Ebikorwa by’Abakwenda
1 Mutaahi wange Teyofiro, omu kitabu eky’okubanza nkahandiika ebintu byona Yesu ebi yabandize kukora n’okwegesa 2 kuhikya ekiro obu yatwairwe omu iguru, hanyuma y’okuha abakwenda aba akaba akomere oburagirizi kuraba omu mwoyo ogurukwera. 3 Hanyuma y’okubonabona, akabeeyoleka ali mwomeezi kuraba omu miringo nyingi ey’erukunanura. Bakamurora kumara ebiro 40, kandi akaba naabazaaho Obukama bwa Ruhanga. 4 Obu yatangatangaine na bo, yabaragira ati: “Mutaruga omu Yerusaalemu, baitu mwikale mulindiriire Isenyowe eki yaraganiize, kandi eki mwahuliire kuruga hali nyowe; 5 ky’amananu ngu Yohaana akabatiza n’amaizi, baitu inywe mulibatizibwa n’omwoyo ogurukwera omu biro bike hanyuma ya kinu.”
6 Obu bakaba beesoroize hamu, baamukaguza bati: “Mukama waitu, noogarurra Isaleeri obukama omu kasumi kanu?” 7 Yabagarukamu ati: “Tikiri kyanyu kumanya obwire n’obusumi Isenyowe obu ataire omu busobozi bwe wenka. 8 Baitu nimwija kutunga amaani, omwoyo ogurukwera* obu gulibaijaho, kandi muliba bakaiso bange omu Yerusaalemu, n’omu Buyudaaya yoona hamu na Samaliya, n’omu bicweka ebya hara omu nsi.”* 9 Obu yamazire kubaza ebintu binu, yatwarwa omu iguru nibarora, kandi ekicu kyamusweka baaleka kumurora. 10 Obu bakaba nibakyarora haiguru aliyo naagenda, ahonaaho abasaija babiri abajwaire ebijwaro ebirukwera baayemerra ha rubaju rwabo, 11 kandi baagamba bati: “Inywe abasaija aba Galiraaya, habwaki mwemeriire nimurora haiguru? Onu Yesu ayabaihwaho yatwarwa omu iguru, aligaruka omu mulingo nugwo gumu nkooku mwamurora naagenda omu iguru.”
12 Hanyuma baagaruka Yerusaalemu nibaruga ha rusozi orurukwetwa Orusozi orw’Emizaituuni, oruli haihi na Yerusaalemu, nk’orugendo rwa kilomita emu.* 13 Obu baahikireyo, baagenda omu kisiika ekya haiguru nambere bakaba nibaikara. Omu kisiika eki hakaba harumu Petero, Yohaana, Yakobbo, Andereya, Firipo, Tomasi, Batolomaayo, Matayo, Yakobbo mutabani wa Alifaayo, Simooni omwekambi, hamu na Yuda mutabani wa Yakobbo. 14 N’ekigendererwa kimu, boona bakaikara nibeekamba omu kusaba, bali n’abakazi abamu, na Malyamu nyina Yesu, hamu n’abagenzi ba Yesu.
15 Omu biro ebi, Petero akeemerra hagati y’ab’oruganda (boona hamu bakaba bali nka 120) kandi yagamba ati: 16 “Basaija inywe, ab’oruganda, kyali nikyetaagisa ekyahandiikirwe kuhikiirizibwa omwoyo ogurukwera eki gwabalize kara kuraba omuli Daudi ha birukukwata hali Yuda, ayayebembiire abantu abaizire kukwata Yesu. 17 Habwokuba akaba abazirwe hamu na itwe, kandi akatunga omugabo omu buheereza bunu. 18 (Omusaija onu akagura ekibanja naakozesa empeera etali y’okuhikirra, kandi akagwa hansi yabanzaaho omutwe, yahuulika enda* kandi eby’omu nda byona byaseeseka. 19 Kinu kikamanywa abaikazi boona ab’omu Yerusaalemu, nahabweki ekibanja eki omu rulimi rwabo kikeetwa Akeridama, ekirukumanyisa “Ekibanja ky’Esagama.”) 20 Habwokuba kikahandiikwa omu kitabu kya Zabbuli kiti: ‘Leka ekiikaro kye kibe kifurukwa kandi hataikaramu omuntu weena’ kandi ‘Ekiikaro eky’oburoleerezi bwe omuntu ondi akitwale.’ 21 Nahabweki nikyetaagisa omu h’abasaija abaagendaga na itwe omu kasumi koona Mukama waitu Yesu obu yakoraga emirimo ye* omuli itwe, 22 kuruga Yohaana obu yamubatiize, kuhika ha kiro obu yatwihirweho yatwarwa omu iguru, omu h’abasaija banu asemeriire kufooka kaiso hamu na itwe habw’okuhumbuuka kwe.”
23 Baahayo abantu babiri, Yusufu arukwetwa Bbarasabba, kandi ibara lye erindi yayetwaga Yusito, hamu na Matiya. 24 Hanyuma baasaba nibagamba bati: “Ai Yahwe,* iwe anyakumanyire emitima yoona, yoleka ou okomere omu basaija banu babiri 25 kugaruka omu kiikaro ky’obuheereza bunu hamu n’obukwenda, Yuda obu yalekereho yagenda mihanda ye.” 26 Baatoma, kandi okutoma* kwagwa hali Matiya kandi na uwe yabalirwa hamu n’abakwenda 11.