Ebbaruha ya Paulo Hali Abafiripi
3 Ab’oruganda, omu kumalirra, mugumizeemu nimusemerererwa omu Mukama waitu. Tikirukungumira kwongera kubahandiikira ebintu nibyo bimu habwokuba by’obulinzi hali inywe.
2 Mwerinde embwa; mwerinde abo abarukukora ebintu eby’akabi; kandi mwerinde abo abasara omubiri. 3 Habwokuba itwe niitwe abasazirwe* kwo, itwe abarukwejumbira omu buheereza oburukwera kuraba omu mwoyo gwa Ruhanga kandi abarukwenyumiriza omu Kristo Yesu kandi itwe obwesige bwaitu titubutaire omu mubiri, 4 baitu obu haraaba haroho omuntu weena aine eki arukusigikirraho kwesiga omubiri, niinyowe.
Obu haraaba haroho omuntu ondi weena arukuteekereza ngu aine eky’okusigikirraho kwesiga omubiri, nyowe nimmukira: 5 nkasarwa ha kiro ekya munaana, ndi Munyaisaleeri ow’oruganda rwa Benyamiini, Omuhebburaniya ayazairwe Abahebburaniya; obukirukuhika ha biragiro ndi Mufalisaayo; 6 obukirukuhika ha bwekambi, nkahiiganiza ekitebe, obukirukuhika ha kuhikirra okurukusigikirra ha biragiro, nkooleka ngu tinyine musango. 7 Baitu ebintu byona ebi natungire mbitwaire nk’ebitaine mugaso* habwa Kristo. 8 Ekirukukira hali eki, ebintu byona nimbitwara nk’ebitaine mugaso habw’okumanya okw’omuhendo okurukukwata ha Kristo Yesu Mukama wange. Habwe, nkaikiriza kufeerwa ebintu byona kandi nimbitwara kuba nk’ebisasiro, nukwo nsobole kutunga Kristo 9 kandi nukwo nsangwe ndi omu bumu na uwe, hatali omu kuhikirra kwange okurukuruga omu kuhondera Ebiragiro,* baitu habw’okuhikirra kuraba omu kwikiririza omu Kristo, okuhikirra okuruga hali Ruhanga kandi okusigikirra ha kwikiriza. 10 Ekigendererwa kyange nikyo eky’okumumanya, n’okumanya amaani ag’okuhumbuuka kwe, n’okubagana omu kubonabona kwe, n’okwehayo nyenka omu kufa nk’okwe, 11 nukwo na nyowe ndole obu kiraaba nikisoboka kuba omu kuhumbuuka* okw’okubanza.
12 Tindukugamba ngu mmazire ira kutunga empeera rundi mmazire ira kufoorwa ow’ahikiriire, baitu ningumizaamu kwekamba kurora ngu na nyowe nasobora kutunga Kristo Yesu eki yankomiire.* 13 Ab’oruganda, tindukugamba ngu eki nkamara kukitunga baitu haroho ekintu kimu eki ndukugumya: Ninyebwa ebintu eby’enyuma kandi ninyekamba* muno kuhika ha bintu eby’omumaiso, 14 ninyekamba muno kuhika ha kigendererwa eky’okutunga ekisembo eky’okwetwa okw’omu iguru okurukuruga hali Ruhanga kuraba omu Kristo Yesu. 15 Nahabweki, leka itwe abakuzire omu by’omwoyo tube n’enteekereza eya mulingo ogu, kandi obu haraaba haroho enteekereza ey’erukwahukana hali egi omu mulingo gwona, Ruhanga naija kubasuukurra enteekereza ey’ehikire. 16 Hoona nambere tuhikire omu kukurakurana, leka tugumizeemu kurubata kurungi omu muhanda gunu gwonyini.
17 Ab’oruganda, inywena hamu mwegere hali nyowe kandi mwikaze amaiso ganyu hali abo abarukwetwaza omu mulingo ogurukuhikaana n’ekyokurorraho eki twabateeriireho. 18 Habwokuba haroho baingi—aba nakiraga kubazaaho, baitu hati nimbabazaaho ndi omu kurra—habwokuba nibeetwaza nk’abanyanzigwa b’omuti* gwa Kristo. 19 Empero yabo eriba kuhwerekerra, kandi enda yabo nuwe ruhanga wabo, nibeenyumiriza omu bintu ebisemeriire kubakwasa ensoni, kandi nibateekereza ebintu eby’ensi. 20 Baitu obwikazi bwaitu buli omu iguru kandi tulindiriire n’ekihika kingi omujuni kuruga omu iguru, ogu nuwe Mukama waitu Yesu Kristo, 21 kandi ow’araahindura omubiri gwaitu omuceke kuba nk’omubiri gwe ogw’ekitiinisa naakozesa amaani ge amaingi agamusobozesa kuteeka ebintu byona hansi ye.