Ebbaruha ya Paulo Hali Tito
1 Nyowe Paulo, omwiru wa Ruhanga kandi omukwenda wa Yesu Kristo kusigikirra ha kwikiriza kw’abakomerwemu ba Ruhanga n’okumanya okuhikire okw’amananu, okurukusigikirra ha kwemarra hali Ruhanga* 2 hamu n’okunihira okurukusigikirra ha bwomeezi obutahwaho, Ruhanga ow’atasobora kubiiha obu yaraganiize ira muno; 3 baitu akasumi aka akaba ataireho obu kaahikire, akamanyisa ekigambo kye kuraba omu mulimo ogw’okutebeza ogu yankwasize kusigikirra ha kiragiro kya Ruhanga Omujuni waitu; 4 nimpandiikira Tito omwana wange mali kusigikirra ha kwikiriza oku turukubagana hamu:
Embabazi enyingi muno* hamu n’obusinge ebiruga hali Ruhanga Isiitwe hamu na Kristo Yesu Omujuni waitu, bibe na iwe.
5 Nkakusiga Kulete nukwo osobole kutereekereza ebintu ebikaba bitatereekeriire* kandi okome abagurusi omu buli rubuga, nkooku nakuragiire: 6 Omugurusi asemeriire kuba* ataine kintu kyona eki arukujunaanwa, aine omukazi omu, aine abaana abaikiriza abatarukubazibwaho ngu baine engeso embi rundi ngu ntahurra. 7 Habwokuba omukeeto wa Ruhanga, omuroleerezi tasemeriire kuba aine eki arukujunaanwa; asemeriire kuba muntu atarukwegondeza wenka,* atarukubiihirwa bwangu, atali mutamiizi, atarukurwana, ataine omururu ogw’okwetungira ebintu omu mulingo ogutahikire, 8 baitu asemeriire kuba ow’amakune, arukugonza oburungi, arukwetegereza kurungi,* ow’okuhikirra, omwesigwa, arukwetanga, 9 arukugumira ha kigambo ekirukwesigwa* obu arukuba naayegesa, nukwo asobole kugarramu abandi amaani* kuraba omu kubeegesa enyegesa ez’omugaso, n’okuhana abo abazihakaniza.
10 Habwokuba haroho abajeemu baingi, abarukubaza ebitaine mugaso, abarukubiiha ebisuba, kukira muno abo abagumira ha kusarwa.* 11 Basemeriire kuculeezebwa habwokuba abantu banu bonyini baikara nibasiisa amaka kuraba omu kwegesa ebintu ebi batasemeriire kwegesa, habw’okugonza kwetungira ebintu omu mulingo ogw’obugobya. 12 Omu hali bo, nabbi wabo akagamba ati: “Abakulete baikara nibabiiha ebisuba, bali nyamaiswa ez’akabi muno, bagara kandi bagonza kulya ekihinguraine.”
13 Obwakaiso bunu bw’amananu. Habw’ensonga enu, ikara noobahana muno okwikiriza kwabo kusobole kuguma* 14 baleke kuta omutima ha nganikyo ez’Ekiyudaaya ez’ebisuba n’ebiragiro by’abantu abaruga omu mananu. 15 Ebintu byona biba byecumi h’abantu abeecumi; baitu hali abo abatali beecumi kandi abataine okwikiriza, busaho ekiri kyecumi habwokuba ebiteekerezo byabo n’omuntu wabo ow’omunda tibiri byecumi. 16 Omu rwijwire rw’abantu bagamba ngu bamanyire Ruhanga, baitu bamwehakana kuraba omu bikorwa byabo habwokuba bali binugwa, ntahurra, kandi tibasemeriire omulimo omurungi ogwa buli mulingo.