obutiti* katakahikire.
Ewubulo, Pudensi, Lino, Karawudiyo hamu n’ab’oruganda boona, bakuramukize.
22 Mukama waitu abe na iwe habw’omwoyo ogu orukwoleka. Embabazi ze enyingi muno* zibe na iwe.