Ebbaruha ya Paulo eya Kabiri Hali Timoseo

3 Baitu kinu okimanye ngu, omu biro ebya ha mpero* halibaho obusumi obw’akabi kaingi kandi obugumangaine. 2 Habwokuba abantu baliba abeegonza bonka, abagonza muno sente, abeenyumiza bonka,* abeekuliiriza, abajumi, abatahurra abazaire, entasiima, abatali beesigwa, 3 abatagonza abanyabuzaale baabo, abataikirraniza, abahangirizi, abataine okwetanga, abaine ekiniga ekihinguraine, abatagonza oburungi, 4 abagobya, abagumangaine, ab’emyehembo, abagonza eby’okwesemeza omu kiikaro ky’okugonza Ruhanga, 5 nibeesisaniriza nk’abarukutiina Ruhanga, baitu ebikorwa byabo nibyoleka ngu tibarukumutiina; kandi abantu nka banu, obeetantalege. 6 Omuli banu nuho haruga abasaija abataaha omu maju omu mulingo ogw’orugezigezi, nibabiihabiiha abakazi abaceke abaijwire ebibi, abatwalirizibwa okwegomba okw’emiringo nyingi, 7 baikara nibeega, baitu tibasobora kwetegerereza kimu amananu.

8 Nkooku Yane na Yambere baahakaniize Musa, banu na bo baikara nibahakaniza amananu. Abantu nk’abo, enteekereza yabo ekasiisikarra kimu, tibarukusiimwa Ruhanga habwokuba nibarubata batarukusigikirra ha kwikiriza. 9 Baitu tibarukwija kukurakurana naakake, habwokuba obudomadoma bwabo nibwija kurolerwa kimu boona, nkooku kyahikire h’abasaija abo babiri. 10 Baitu iwe, ohondiire kurungi enyegesa zange, engeso zange, ekigendererwa kyange, okwikiriza kwange, okugumiisiriza kwange, okugonza kwange, okuguma kwange, 11 okuhiiganizibwa n’okubonabona nk’ebi narabiremu omu Antyokiya, Ikoniyo, na Rusitura. Nkagumira okuhiiganizibwa kunu, kandi Mukama akanjuna omu ebi byona. 12 Amananu gali, abo boona abarukugonza kugendera omu bwomeezi obw’okwemarra hali Ruhanga* obu nibahondera Kristo Yesu, nibaija kuhiiganizibwaga. 13 Baitu abantu ababi n’abarukubiiha ebisuba, nibaija kweyongerra kimu kufooka babi, nibahabisa abandi kandi na bo nibahabisibwa.

14 Baitu iwe, gumizaamu noohondera ebintu binu ebi wayegere kandi wasoonwasoonwa kubiikiriza, omanyire ayabikwegeseze 15 kandi kurugira kimu omu buto okamanya ebyahandiikirwe ebirukwera, ebikusobozesa kuba w’amagezi, nukwo osobole kujunwa kuraba omu kwikiririza omu Kristo Yesu. 16 Ebyahandiikirwe* byona bikatereekerezebwa* Ruhanga kandi nibigasa omu kwegesa, omu kuhana, omu kutereekereza ebintu,* n’omu kutendeka omuntu kukora ekihikire, 17 nukwo omuntu wa Ruhanga ataburwaho ekintu kyona, abe na byona ebi arukwetaaga kukora omulimo gwona omurungi.