Ebbaruha ya Paulo ey’Okubanza Hali Abakolinso
12 Ab’oruganda, ningonza mumanye ebirukukwata ha bisembo eby’omwoyo. 2 Mukimanyire ngu obu mukaba muli bantu ab’amahanga,* mwatwalirizibwaga kandi mwahabisibwaga ebisisani ebitarukubaza, nimubihondera hoona nambere byabatwaraga. 3 Hati ningonza mumanye ngu busaho muntu weena obu aba naabaza kuraba omu mwoyo gwa Ruhanga, agamba ati: “Yesu akyenerwe!” kandi busaho n’omu asobora kugamba ati: “Yesu nuwe Mukama!” rundi buli akoonyiirwe omwoyo ogurukwera.
4 Haroho ebisembo ebirukwahukana baitu haroho omwoyo gumu; 5 haroho obuheereza oburukwahukana, kandi haroho Mukama waitu omu; 6 haroho emirimo erukwahukana baitu Ruhanga ali omu ow’agikora yoona kuraba omu buli omu. 7 Baitu omwoyo gweyoleka omu buli omu habw’ekigendererwa eky’okugasira abandi. 8 Kuraba omu mwoyo, omu aheebwa ekisembo eky’okubaza ebigambo eby’amagezi,* kuraba omu mwoyo nugwo gumu, ondi aheebwa ekisembo eky’okubaza ebigambo eby’okumanya, 9 kuraba omu mwoyo nugwo gumu, ondi aheebwa okwikiriza, habw’omwoyo nugwo gumu, ondi aheebwa ekisembo eky’okukiza, 10 ondi eky’okukora ebyamahano, ondi eky’okubaza obunabbi, ondi eky’okwetegereza ebyatereekereziibwe, ondi eky’okubaza omu ndimi ezirukwahukana, ondi eky’okuhindura endimi. 11 Ebintu ebi byona bikorwa kuraba omu mwoyo nugwo gumu, nigugabira buli omu kusigikirra nkooku gurukugonza.
12 Nkooku omubiri guli gumu baitu gwine ebicweka bingi, kandi ebicweka byona eby’omubiri ogu noobu kiraaba ngu bingi, mubiri gumu, na Kristo na uwe nukwo ali ati. 13 Habw’omwoyo gumu, itwena tukabatizibwa omu mubiri gumu, ka babe Bayudaaya rundi Bayonaani, ka babe bairu rundi ab’obugabe, itwena tukanywisibwa omwoyo gumu.
14 Amananu gali, omubiri tiguroho ekicweka kimu, baitu guroho ebicweka bingi. 15 Kakuba ekigere kigamba kiti: “Habwokuba tindi mukono, tindi kicweka ky’omubiri,” eki tikikifoora kutaba kicweka ky’omubiri. 16 Kandi kakuba okutu kugamba kuti: “Habwokuba tindi liiso, tindi kicweka ky’omubiri,” eki tikikufoora kutaba kicweka ky’omubiri. 17 Kakuba omubiri gwona gukaba guli liiso, omuntu yaakukozeseze ki kuhurra? Kakuba gwona gukaba guli gw’okuhurra, omuntu yaakukozeseze ki kukaga? 18 Baitu buli kicweka ky’omubiri Ruhanga akakiteeka omu kiikaro kyakyo nkooku yagondeze.
19 Kakuba byona byabaire kicweka kimu, omubiri gwakubaire nkaha? 20 Biri bicweka bingi, baitu omubiri guli gumu. 21 Eriiso tirisobora kugambira omukono liti: “Tindukukwetaaga,” rundi omutwe tigusobora kugambira ekigere guti: “Tindukukwetaaga.” 22 Baitu ebicweka by’omubiri ebirukuzooka nk’ebiceke nibyetaagwa, 23 kandi ebicweka by’omubiri ebiturukuteekereza ngu by’ekitiinisa kike, tubiha ekitiinisa eky’amaani, ebicweka byaitu ebitukwasa ensoni, nibyo tukirayo kutwara omu mulingo ogw’ekitiinisa, 24 baitu ebicweka byaitu ebirukukirayo oburungi, tibyetaaga kintu kyona. Ruhanga nukwo yakozere ati omubiri, ebicweka ebitali by’ekitiinisa yabiha ekitiinisa ekirukukiraho, 25 nukwo hatabaho okwebaganizaamu omu mubiri baitu ebicweka byona bifeehongana. 26 Ekicweka kimu obu kibonabona, ebicweka ebindi byona bibonabonera hamu nakyo, rundi ekicweka kimu obu kiheebwa ekitiinisa, ebicweka ebindi byona bisemererwa hamu nakyo.
27 Hati, muli mubiri gwa Kristo kandi buli omu hali inywe, ali kicweka ky’omubiri ogu. 28 Kandi buli omu omu kitebe, Ruhanga amuhaire omulimo gwe: akabanza abakwenda; yayongeraho banabbi; yayongeraho abeegesa; hanyuma abarukukora ebyamahano; abaine ekisembo eky’okukiza; abarukukoonyera abandi; abaine obusobozi obw’okwebembera; n’abarukubaza endimi ezirukwahukana. 29 Boona bakwenda? Boona banabbi? Boona beegesa? Boona bakora ebyamahano? 30 Boona baine ekisembo eky’okukiza? Boona baine ekisembo eky’okubaza omu ndimi? Boona baine ekisembo eky’okuhindura endimi? 31 Mwikale nimwekamba kuserra ebisembo ebirukukiraho. Baitu nyowe niinyija kubooleka omuhanda ogurukukira yoona.