Ebbaruha ya Paulo Hali Abefeeso
3 Habw’ensonga enu, nyowe Paulo, omunyankomo wa Kristo Yesu habwanyu, n’abantu ab’amahanga— 2 mali obu muraaba mwahuliire ebirukukwata ha bukeeto bw’embabazi za Ruhanga enyingi muno,* obwampairwe habwanyu, 3 ngu kuraba omu kusuukururwa ensita erukwera* ekammanyisibwa, nkooku nasangirwe mbahandiikiire omu bugufu. 4 Obu muraasoma binu, nimwija kumanya okwetegereza kwange okw’ensita erukwera eya Kristo. 5 Abaana b’abantu ab’obusinge obundi batamanyisibwe ensita enu nkooku esuukuliirwe abakwenda be abarukwera, na banabbi kuraba omu mwoyo, 6 ensita enu niyo ngu, abantu ab’amahanga, bali omu bumu na Kristo Yesu kandi kuraba omu makuru amarungi babe bagwetwa, babe kicweka ky’omubiri kandi babagane na itwe omu murago. 7 Nkafooka omuheereza ow’ensita enu erukwera kusigikirra ha kisembo kya Ruhanga eky’embabazi enyingi muno ezampairwe kuraba omu maani ge.
8 Nyowe, omusaija ow’arukukirayo kuba owa hansi omu barukwera boona, nkoolekwa embabazi zinu enyingi muno, nukwo nsobole kurangirra hali amahanga amakuru amarungi agarukukwata ha buguuda bwa Kristo obutazoorwa 9 kandi nsobozese buli omu kurora enteekaniza ey’ensita ey’erukwera eyaserekerwe kumara akasumi akaraihire omuli Ruhanga, ayahangire ebintu byona. 10 Kinu kikabaho nukwo, kuraba omu kitebe, amagezi ga Ruhanga ageeyoleka omu miringo erukwahukana gamanyisibwe hali obulemi, n’obusobozi ebiri omu biikaro eby’omu iguru. 11 Kinu nikisigikirra ha kigendererwa ekitahwaho eki yataireho ekirukukwata ha Kristo Yesu Mukama waitu, 12 kuraba omuli uwe, nitubaza tutarukutiina, kandi nitumuhikirra tutarukutiina kuraba omu kumwikiririzaamu. 13 Nahabweki, nimbasaba kutajwaha habw’emihito yange habwanyu, habwokuba emihito enu, neemanyisa ekitiinisa habwanyu.
14 Habw’ensonga egi, ninteereza Isiitwe amaju, 15 hali ogu buli ka omu iguru n’omu nsi nambere iha ibara. 16 Ninsaba Ruhanga kuraba omu kitiinisa kye ekingi, abagumye habw’eki eki muli omunda, naakozesa amaani ge kuraba omu mwoyo gwe, 17 kandi ngu kuraba omu kwikiriza kwanyu musobole kwikara na Kristo omu mitima yanyu mwine okugonza. Muhamire kimu kandi mugumibwe ha musingi, 18 nukwo inywe n’abarukwera boona musobole kwetegerereza kimu okugaliha, obukooto, oburaiha n’okuhama, 19 kandi mumanye okugonza kwa Kristo okurukukira okumanya, nukwo musobole kwijura emiringo yoona Ruhanga ei aha.
20 Hati, ogu ow’asobora kukora ebirukukirra kimu hali ebi, ebi tusaba rundi ebi tuteekereza, naasigikirra h’amaani ge agarukukorra omuli itwe, 21 aheebwe ekitiinisa kuraba omu kitebe n’omu Kristo Yesu, obusinge bwona ebiro n’ebiro. Amiina.