Ebbaruha ya Paulo ey’Okubanza Hali Abakolinso
6 Omuntu weena omuli inywe obu aba aine eki arukujunaana mugenzi we, habwaki amutwara omu mbuga z’ebiragiro omu maiso g’abantu abatali ab’okuhikirra, omu kiikaro ky’okumutwara omu maiso g’abarukwera? 2 Rundi timukimanyire ngu abarukwera balicwera ensi omusango? Obu kiraaba ngu niinywe murukwija kucwera ensi omusango, muraalemwa kucwa obusango obutaitotaito? 3 Timukimanyire ngu tulicwera bamalaika omusango? Hati nitulemwa tuta kucwa emisango ey’obwomeezi obw’akasumi kanu? 4 Nahabweki, obu muba mwine emisango ey’okucwa ey’obwomeezi bunu, abantu abarukugaywa omu kitebe nubo mukozesa nk’abacwi b’emisango? 5 Nimbaza nukwo mbaleetere kukwatwa ensoni. Omuli inywe tiharumu omusaija weena ow’amagezi ow’asobora kuramura ab’oruganda, 6 omu kiikaro ky’ow’oruganda kutwara ow’oruganda mugenzi we omu mbuga z’ebiragiro, kandi omu maiso g’abo abatali baikiriza?
7 Mali muba mumazire kusingwa obu mutwarangana omu mbuga z’ebiragiro. Habwaki mutaikiriza kutwazibwa kubi? Habwaki mutaikiriza kugobezebwa? 8 Baitu inywe nimugobeza ab’oruganda bagenzi banyu kandi nimubatwaza kubi.
9 Rundi timukimanyire ngu abantu abatali b’okuhikirra tibaligwetwa Obukama bwa Ruhanga? Mutahabisibwa.* Abasiihani,* abaramya ebisisani, abo abali omu buswere abateerana n’omuntu ou batali na uwe omu buswere, abo abakora ebikorwa eby’obukuuhya,* 10 abasuma, abantu ab’omururu, abatamiizi, abajumi, hamu n’abanyagi, tibaligwetwa Obukama bwa Ruhanga. 11 Kandi abamu omuli inywe nukwo mukaba muli muti, baitu inywe mukoogebwa, mwayezebwa* mwayetwa ab’okuhikirra omu ibara lya Mukama waitu Yesu Kristo n’omwoyo gwa Ruhanga waitu.
12 Ebintu byona nibiikirizibwa hali nyowe, baitu tikiri ngu ebintu byona nibigasa. Hali nyowe ebintu byona nibiikirizibwa baitu tindukwija kwikiriza kulemwa ekintu* kyona. 13 Ebyokulya biba by’enda, n’enda eba y’ebyokulya, baitu Ruhanga alibiihaho byona. Omubiri tiguli gw’obusiihani, baitu gwa Mukama waitu; kandi Mukama waitu w’omubiri. 14 Baitu Ruhanga akahumbuura Mukama waitu, kandi na itwe alituhumbuura kuruga omu kufa kuraba omu maani ge.
15 Timukimanyire ngu emibiri yanyu eri bicweka bya Kristo? Hati nsemeriire kwihaho ebicweka bya Kristo mbiteeranize hali malaaya? Tikirukusoboka! 16 Timukimanyire ngu omuntu weena obu ateeranizibwa na malaaya aba afookere mubiri gumu na uwe? Habwokuba Ruhanga akagamba ati: “Babiri balifooka mubiri gumu.” 17 Baitu weena ow’ateeranizibwa na Mukama waitu aba omu na uwe omu mwoyo. 18 Mwiruke obusiihani.* Ekibi ekindi kyona omuntu eki akora kiri aheeru y’omubiri gwe, baitu ogu weena anyakusiihana aba naasiisira omubiri gwe wenka. 19 Timukimanyire ngu omubiri gwanyu yekaru y’omwoyo ogurukwera oguli omuli inywe ogu mwatungire kuruga hali Ruhanga? Kandi timweineho busobozi, 20 habwokuba mukagurwa n’omuhendo. Nahabweki, mukole kyona eki murukusobora kuhaisa Ruhanga ekitiinisa omu mibiri yanyu.