Ebbaruha ya Paulo Hali Abarooma
14 Mutangirre omuntu ow’acekere omu kwikiriza, baitu mutamucwera omusango habw’enteekereza ze ezirukwahukana.* 2 Omuntu omu aine okwikiriza okurukumusobozesa kulya buli kintu kyona, baitu omuntu omuceke omu kwikiriza alya emikubi kuruga omu bimera yonka. 3 Ogu ow’arukulya atagaya ogu ow’atarukulya, kandi ogu ow’atarukulya atacwera omusango ogu ow’arukulya, habwokuba Ruhanga amutangiriire. 4 Niiwe oha kucwera omuheereza w’ondi omusango? Mukama we nuwe acwamu obu araayemerra rundi obu araagwa. Amananu gali, naija kwemerra habwokuba Yahwe* naasobora kumukoonyera kwemerra.
5 Omuntu omu arora ekiro kimu nk’ekirukukira ekindi; kandi omuntu ondi akirora nk’ekirukwingana n’ebindi byona; leka buli muntu akigumize kimu ngu eki arukwikiririzaamu nikyo kihikire. 6 Ogu anyakukwata ekiro, akikwata habwa Yahwe.* Kandi ogu anyakulya, alya habwa Yahwe,* habwokuba asiima Ruhanga, kandi ow’atarukulya, talya habwa Yahwe,* baitu nabwo asiima Ruhanga. 7 Amananu gali, busaho n’omu omuli itwe anyakwomeera habwe wenka, kandi busaho anyakufa habwe wenka. 8 Habwokuba obu twomeera, twomeera habwa Yahwe,* kandi obu tufa, tufa habwa Yahwe.* Nahabweki obu twomeera rundi obu tufa, tuli ba Yahwe.* 9 Habw’ensonga egi Kristo akafa kandi yahumbuuka nukwo asobole kuba Mukama hali boona abafiire n’aboomeezi.
10 Baitu habwaki ocwera mugenzi waawe omusango? Rundi habwaki ogaya mugenzi waawe? Habwokuba itwena tulyemerra omu maiso g’entebe ya Ruhanga ey’okucweramu omusango.* 11 Habwokuba kikahandiikwa kiti: “‘Mananu kwo nkooku ndi mwomeezi,’ agambire Yahwe,* ‘buli kuju kuliteeza amaju omu maiso gange, kandi buli rulimi ruligamba ngu niinyowe Ruhanga.’” 12 Nahabweki, buli omu hali itwe alyetonganirra wenka omu maiso ga Ruhanga.
13 Nahabweki, leka tulekeraaho kucwerangana omusango, baitu tucweremu kimu kutateeka ekitabaijura kyona rundi enkonge omu maiso g’ow’oruganda. 14 Ninkimanya kandi ninkigumiza kimu omu Mukama waitu Yesu ngu busaho kintu ekitasemiire habwakyo; baitu kiba ekitasemiire hali ogu wenka arukuteekereza ngu tikisemiire. 15 Kakuba otabaijura ow’oruganda habw’ebyokulya byawe, nooba otakyagendera omu kugonza. Otahwerekereza* ogu Kristo ou yafeeriire habw’ebyokulya. 16 Nahabweki, otaikiriza ekirungi eki orukukora kubazibwaho nk’ekibi. 17 Habwokuba Obukama bwa Ruhanga tiburukumanyisa kulya hamu n’okunywa, baitu nibumanyisa okuhikirra, obusinge, hamu n’okusemererwa kuraba omu mwoyo ogurukwera. 18 Ogu weena ow’aheereza Kristo omu mulingo ogu, aikirizibwa Ruhanga kandi asiimwa abantu.
19 Nahabweki leka tukole* ebirukuleetaho obusinge n’ebintu ebiraatuleetera kwombekangana. 20 Muleke kusiisa omulimo gwa Ruhanga habw’ebyokulya. Mananu kwo ebintu byona bisemiire, baitu tikihikire* omuntu kubirya kakuba biba nibireetera abandi kutabaijuka. 21 Kirungi kutalya enyama rundi kunywa amaarwa rundi kukora ekintu kyona ekiraatabaijura ow’oruganda mugenzi waawe. 22 Okwikiriza oku oine, kwikaze kuli hagati yaawe na Ruhanga. Aine okusemererwa omuntu ow’ateecwera omusango habw’ekintu eki aba acwiremu kukora. 23 Baitu kakuba aba naagurukyagurukya, aba amazire kucwerwa omusango kakuba alya, habwokuba talya naasigikirra ha kwikiriza. Mananu kwo, habwokuba ekintu kyona ekitasigikirra ha kwikiriza kiba kibi.