Ebbaruha ya Paulo ey’Okubanza Hali Abakolinso
14 Mwikale nimwekamba muno* kwolekangana okugonza, kandi mwikale nimwekamba kutunga ebisembo eby’omwoyo, kukira muno ekisembo eky’okuranga obunabbi. 2 Habwokuba ogu ow’abaza omu ndimi tabaliza abantu, baitu abaliza Ruhanga, habwokuba abaza ensita ezirukwera kuraba omu mwoyo baitu busaho n’omu ow’amuhuliiriza. 3 Baitu ogu ow’aranga obunabbi ayombeka abandi, abagarramu amaani, kandi ahuumuza abantu kuraba omu bigambo bye. 4 Ogu ow’abaza omu ndimi ayeyombeka wenka, baitu ogu ow’aranga obunabbi ayombeka ekitebe. 5 Hati naakugondeze inywena mubaze omu ndimi, baitu eki ndukukirayo kugonza nukwo inywe kuranga obunabbi. Amananu gali ngu, ogu ow’aranga obunabbi naakira ogu ow’abaza omu ndimi, oihireho kakuba azihindura, nukwo ekitebe kisobole kwombekwa. 6 Baitu ha murundi gunu ab’oruganda, kakuba nyija nambere muli nimbaza omu ndimi, ndaabagasira nta rundi buli mbalize na inywe ninkozesa ekisembo eky’okusuukururwa, rundi ekisembo eky’okumanya, rundi eky’okuranga obunabbi rundi eky’okwegesa?
7 Nikyo kimu n’ebintu ebitaine bwomeezi ebikozesebwa kuturukya amaraka, nk’enyamulere rundi enanga. Kakuba bitaahukanizibwamu amaraka gaabyo, iraka ery’enyamulere rundi ery’enanga, lirayahukanizibwa lita? 8 Kakuba engwara ebaza omu iraka eritarukuhulirwa kurungi, nooha asobora kweteekaniriza obulemu? 9 Omu mulingo nugwo gumu, iwe arukubaza omu ndimi kakuba otakozesa orulimi orwanguhire kwetegereza, nooha asobora kwetegereza ebi orukubaza? Amananu gali, noija kuba noobaliza omuyaga. 10 Omu nsi harumu endimi nyingi eza buli mulingo, baitu buli rulimi nirwetegerezebwa.* 11 Kakuba mba ntarukwetegereza ebirukugambwa, nimba nafooka munyamahanga hali ogu arukubimbaliza, kandi n’ogu arukumbaliza naaba ali munyamahanga hali nyowe. 12 Nikyo kimu na inywe, nkooku murukugonza muno kutunga ebisembo eby’omwoyo, mwekambe kuserra ebisembo ebiraayombeka ekitebe.
13 Nahabweki, ogu ow’arukubaza omu ndimi, asabe Ruhanga amusobozese kuzihindura. 14 Habwokuba obu mba ninsaba omu ndimi, ekisembo kyange eky’omwoyo nikyo kiba nikisaba, baitu omu biteekerezo byange, nimba ntaine eki ndukwetegereza. 15 Hati, kiki ekisemeriire kukorwa? Niinyija kusaba n’ekisembo eky’omwoyo, baitu niinyija n’okusaba ebintu ebi ndukwetegereza amakuru gaabyo. Niinyija kuzina ebizina ebirukukugiza n’ekisembo eky’omwoyo, baitu nabwo niinyija kuzina ebizina eby’okukugiza ebi ndukwetegereza amakuru gaabyo. 16 Kakuba okugiza n’ekisembo eky’omwoyo, omuntu owa buli kiro anyakuli hagati omuli inywe, araagamba ata “Amiina” obu oraamara kusiima, kandi kunu atamanyire ebi orukubaza? 17 Ky’amananu ngu nooba osiimire kurungi, baitu omuntu ogu naaba atombekerwe. 18 Ninsiima Ruhanga ngu nimbaza endimi nyingi kukira inywe inywena. 19 Baitu omu kitebe, haakire mbaze ebigambo bitaano ebirukwetegerezebwa nukwo nyegese abandi, kukira kubaza ebigambo omutwaro gumu omu ndimi.
