Ebbaruha ya Paulo ey’Okubanza Hali Abakolinso

4 Omuntu asemeriire kututwara nk’abaheereza ba Kristo kandi abakeeto b’ensita za Ruhanga ezirukwera. 2 Habw’ensonga enu, abakeeto nibanihirwa kusangwa bali beesigwa. 3 Hali nyowe tikiri kikuru muno kwekebiijibwa inywe rundi embuga z’ebiragiro* ez’abantu. Amananu gali ngu, na nyowe nyenka tinyekebera. 4 Habwokuba timmanyire ekintu kyona eki ndukujunaanwa. Baitu eki tikiri nikyo kirukugumya ngu ndi w’okuhikirra; ogu anyakunyekebiija ni Yahwe.* 5 Nahabweki, mutacwera omusango ekintu kyona ekiro kitakahikire, kuhikya Mukama waitu obu aliija. Alireeta ebintu eby’ensita eby’omu mwirima omu kyererezi, aleetere ebigendererwa eby’omu mutima kumanywa kandi hanyuma buli omu alitunga okusiimwa okumusemeriire kuruga hali Ruhanga.

6 Hati ab’oruganda, ebintu binu mbibalize* ninkozesa ekyokurorraho kyange n’ekya Apolo habw’oburungi bwanyu, nukwo kuraba omuli itwe musobole kwega ekiragiro kinu ekirukugamba kiti: “Mutahingura ha bintu ebyahandiikirwe,” nukwo mutaba b’emyehembo, omuntu omu nimumutwara nk’ow’arukukira ondi. 7 Nooha arukukufoora w’embaganiza ha muntu ondi? Mali, kiki eki oine eki otarahairwe? Kandi obu oraaba wakihairwe, habwaki nooyenyumiza* oti rundi otakiheebwe?

8 Mumazire ira kutunga byona ebi murukwetaaga? Mufookere ira baguuda? Mutandikire ira kulema nk’abakama, itwe tutali na inywe? Mali naakugondeze mube mutandikire kulema nk’abakama, nukwo na itwe tusobole kulema hamu na inywe nk’abakama. 9 Nikinzookera ngu, itwe abakwenda niitwe Ruhanga abaamaliriireyo kuteeka ha mwoleko nk’abantu abacweriirwe ogw’okufa, habwokuba tufookere eky’okusunga hali ensi, na hali bamalaika, na hali abantu. 10 Tuli badomadoma habwa Kristo, baitu inywe muli b’amagezi omu Kristo; tuli baceke, baitu inywe muli b’amaani; muteekwamu ekitiinisa baitu itwe nitugaywa. 11 Kuhikya n’akasumi kanu nitukyagumizaamu kurumwa enjara, kukwatwa iroho, kutaba n’ebijwaro,* kuteerwa, tutaine ahokwikara, 12 kandi tukora n’amaani nitukozesa emikono yaitu. Obu batujuma, tubagondeza emigisa; obu tuhiiganizibwa, tugumiisiriza; 13 obu batuhangirra, tugarukamu n’obuculeezi;* n’okuhikya hati tufookere nk’ebisasiro by’ensi kandi nk’ebirofu hali ebintu byona.

14 Nimbahandiikira ebintu binu hatali habw’okugonza kubaswaza, baitu kubateererra nk’abaana bange abagonzebwa. 15 Noobu kiraaba ngu nimusobora kuba mwine abeegesa* 10,000 omu Kristo, baitu timwine baisiinywe baingi; habwokuba omu Kristo Yesu nfookere isiinywe kuraba omu makuru amarungi. 16 Nahabweki nimbeekambisa mwegere hali nyowe. 17 Egi niyo ensonga habwaki nimbasindikira Timoseo, habwokuba nimmugonza muno kandi mwana wange omwesigwa omu Mukama waitu. Alibaijukya emikorre yange* omu Kristo Yesu nkooku nyegesa buli hamu hoona omu buli kitebe.

18 Abamu nibeehemba, oti rundi tindukwija nambere muli. 19 Baitu ndi haihi kwija nambere muli Yahwe* obu araagonza, kandi ndimanya amaani g’abo abaine emyehembo hatali ebigambo byabo. 20 Habwokuba Obukama bwa Ruhanga teri nsonga y’ebigambo kwonka, baitu amaani. 21 Hati inywe mwakugondeze ki? Nyije nambere muli n’omwigo, rundi n’okugonza hamu n’obuculeezi obw’omwoyo?