Ebbaruha ya Paulo eya Kabiri Hali Abakolinso

7 Nahabweki abagonzebwa, nkooku twine emirago enu, leka tweyogyeho byona ebisiisa omubiri n’omwoyo, nukwo tweyongere kuba abarukwera* omu kutiina Ruhanga.

2 Mututungire ekiikaro omu mitima yanyu. Titusobiize omuntu weena, busaho n’omu ou tusiisiire, tutabiihebiihe muntu weena habw’okugonza kwegasira. 3 Tindukubaza binu kubajunaana. Nkasangwa nkibagambiire ngu muli omu mitima yaitu nukwo tufe hamu kandi twomeere hamu. 4 Nimbaza na inywe ntaine ekintu kyona eki ndukutiina. Nimbeesiimisa muno, nyijwire okuhuumuzibwa; nyijwire okusemererwa omu kubonabona kwaitu kwona.

5 Amananu gali, obu twahikire omu Makedoni, emibiri yaitu etahuumule, baitu tukagumizaamu nitubonabona omu miringo yoona—hakabaho kurwana aheeru, kandi omunda harumu okutiina. 6 Baitu Ruhanga ow’ahuumuza abo abahoirwemu amaani, akatuhuumuza kuraba omu kubaho kwa Tito; 7 hatali habw’okubaho kwe kyonka, baitu kuraba n’omu kuhuumuzibwa oku yatungire habwanyu, habwokuba obu yagarukire akatugambira omulingo mwine ekihika eky’amaani eky’okundora, okusaasa kwanyu okw’amaani, n’omulingo murukunfaaho muno;* nahabweki nkeeyongera kusemererwa.

8 Noobu kiraaba ngu ebbaruha ei nabahandiikiire ekabasaaliza, tindukukyeijukya. Noobu kiraaba ngu ha kubanza nkakyeijukya (obu narozere ngu ebbaruha egi ekabasaaliza, baitu habw’akasumi kake), 9 hati nsemeriirwe hatali ngu mukasaasa, baitu habwokuba mukasaasa kyabaleetera kwegarukamu. Mukasaasa omu mulingo Ruhanga arukugonza, nukwo mutahikwaho akabi habwaitu. 10 Habwokuba kusaasa omu mulingo Ruhanga arukugonza kirugamu kwegarukamu, okuhikya omu kujunwa kandi tikuleetera omuntu kweijukya, baitu okusaasa okw’ensi kurugamu okufa. 11 Murole nkooku okusaalirwa omu mulingo Ruhanga agonza kwabeekambisize kukora binu, ego, mukatereekereza ebisobere, ego, kubiihirwa, ego, kutiina Ruhanga, ego, kugonza muno kwegarukamu, ego, kwekamba, ego, kutereekereza ensobi! Omu buli mulingo mukooleka ngu muli abarukwera omu nsonga enu. 12 Noobu kiraaba ngu nkabahandiikira, ntakikole habw’ogu ayakozere ekibi, noobu kwakuba habw’ogu ou baasobiize, baitu nkakikora nukwo okwekamba kwanyu habwaitu kweyoleke omuli inywe omu maiso ga Ruhanga. 13 Egi niyo ensonga habwaki twahuumuziibwe.

Kwongerra ha kuhuumuzibwa kwaitu, tukeeyongera kusemererwa muno habw’okusemererwa Tito oku yatungire, habwokuba inywena mukahuumuza omwoyo* gwe. 14 Obu ndaaba nabeesiimisize omu maiso ge, ntaswale; baitu nkooku ebintu byona ebi twabagambiire gakaba gali mananu n’okubeesiimisa kwaitu hali Tito kubaire kw’amananu. 15 Kandi okugonza kwe hali inywe kwingi muno obu arukwijuka obuhulizi bwanyu inywena, n’omu mulingo mwamutangiriiremu omu kutiina n’omu kutukumira. 16 Nsemeriirwe ngu ninsobora kubeesiga* omu buli kimu.