Ebbaruha ya Paulo eya Kabiri Hali Abasesalonika
3 Eky’okumalirra, ab’oruganda, mugumizeemu nimutusabira nukwo ekigambo kya Yahwe* kisobole kugumizaamu nikiraranga omu bwangu kandi kinyumizibwe nkooku kiri omuli inywe, 2 kandi tusobole kujunwa kuruga hali abantu ababi kandi abaakabi, habwokuba okwikiriza tikuli kw’abantu boona. 3 Baitu Mukama waitu mwesigwa, naija kubagumya kandi abalinde hali omubi. 4 Ekindi, nitubeesiga omu Mukama waitu ngu muliyo nimukora ebi twabaragiire kandi nimwija kugumizaamu nimubikora. 5 Leka Mukama waitu agumizeemu kuhabura kurungi emitima yanyu, muhike omu kugonza kwa Ruhanga kandi mugumiisirize habwa Kristo.
6 Hati ab’oruganda, nitubaha oburagirizi omu ibara lya Mukama waitu Yesu Kristo, kwecwaho ow’oruganda weena atarukwetwaza* kurungi, kandi atarukworobera oburagirizi obu mwatungire kuruga hali itwe. 7 Inywe inywenka mumanyire omulingo musemeriire kwegera hali itwe, habwokuba tuteetwaze omu mulingo ogutahikire obu tukaba tuli na inywe, 8 kandi tutalye ebyokulya by’omuntu weena habwa busa.* Baitu twakoraga muno kandi nitutalibana nyamusana n’ekiro nukwo hatabaho omuntu weena ou twayetwekesa omugugu ogw’okuturolerra. 9 Tikiri ngu itwe titwine busobozi, baitu tukakora tuti nukwo tubateereho ekyokurorraho eki muraahondera. 10 Amananu gali, obu tukaba tuli na inywe, twabaragiraga tuti: “Omuntu weena atarukugonza kukora, n’okulya atalya.” 11 Habwokuba nituhurra ngu abamu omuli inywe nibeetwaza omu mulingo ogutahikire, tibarukukora omulimo gwona baitu nibeetaahya omu nsonga ezitarukubakwataho. 12 Abantu nk’abo nitubaragira kandi nitubateererra omu Mukama waitu Yesu Kristo ngu bakole emirimo yabo batarukwetaahya omu nsonga ezitarukubakwataho kandi balye ebyokulya ebi bakoleriire.
13 Baitu inywe ab’oruganda, mutalijwaha* kukora ebirungi. 14 Kakuba omuntu weena ayanga kworobera ebigambo ebiri omu bbaruha enu, mumwikazeeho eriiso kandi muleke kukoragana na uwe nukwo aswale. 15 Baitu mutamurora nk’omunyanzigwa, oihireho mugumizeemu nimumuhabura nk’ow’oruganda.
16 Leka Mukama waitu ow’obusinge aikale naabaha obusinge omu byona. Kandi aikale na inywe inywena.
17 Nyowe Paulo, mpandiikire okuramukya kunu n’omukono gwange kandi nuko akokurorraho omu buli bbaruha yange; gunu nugwo omulingo mpandiikamu.
18 Embabazi enyingi muno* eza Mukama waitu Yesu Kristo zibe na inywe inywena.