20 Ab’oruganda, tindukugonza mube abaana abato omu kwetegereza kwanyu, baitu mube abaana abato obukirukuhika ha bintu ebibi; kandi mufooke abakuliire kimu omu kwetegereza kwanyu. 21 Omu Biragiro kikahandiikwa kiti: “‘Omu ndimi z’abanyamahanga n’eminwa y’abantu abatammanyire ndibaza n’abantu banu, baitu nabwo balyanga kumpuliiriza,’ agambire Yahwe.”* 22 Nahabweki endimi, tikali kokurorraho hali abarukwikiriza baitu hali abatarukwikiriza, baitu obunabbi tibuli bw’abatarukwikiriza, baitu bw’abarukwikiriza. 23 Nahabweki, ekitebe kyona obu kyesorooleza omu kiikaro kimu, kandi boona bakabaza endimi, baitu abantu abatali baikiriza, rundi aba buli kiro bakataahamu, tibarukwija kugamba ngu mugwire iraro? 24 Baitu inywena obu murukuba nimuranga obunabbi, kandi omuntu atali mwikiriza rundi omuntu owa buli kiro akataahamu, ebi murukubaza nibiija kumuhana kandi bimuleetere kwekebera. 25 Ensita eziri omu mutima gwe niziija kweyoleka, naija kwinama hansi kandi aramye Ruhanga naagamba ati: “Mananu kwo Ruhanga ali omuli inywe.”
26 Ab’oruganda, hati kiki eki musemeriire kukora? Obu muraayesoroozaaga hamu, omu aine zabbuli, ondi aine eky’okwegesa, ondi aine okwolekwa, ondi naabaza omu ndimi, kandi ondi naahindura endimi. Ebintu byona leka bikorwe habw’okwombekangana. 27 Kandi kakuba omuntu agonza kubaza omu ndimi, ekingi muno, batahingura hali babiri rundi basatu, kandi hanyuma y’ondi kubaza, hakurateho ondi kandi habeho omuhinduzi. 28 Baitu obu haraaba hataroho omuhinduzi, ogu arukubaza omu ndimi asemeriire kuculeera omu kitebe kandi ayebalize wenka na Ruhanga. 29 Leka banabbi babiri rundi basatu nubo babaze kandi leka abandi beetegereze amakuru ag’ebintu ebirukubazibwa. 30 Baitu omuntu ondi kakuba atunga okwolekwa obu aikaliire aho, ogu ow’abaire naabaza aculeere. 31 Inywena nimusobora kuranga obunabbi nimuhonderana, nukwo boona basobole kwega kandi boona basobole kugarurwamu amaani. 32 Kandi ebisembo by’omwoyo ebya banabbi bisemeriire kulemwa banabbi. 33 Habwokuba Ruhanga tali Ruhanga ow’akajagarro baitu ow’obusinge.
Kandi nkooku kiri omu bitebe byona eby’abarukwera, 34 leka abakazi baikale baculiire omu bitebe, habwokuba tikirukwikirizibwa bo kubaza. Baitu leka babe bahulizi nkooku Ebiragiro* bigamba. 35 Obu baraaba nibagonza kwega ekintu, leka bakaguze baibabo omuka, habwokuba nikiswaza omukazi kubaza omu kitebe.
36 Ekigambo kya Ruhanga kikaruga omuli inywe, rundi kikagarukira omuli inywe inywenka?
37 Kakuba omuntu weena ateekereza ngu ali nabbi, rundi ahairwe ekisembo eky’omwoyo, asemeriire kukyetegereza ngu ebintu ebi ndukubahandiikira, biragiro bya Mukama waitu. 38 Baitu kakuba kinu omuntu weena atakitaho omutima, na uwe taliteekwaho omutima.* 39 Nahabweki ab’oruganda, mwikale nimwekamba kuranga obunabbi, kandi mutatanga okubaza omu ndimi. 40 Baitu ebintu byona bikorwe omu mulingo ogusemeriire kandi oguteekaniziibwe kurungi.