Ebbaruha ya Paulo Hali Abarooma
16 Nimbanjurra munyaanya itwe Foibe, arukuheereza omu kitebe ekiri Kenkereya, 2 nukwo musobole kumutangirra omu Mukama waitu omu mulingo ogusemeriire abarukwera kandi mumuhe n’obukoonyezi bwona obu asobora kuba naayetaaga, habwokuba akarwanirra baingi, otwaliiremu na nyowe.
3 Mundamukize Purisika na Akura, abakozi bagenzi bange omu Kristo Yesu, 4 abaataire obwomeezi bwabo omu kabi habwange, kandi tali niinyowe nyenka arukubasiima, baitu n’ebitebe byona eby’omu mahanga nibisiima. 5 Kandi muramukye n’ekitebe* ekisorrokanira omu nju yabo. Muramukye Epaineto ou ndukugonza muno, omu h’abaabandize kufooka bahondezi ba Kristo omu Asiya. 6 Muramukye Malyamu, ayakozere n’amaani habwanyu. 7 Muramukye Anduroniko hamu na Yuniya, abanyabuzaale bange kandi abanyankomo bagenzi bange, abasaija abamanyirwe kurungi abakwenda, kandi abamazire obwire bwingi bali omu bumu na Kristo, kukira nyowe.
8 Mundamukize Ampulyato, ou ndukugonza muno omu Mukama waitu. 9 Muramukye Urubano, omukozi mutaahi waitu omu Kristo, hamu na Sitaku ou ndukugonza muno. 10 Muramukye Aperesi ow’arukusiimwa omu Kristo. Muramukye n’ab’omu nju ya Alisitobulo. 11 Muramukye Herodioni omunyabuzaale wange. Muramukye n’ab’omu nju ya Narakiso abali omu Mukama waitu. 12 Muramukye Turufaina hamu na Turufosa abakazi abarukukora n’amaani omu Mukama waitu. Muramukye Peresi arukugonzebwa muno ayakozere n’amaani omu Mukama waitu. 13 Muramukye Rufo ayakomerwe omu Mukama waitu hamu na nyina ayafookere nka nyina nyowe. 14 Muramukye Asunkerito, Feregoni, Hereme, Pateroba, Herema, n’ab’oruganda abali na bo. 15 Muramukye Firorogo, Yuliya, Nerewusi na munyaanya, Orumpasi, n’abarukwera boona abali na bo. 16 Muramukyangane n’okunywegera okurukwera. Ebitebe bya Kristo byona nibibaramukya.
17 Hati, nimbateererra ab’oruganda, mwikaze eriiso lyanyu hali abo abaleetaho okwebaganizaamu, n’ebirukutabaijura ebirukwahukana ha nyegesa ezi mwayegesiibwe kandi mubeetantale. 18 Habwokuba abantu aba mulingo ogu, tibali bairu ba Mukama waitu Kristo, baitu bairu b’enda zaabo,* kandi bakozesa ebigambo ebirukunulirra kandi ebirukuhaisaniza nukwo basoonasoone emitima y’abo abataine eki bamanyire. 19 Obuhulizi bwanyu bumanyirwe abantu boona, nahabweki, ninsemererwa habwanyu. Baitu ningonza mube bantu ab’amagezi obukirukuhika ha kirungi, kandi nk’abataine eki mumanyire obukirukuhika ha kibi. 20 Omu kacu kake, Ruhanga ow’agaba obusinge alisasangurra Sitaani hansi y’ebigere byanyu. Leka embabazi enyingi muno eza Mukama waitu Yesu, ziikale na inywe.
21 Timoseo omukozi mugenzi wange, naabaramukya, Lukiyo, Yasoni, na Sosipatera, abanyabuzaale bange, babaramukize.
22 Nyowe, Teretiyo, anyakuhandiikire ebbaruha enu, nimbaramukya omu Mukama waitu.
23 Gayo, ow’arukundaaza kandi nambere ekitebe kyona kirukusorrokanira, na uwe abaramukize. Erasito, omwahuzi* w’orubuga na uwe abaramukize, hamu na Kwarito mugenzi we. 24* ——
25 Hali Ogu asobora kubagumya kuraba omu makuru amarungi aga ndukurangirra, n’okuraba omu kutebeza ebirukukwata hali Yesu Kristo, kusigikirra ha kusuukururwa okw’ensita erukwera eyaikaire eserekerwe kuruga omu kasumi aka ira muno, 26 baitu hati esuukwirwe* kandi yamanyisibwa hali amahanga goona kuraba omu byahandiikirwe eby’obunabbi nkooku Ruhanga atahwaho yaragiire, nukwo amahanga gasobole kuba n’okwikiriza, kandi gamworobere; 27 leka Ruhanga, ow’amagezi wenka, aheebwe ekitiinisa ebiro n’ebiro kuraba omuli Yesu Kristo. Amiina.