Ebikorwa by’Abakwenda
21 Hanyuma y’okubarugaho, twayambuka enyanja tuteemeriire ahantu hoona, twahika Koosi. Ekiro ekyahondiireho twagenda Rodo, kandi obu twarugire oku, twagenda Patara. 2 Obu twasangireho emeeri erukugenda Foinikiya, twagiikarramu twagenda. 3 Obu twalengiire ekizinga kya Kupuro, twakirabaho kiri ha rubaju orw’emoso,* twagumizaamu Siriya kandi twahika Tuuro, nambere emeeri yayemeriire kwihaho emigugu. 4 Twaserra abeegeswa twabazoora kandi twaikarayo kumara ebiro musanju. Baitu hanyuma y’okumanyisibwa omwoyo ogurukwera, baikara nibagambira Paulo kutarubata omu Yerusaalemu. 5 Obwire obw’okurugayo obu bwahikire, twarugayo twatandika orugendo rwaitu. Baitu boona, otwaliiremu abakazi n’abaana, baatusendekereza kuhikya obu twahikire aheeru y’orubuga. Nubwo twateeza amaju ha musa gw’enyanja, twasaba 6 kandi hanyuma twaragangana. Itwe twatemba emeeri, kandi bo baagaruka omu maka gaabo.
7 Obu twamazire orugendo rwaitu kuruga Tuuro, twahika Potolemayi, twaramukya ab’oruganda kandi twaikara na bo ekiro kimu. 8 Ekiro ekyahondiireho twarugayo twaija Kaisaliya, kandi twataaha omu nju ya Firipo omutebezi w’enjiri, ow’akaba ali omu h’abasaija musanju,* kandi twaikara na uwe. 9 Omusaija onu akaba aine bahara be bbana abakaba bataswirwe* abaarangaga obunabbi. 10 Hanyuma y’okumarayo ebiro, nabbi arukwetwa Agabo yasirimuka kuruga Buyudaaya. 11 Obu yahikire nambere tuli, yakwata omweko gwa Paulo yagwebohesa emikono n’ebigere, yagamba ati: “Kinu nikyo omwoyo ogurukwera gugambire: ‘Abayudaaya nukwo barukwija kuboha bati mukama w’omweko gunu omu Yerusaalemu, kandi balimuhayo omu mikono y’abantu ab’amahanga.’” 12 Obu twahuliire eki, itwe n’abandi abakaba baroho twatandika kwesengereza Paulo atagenda Yerusaalemu. 13 Baitu uwe yagarukamu ati: “Habwaki nimurra kandi nimulengaho kundemesa kukora eki ncwiremu kukora?* Mukimanye ngu tinyeteekaniize kubohwa kwonka baitu n’okufeera omu Yerusaalemu habw’ibara lya Mukama waitu Yesu.” 14 Obu twalemerwe kuhindura enteekereza ye, twakirugaho* kandi twagamba tuti: “Yahwe* eki arukugonza leka nikyo kikorwe.”
15 Hanyuma y’ebiro ebi, tukeeteekaniriza orugendo, hanyuma twatandika kugenda Yerusaalemu. 16 Abeegeswa abamu kuruga Kaisaliya bakagenda na itwe, baatutwara omu ka ya Minasooni owa Kupuro, omu h’abeegeswa abaabandize kandi nuho tukaba nitugenda kuraara. 17 Obu twahikire Yerusaalemu, ab’oruganda baatutangirra n’okusemererwa. 18 Baitu ekiro ekyahondiireho, Paulo yagenda na itwe omwa Yakobbo, kandi abagurusi boona bakaba baroho. 19 Yabaramukya kandi yatandika kubasoborra omu bwijwire ebintu Ruhanga ebi yakozere omu b’amahanga kuraba omu buheereza bwe.
