Ebbaruha ya Paulo eya Kabiri Hali Timoseo
2 Nahabweki, iwe omwana wange, ikara nootunga amaani omu mbabazi enyingi muno* eziri omu Kristo Yesu; 2 kandi ebintu ebi wahuliire kuruga hali nyowe ebyasagikirwe abakaiso baingi, ebintu binu byegese abasaija abeesigwa nukwo basobole kuba n’ebirukwetaagisa kwegesa abandi. 3 Nk’omuserikale omurungi owa Kristo Yesu, ikara oyeteekaniize kubonabona. 4 Busaho muntu arukuheereza nk’omuserikale asobora kwejumbira omu by’obusuubuzi eby’ensi* enu, nukwo asiimwe ogu ayamukomere kuba omuserikale. 5 N’omu mizaano, omuntu weena ow’agyejumbiramu, ajwekwa* ekondo kakuba ahondera ebiragiro by’emizaano egi. 6 Omulimi omwekambi nuwe asemeriire kuganura ebi aba ayereze. 7 Ikara nooteekerezaaho ebi ndukukugambira; Mukama waitu naija kukuha okwetegereza* omu bintu byona.
8 Ijuka ngu Yesu Kristo akahumbuurwa kuruga omu bafu kandi akaba ali ruzaaro rwa Daudi* kusigikirra h’amakuru amarungi aga ndukutebeza, 9 habw’amakuru ganu amarungi niyo ensonga habwaki ndiyo nimbonabona kandi ntairwe omu nkomo nk’enkozi y’ebibi. Baitu ekigambo kya Ruhanga tikiboherwe. 10 Habw’ensonga enu, ningumizaamu kugumiisiriza ebintu byona habw’abarukwera, nukwo na bo basobole kutunga okujunwa n’ekitiinisa eky’ebiro n’ebiro kuraba omu Kristo Yesu. 11 Ebigambo binu by’okwesiga: Amananu gali, obu turaaba twafiire hamu na uwe, na itwe tulyomeera hamu na uwe; 12 obu turaagumizaamu nitugumiisiriza, na itwe nitwija kulema hamu nk’abakama; obu turaamwehakana, na uwe naija kutwehakana; 13 obu tulemwa kuba beesigwa, uwe aikara ali mwesigwa, habwokuba tasobora kuba eki atali.
14 Ikara noobaijukya* ebintu binu omu maiso ga Ruhanga, noobateererra kutateera empaka habw’ebigambo, ekintu ekitaine mugaso habwokuba ky’akabi* hali abo abarukuhuliiriza. 15 Weekambe muno kurora wasiimwa omu maiso ga Ruhanga, omukozi ataine ekirukumukwasa ensoni, arukukwata* ekigambo ky’amananu omu mulingo oguhikire. 16 Baitu yangira kimu ebigambo ebitaine makuru, ebirukusiisa ebintu ebirukwera habwokuba bireetaho kweyongera okw’ebikorwa Ruhanga ebi anoba, 17 kandi ebigambo byabo nibiija kujanjaara nk’ekihooya ekirukutana nikirya omubiri. Humenayo na Firete bali bamu hali bo. 18 Abasaija banu bahabire baaruga omu mananu nibagamba ngu okuhumbuuka kukamara ira kubaho, kandi nibaleetera okwikiriza kw’abantu abamu kuceka. 19 Noobu kiraaba kiri kiti, omusingi gwa Ruhanga gwikara gugumire, guroho emanyikirizo* enu, “Yahwe* amanyire abe,” kandi “Ogu weena arukukunga ibara lya Yahwe* alekere kimu okutahikirra.”
20 Hati omu nju enkooto tihabamu ebintu* eby’ezaabbu n’efeeza byonka, baitu habamu ebibaizirwe n’ebibumbirwe. Ebimu bikozesebwa omu mirimo ey’ekitiinisa kandi ebindi bikozesebwa omu mirimo etali y’ekitiinisa. 21 Nahabweki kakuba omuntu weena ayetantara ebintu ebikozesebwa omu mirimo etali y’ekitiinisa, naija kuba kintu* ekikozesebwa omu mirimo ey’ekitiinisa, ekyeziibwe, eky’omugaso hali mukama wakyo, kandi kiteekaniriziibwe buli mulimo gwona omurungi. 22 Iruka* okwegomba okw’obusigazi, baitu weekambe muno kuserra okuhikirra, okwikiriza, okugonza, obusinge, oli hamu n’abo abakunga Mukama baine omutima omwecumi.
23 Weetantale empaka ez’obudoma kandi ezitaine makuru, habwokuba okimanyire ngu zirugamu enkungani. 24 Habwokuba omwiru wa Mukama tasemeriire kukungana, baitu aba muculeezi* hali boona, naasobora kwegesa, naayetanga obu arukuba atwaziibwe kubi, 25 kandi naahana omu buculeezi abo abatarukuhurra. Obundi Ruhanga araabaha okwegarukamu,* beetegerereze kimu amananu, 26 basobole kwongera kwetegereza kurungi kandi baruge omu mutego gwa Sitaani,* habw’okurora ngu abakwasire nibarora nukwo bakole ebi arukugonza.