Ebikorwa by’Abakwenda
17 Nubwo baaraba Anfipoli n’Apoloniya, baija Sesalonika nambere isorrokaniro ly’Abayudaaya likaba liri. 2 Nkooku ekaba eri ngeso ya Paulo, yataaha omunda nambere bakaba bali, kandi kumara Sabbiiti isatu yahingisaniza na bo ebiteekerezo kuruga omu Byahandiikirwe, 3 naasoborra kandi naajuliza ngu kikaba nikyetaagisa Kristo kubonabona n’okuhumbuurwa omu bafu, naagamba ati: “Onu nuwe Kristo, kandi Yesu onu nuwe ndiyo nimbatebezaaho.” 4 Ekyarugiremu, abamu bakafooka baikiriza baayeteeranizaaho Paulo na Siira kandi n’Abayonaani baingi abaaramyaga Ruhanga, hamu n’abakazi baingi ab’ekitiinisa.
5 Baitu Abayudaaya habw’okukwatwa ihali, baasorooza abasaija abamu ababi abakaba nibandaara omu katale baakora ekitebe kandi baaleetaho akaimukirro omu rubuga. Baatahirra enju ya Yasoni kandi bakaba nibagonza kuturukya Paulo na Siira babaleete aheeru omu kitebe ky’abantu. 6 Obu basangire bataliyo, baakurra Yasoni n’abamu h’ab’oruganda baabaleeta hali abalemi b’orubuga, nibatokera haiguru bati: “Abasaija banu abarukuleeta buli hamu akaimukirro omu nsi, bahikire na hanu, 7 kandi Yasoni abaraaliize kuba bagenyi be. Abasaija banu boona nibahakaniza ebiragiro bya Kaisaali, nibagamba ngu haroho omukama ondi, Yesu.” 8 Ekitebe ky’abantu n’abakuru b’orubuga obu baahuliire ebintu binu, baatiina; 9 kandi obu baamazire kusasuza Yasoni n’abandi omusimbo,* baabalekera baagenda.
10 Obwire obu bwaizire, ahonaaho ab’oruganda baasindika Paulo na Siira kugenda Bberoya. Obu baahikireyo baagenda omu isorrokaniro ly’Abayudaaya. 11 Banu bakaba nibagonza muno kwega kukira ab’omu Sesalonika, habwokuba bakaikiriza bwangu ekigambo n’ekihika kingi kandi baayekebiijaga Ebyahandiikirwe buli kiro n’obwegendereza kurora ebi bahuliire obu garaaba gali mananu. 12 Nahabweki baingi bakafooka baikiriza, otwaliiremu abakazi baingi Abayonaani ab’ekitiinisa n’abasaija abamu. 13 Baitu Abayudaaya kuruga Sesalonika obu baakimanyire ngu Paulo naatebeza ekigambo kya Ruhanga n’omu Bberoya, bakaija kuhembamu ebitebe by’abantu omurro n’okubatabangura. 14 Kandi ahonaaho ab’oruganda baasindika Paulo kugenda ha nyanja, baitu Siira na Timoseo baasigarayo. 15 Baitu abo abakaba basendekeriize Paulo baamuleeta baamuhikiza kimu Asene, kandi hanyuma ya Paulo kubagambira ngu Siira na Timoseo baije nambere ali omu bwangu, baagenda.
16 Paulo obu akaba ali omu Asene abalinzire, yasaasa muno habw’okurora orubuga rwijwiremu ebisisani.* 17 Nahabweki yatandika kuhingisaniza ebiteekerezo n’Abayudaaya hamu n’abantu abandi abaaramyaga Ruhanga omu isorrokaniro, kandi buli kiro yahingisanizaaga ebiteekerezo n’abantu abaabaga omu katale. 18 Baitu bamu h’abafirosoofa Abepikuliyo* n’Abasitoiko, baatandika kumuhakaniza kandi abamu bakaba nibagamba bati: “Omusaija onu arukubaza ebitarumu amagezi naagonza kutugambira ki?” Abandi baagamba bati: “Nikizooka naatebezaaho baruhanga abatali baakunu.” Bakabaza binu habwokuba akaba naabazaaho amakuru amarungi agarukukwata hali Yesu hamu n’okuhumbuuka. 19 Nahabweki, baamukwata ha mukono baamutwara omu Aleopago* nibagamba bati: “Noosobora kutusoborra enyegesa empyaka ei orukubazaaho? 20 Habwokuba obalize ebintu ebimu ebi tutakahurraga omu matu gaitu kandi nitugonza kumanya ebintu binu nibimanyisa ki.” 21 Amananu gali, abantu b’Asene boona n’abanyamahanga abaikaramuga,* obu baabaga bataine ekintu ekindi kyona eky’okukora, baabaga nibagambirangana rundi nibahuliiriza ekintu ekihyaka. 22 Nubwo Paulo yayemerra hagati y’Aleopago, yagamba ati:
“Abasaija b’Asene, nkyetegeriize ngu nimutiina baruhanga* kukira abantu abandi. 23 Ekyokurorraho, obu mbaire nindabamu nindora n’obwegendereza ebintu ebi murukukozesa omu kuramya, ndozere n’ekyoto* ekihandiikirweho kiti: ‘Ruhanga ow’Atamanyirwe.’ Nahabweki ogu ou murukuramya mutamanyire nuwe ndukubatebezaaho. 24 Ruhanga ayakozere ensi n’ebintu byona ebigirumu, nkooku nuwe Mukama w’iguru n’ensi, taikara omu yekaru ezikozerwe emikono; 25 kandi tarukwetaaga abantu kumukoonyera, oti rundi aine eki arukwetaaga habwokuba nuwe aha abantu boona obwomeezi, orwoya orw’okwikya, n’ebintu byona. 26 Kandi akakora kuruga omu muntu omu abantu ab’amahanga goona nukwo baikale omu nsi yoona, kandi ebintu bingi akabiteeraho obwire n’abantu yabateeraho emitaano nambere basemeriire kwikara, 27 nukwo basobole kuserra Ruhanga, kakuba beekamba* kumuserra nibaija kumuzoora habwokuba tali hara na buli omu hali itwe. 28 Habwokuba habwe, twine obwomeezi, nitugenda kandi turoho, kandi nkooku n’abahandiiki baanyu baagambire bati: ‘Na itwe tuli baana be.’*
29 “Nahabweki, nkooku tuli abaana ba* Ruhanga, titusemeriire kuteekereza ngu Ruhanga ali nk’ezaabbu, efeeza, rundi ibaale rundi ekintu ekiheeserwe kusigikirra h’amagezi g’abantu. 30 Ky’amananu ngu Ruhanga kumara akasumi, aikaire aitiire eriiso obutamanya nk’obu, baitu hati naagambira abantu boona nambere bali ngu beegarukemu. 31 Habwokuba ataireho ekiro obu alicwera ensi omusango ogw’okuhikirra naaraba omu muntu ou akomere, kandi ahaire abantu boona ekirukukigumya ngu eki nikiija kubaho, kuraba omu kumuhumbuura omu bafu.”
32 Obu baahuliire ha kuhumbuuka kw’abafu, abamu baatandika kumusekeereza kandi abandi baagamba bati: “Turaakuhurra omurundi ogundi noobazaaho ensonga enu.” 33 Paulo yabarugaho, 34 baitu abantu abamu baamweteeranizaaho baafooka baikiriza. Omuli banu hakaba harumu, Diyonisiyo, ow’akaba ali mucwi w’emisango omu kooti ey’Aleopago, hamu n’omukazi arukwetwa Damali, hamu n’abandi.