Ebikorwa by’Abakwenda
23 Paulo yarolerra ab’Orukurato Orukuru* kandi yagamba ati: “Basaija inywe, ab’oruganda, kuhikya n’akasumi kanu nyikaire nyine omuntu ow’omunda omurungi omu maiso ga Ruhanga.” 2 Nubwo nyakatagara omukuru* Ananiya yaragira abo abakaba beemeriire haihi na uwe kumuteera omunwa. 3 Hanyuma Paulo yamugambira ati: “Ruhanga naagenda kukuteera iwe ekisiika ekisiigirwe erangi erukwera. N’oikarra kuncwera omusango kusigikirra ha Biragiro, baitu ha murundi nugwo gumu noocwa Ebiragiro* obu nooragira banteere?” 4 Abo abakaba beemeriire nambere ali baagamba bati: “Noojuma nyakatagara omukuru owa Ruhanga?” 5 Paulo yagarukamu ati: “Ab’oruganda, mbaire ntakimanyire ngu ali nyakatagara omukuru. Habwokuba kikahandiikwa kiti: ‘Otalibazaaho kubi omulemi w’abantu baawe.’”
6 Baitu Paulo, obu yakimanyire ngu orubaju rumu rukaba rurumu Abasadukaayo, kandi orundi rurumu Abafalisaayo, yatokera haiguru omu Rukurato Orukuru ati: “Basaija inywe, ab’oruganda, na nyowe ndi Mufalisaayo, kandi ndi mutabani w’Abafalisaayo. Habwokuba ninnihirra omu kuhumbuuka kw’abafu, niyo ensonga habwaki nincwerwa omusango.” 7 Obu yabalize eki, haabaho okuteera empaka hagati y’Abafalisaayo n’Abasadukaayo* kandi orukurato rwayebaganizaamu. 8 Habwokuba Abasadukaayo bagamba ngu busaho kuhumbuuka, malaika rundi omwoyo, baitu Abafalisaayo byona nibabiikiriza.* 9 Haabaho akaimukirro ak’amaani kandi bamu h’abahandiiki ab’ekitebe ky’Abafalisaayo baimuka kandi baatandika kuteera muno empaka nibagamba bati: “Omusaija onu taine musango gwona, baitu omwoyo rundi malaika obu araaba abalize na uwe —.” 10 Empaka obu zaayeyongiire muno, omuduumizi w’amahe yatiina ngu nibasobora kutaagura Paulo, nahabweki yatuma abaserikale bagende bamwihe hagati yabo, bamuleete omu nkambi y’abaserikale.
11 Baitu kiro eki omu bwire bw’ekiro, Mukama waitu akamwemerra ha rubaju yamugambira ati: “Guma! Nkooku oikaire nompeera obwakaiso omu bwijwire omu Yerusaalemu, n’omu Rooma naho osemeriire kumpeerayo obwakaiso.”
12 Obwire obu bwakiire, Abayudaaya baayekoba kandi baarahira ekirahiro ngu bakyenwe* kakuba balya rundi banywa batakaisire Paulo. 13 Hakaba haroho abasaija abarukuhingura omu 40 abaakozere ekirahiro kinu eky’okwekoba. 14 Abasaija abo bakagenda hali bakuru ba banyakatagara* hamu n’abakuru b’abantu baabagambira bati: “Turahiire ngu tukyenwe kakuba tulya ekintu kyona tutakaisire Paulo. 15 Nahabweki inywe inywena hamu n’ab’omu Rukurato Orukuru mugambire omuduumizi w’amahe amubaleetere, mwefoole ngu nimugonza kwongera kwekebiija omu bwijwire omusango gwe. Baitu obu araaba atakairiire haihi, nitwija kuba tweteekaniize kumwita.”
16 Baitu mutabani wa munyaanya Paulo obu yahuliire eki bakaba bateekaniize kukora, yataaha omu nkambi y’abaserikale yagambira Paulo. 17 Paulo yayeta omu h’abakuru b’abaserikale, yamugambira ati: “Twara omusigazi onu hali omuduumizi w’amahe, habwokuba aine eki arukugonza kumugambira.” 18 Yamutwara nambere omuduumizi w’amahe ali, kandi yagamba ati: “Paulo omunyankomo anyesere kandi yansaba nkuleetere omusigazi onu habwokuba aine eki arukugonza kukugambira.” 19 Omuduumizi w’amahe yamukwata ha mukono yamutwara ha rubaju bali bonka kandi yamukaguza ati: “Kiki eki orukugonza kungambira?” 20 Omusigazi yagamba ati: “Abayudaaya baragaine kukusaba kuleeta Paulo omu Rukurato Orukuru nyenkya, nibeefoora nk’abarukugonza kumanya ebirukukiraho ebirukukwata ha musango gwe. 21 Baitu otabaikiriza bakakusoonasoona habwokuba abasaija baabo abarukuhingura omu 40, beeteekaniize kumutega kandi barahiire ngu bakyenwe kakuba balya rundi bakanywa batakamwisire; kandi hati beeteekaniize balindiriire eki oraabaraganiza.” 22 Nahabweki omuduumizi w’amahe yaleka omusigazi yagenda hanyuma y’okumuragira ati: “Otagira omuntu weena ou wagambira ngu ongambiire.”
23 Nubwo yayeta abaserikale babiri kandi yabagambira ati: “Muteekanize abaserikale 200, n’abasaija b’embaraasi 70 hamu n’ab’amacumu 200 kugenda Kaisaliya saaha isatu ez’ekiro.* 24 Ekindi, muhe Paulo embaraasi ei araagenderaho kurungi kuhika omwa Ferikisi omulemi.” 25 Kandi yahandiika ebbaruha ey’erumu ebigambo binu:
26 “Nyowe Kurawudiyo Lusiya, ninkuramukya ow’Ekitiinisa, Omulemi Ferikisi! 27 Omusaija onu akakwatwa Abayudaaya kandi bakaba bali haihi kumwita, baitu nkarahuka bwangu naija n’abaserikale bange twamujuna habwokuba nkakimanya ngu Murooma. 28 Kandi habwokuba nkagonza kumanya eki barukumujunaana, nkamuleeta omu Rukurato rwabo Orukuru. 29 Nkakizoora ngu bakaba nibamujunaana ebirukukwata ha Biragiro byabo baitu busaho na kimu eki bakaba nibamujunaana ekikaba kisemeriire kumuleetera kwitwa rundi kuteekwa omu nkomo. 30 Baitu habwokuba mmanyisiibwe ha nteekaniza ey’okugonza kwita omusaija onu, nimmukusindikira omu bwangu kandi nindagira abarukumujunaana baije nambere oli bamujunaanire omu maiso gaawe.”
31 Nubwo abaserikale baatwara Paulo nkooku baaragiirwe, baamuleeta omu bwire bw’ekiro omu Antipatiri. 32 Ekiro ekyahondiireho, baikiriza abasaija b’embaraasi kugenda na uwe baitu bo baagaruka omu nkambi ey’abaserikale. 33 Abasaija b’embaraasi baahika Kaisaliya baaha omulemi ebbaruha kandi baamukwasa na Paulo. 34 Yagisoma kandi yamukaguza isaza ki eri akaba naarugamu kandi yakimanya ngu akaba naaruga Kirikiya. 35 Yamugambira ati: “Niinyija kukuhuliiriza kurungi, abarukukujunaana obu baraija.” Kandi yaragira ngu bamulindire omu kikaali kya Herodi.