Ebbaruha ya Paulo eya Kabiri Hali Abakolinso
5 Tukimanyire ngu kakuba enju yaitu ey’omu nsi, eheema enu, eseeswa hansi,* nitwija kutunga ekyombeko kuruga hali Ruhanga, enju ey’etakozerwe n’emikono, ebiro n’ebiro omu iguru. 2 Habwokuba omu nju enu ei turukwikaramu mali nitusinda, kandi nitwegomba muno kujwara enju yaitu ey’omu iguru, 3 nukwo obu turaagijwara tutasangwa tuli busa. 4 Amananu gali, itwe abali omu heema enu nitusinda, tulemeriirwe, habwokuba titurukugonza kugijuura, baitu nitugonza kujwara eri endi, nukwo omubiri gunu ogurukufa gusobole kumirwa obwomeezi. 5 Habwokuba ayatuteekaniriize ekintu kinu ni Ruhanga, ayatuhaire omwoyo nk’ekirukugumya ebi ebirukugenda okwija.
6 Nahabweki, twikara tugumire kandi tukimanyire ngu obu tuba twine eka yaitu omu mubiri, nituba tutali na Mukama waitu, 7 habwokuba nitugendera omu kwikiriza, hatali omu kurora. 8 Baitu tugumire kurungi kandi twakugondeze turuge omu mubiri kandi tube omuka yaitu na Mukama waitu. 9 Katube tuli na uwe omuka rundi tutali hamu na uwe, tukifoole kigendererwa kyaitu okusiimwa omu maiso ge. 10 Habwokuba itwena tusemeriire kuba omu maiso g’entebe ya Kristo ey’okucweramu omusango,* nukwo buli omu asobole kusasurwa kusigikirra ha bintu ebi yakozere obu akaba ali omu mubiri, ka bibe birungi rundi bibi.
11 Nahabweki, habwokuba tukimanyire ngu twine kutiina Mukama waitu, twikara nitusoonasoona abantu, baitu tumanyirwe Ruhanga kurungi. Baitu ninnihira ngu tumanyirwe kurungi n’omuntu waanyu ow’omunda. 12 Titurukubamanyisa eki tuli omurundi ogundi, baitu nitubaha eky’okusigikirraho kutwesiimisa, nukwo musobole kugarukamu abo abeenyumiza* habw’enzooka eya haruguru, hatali eki ekiri omu mutima. 13 Habwokuba obu turaaba twagwire iraro, tukaligwa habwa Ruhanga; obu turaaba nitwetegereza kurungi, nitwetegereza kurungi habwanyu. 14 Okugonza kwa Kristo nikutuhambiriza, habwokuba tukyetegeriize ngu omuntu omu, akafeera boona; nahabweki, boona bakaba bafiire. 15 Kandi akafeera boona, nukwo abo abarukwomeera, batoomeera habwabo bonka baitu habw’ogu ayabafeeriire kandi yahumbuurwa.
16 Nahabweki kuruga hati titumanyire omuntu weena kusigikirra ha mubiri. Obu turaaba tukaba tumanyire Kristo kusigikirra ha mubiri, hati titumumanyire omu mulingo ogu. 17 Nahabweki, kakuba omuntu weena aba omu bumu na Kristo, aba ali ekihangwa ekihyaka; ebintu ebya ira bihoireho; kandi dora! ebintu ebihyaka biizire. 18 Baitu ebintu byona biruga hali Ruhanga, ayatwegaruliire kuraba omu Kristo, kandi yatuha obuheereza obw’okuteeranizibwa, 19 nukwo kugamba ngu, kuraba omu Kristo, Ruhanga akeegarurra abantu atarukubajunaana ebibi byabo kandi yatuha obutumwa obw’okuteeranizibwa.
20 Nahabweki, tuli ngabwa nitukiikirra Kristo, oti rundi Ruhanga naabeesengereza kuraba omuli itwe. Nk’abarukukiikirra Kristo, nitwesengereza tuti: “Muteeranizibwe na Ruhanga.” 21 Ogu ow’akaba atamanyire ekibi, akamufoora ekihongwa eky’ekibi habwaitu, nukwo kuraba omuli uwe tusobole kufooka ab’okuhikirra hali Ruhanga.