20 Obu baahuliire ebi, baatandika kukugiza Ruhanga, baitu baamugambira bati: “Ow’oruganda, noorora nkooku omu Bayudaaya harumu enkumi n’enkumi ez’abaikiriza, kandi boona nibeekambira Ebiragiro.* 21 Baitu bahuliire orugambo ngu oikaire nooyegesa Abayudaaya abali omu mahanga kuleka kuhondera Ebiragiro bya Musa, obu noobagambira kutasara abaana baabo n’okuleka kuhondera emigenzo. 22 Hati, kinu tukikorre ki? Nibagenda kukihurra ngu oizire. 23 Nahabweki, kora eki turaakugambira: Twine abasaija bbana abarahiire. 24 Twara abasaija banu oyeyeze hamu na bo kandi obasasurre nukwo babamwe isoke. Nubwo boona baraamanya ngu ebi barukukuhurraho tigali mananu baitu ngu nooyetwaza kurungi kandi nooyorobera Ebiragiro. 25 Kandi abaikiriza kuruga omu b’amahanga, tukabasindikira ebbaruha nitubamanyisa encwamu yaitu ngu basemeriire kwetantara ebihongiirwe ebisisani, esagama, ebinigirwe,* hamu n’obusiihani.”*
26 Ekiro ekyahondiireho, Paulo yatwara abasaija kandi yayeyeza hamu na bo, yataaha omu yekaru kumanyisa ebiro eby’okweyeza obu byakuhoireho, kandi ekihongwa ekya buli omu hali bo obu kyakuhairweyo.
27 Ebiro musanju obu bikaba biri haihi kuhwaho, Abayudaaya kuruga Asiya obu baamurozere omu yekaru, baimukiriza ekitebe ky’abantu baamukwata, 28 kandi baatokera haiguru bati: “Abasaija ba Isaleeri, mutukoonyere! Onu nuwe omusaija arukwegesa buli omu kandi buli hamu naabazaaho kubi abantu baitu, Ebiragiro byaitu, n’ekiikaro kinu. Ekindi, alesere Abayonaani omu yekaru kandi yasiisa ekiikaro kinu ekirukwera.” 29 Bakabaza ebi, habwokuba bakaba bamurozere ali hamu na Tirofimo Omunyefeeso, kandi bakateekereza ngu Paulo akaba amutaahize omu yekaru. 30 Nubwo orubuga rwona rwabamu akaimukirro, kandi abantu baija nibairuka baagwera Paulo, baamusika baamuturukya aheeru ya yekaru kandi ahonaaho baakinga enyigi. 31 Obu bakaba nibalengaho kumwita, amakuru gaahika hali omuduumizi ow’ekihanda ky’ihe ngu Yerusaalemu yoona erumu akajagarro; 32 kandi ahonaaho yatwara abaserikale n’abakuru b’amahe kandi bairuka baija hali abantu. Obu baarozere omuduumizi w’amahe hamu n’abaserikale, baaleka kuteera Paulo.
33 Omuduumizi w’amahe yairra haihi, yaiha Paulo omu bantu kandi yaragira abohwe n’enjegere ibiri; hanyuma yakaguza ibara lye n’eki akaba akozere. 34 Baitu abamu kuruga omu kitebe, baatandika kutoka buli omu naabaza ekye. Obu yalemerwe kwetegereza ekintu kyona habw’abantu kutoka, yaragira bamuleete omu nkambi y’abaserikale. 35 Baitu obu yahikire h’amatembero, abaserikale baamuhimba habw’abantu kweyongera kutabuka, 36 habwokuba ekitebe ky’abantu bakaikara nibabahondera nibatokera haiguru bati: “Mumwite!”
37 Obu bakaba bali haihi kumuhikya omu nkambi y’abaserikale, Paulo yagambira omuduumizi w’amahe ati: “Nonyikiriza ngire eki nakugambira?” Omuduumizi w’amahe yamukaguza ati: “Omanyire Oruyonaani? 38 Tali niiwe Omunyamisiri omu bwire obw’enyumaho ayaleetiire abantu kuba abeemi kandi watwara abasaija 4,000 abaisi omu irungu?” 39 Baitu Paulo yagamba ati: “Amananu gali, nyowe ndi Muyudaaya, owa Taruso omu Kirikiya, orubuga orumanyirwe muno. Nkwesengeriize, nyikiriza mbazeeho n’abantu.” 40 Hanyuma y’okumwikiriza, Paulo yayemerra h’amatembero, yaculeeza abantu n’omukono gwe. Obu baamazire kuculeera, yabaza na bo omu Ruhebburaniya, naagamba ati: