Nk’Oku Yahandiikirwe Luka
1 Habwokurora ngu baingi balengereho kusorooza, n’okuhandiika ebintu binu ebyabaireho kwo, kandi ebi turukwikiriza ngu by’amananu,* 2 nkooku byatuhairwe abo abaabirozere nibibaho kurugira kimu ha kutandika kandi baabitumanyisa, 3 na nyowe nkacwamu kubikuhandiikira iwe ow’ekitiinisa Teyofiro, habwokuba nkabiseruliirizaaho n’obwegendereza, kurugira kimu ha kutandika kwabyo kandi nabikuhandiikira nkooku byahonderaine, 4 nukwo osobole kugumiza kimu ebintu ebi wayegesiibwe.
5 Omu kasumi ka Herodi,* omukama wa Buyudaaya, hakaba haroho nyakatagara arukwetwa Zaakaliya ow’omu kihanda kya Abiya. Mukazi we akaba ali ow’omu bahara ba Aroni, kandi akaba naayetwa Erizabbeesi. 6 Boona babiri bakaba bahikiriire omu maiso ga Ruhanga, baakwataga ebiragiro bya Yahwe* byona kandi bataine eki barukujunaanwa omu maiso ge. 7 Baitu bakaba bataine mwana habwokuba Erizabbeesi akaba ali ngumba, kandi boona bakaba bakuzire muno omu myaka.
8 Zaakaliya obu akaba naaheereza nka nyakatagara, akasumi ekihanda eki akaba arumu obu kikaba nikiheereza omu maiso ga Ruhanga, 9 nkooku engeso* ey’obwanyakatagara ekaba eri, yataaha omu yekaru ya Yahwe* kwotera emigaju.* 10 Ekitebe ky’abantu boona bakaba bali aheeru nibasaba, omu saaha ey’okwotera emigaju. 11 Malaika wa Yahwe* yamubonekera ayemeriire ha rubaju rw’obulyo orw’ekyoto* eky’okwoterraho emigaju. 12 Zaakaliya obu yamurozere, yatiina muno. 13 Baitu malaika yamugambira ati: “Otatiina Zaakaliya, habwokuba okwesengereza kwawe kuhuliirwe, mukazi waawe Erizabbeesi alikuzarra omwana omwojo kandi oli muruka ibara lye Yohaana. 14 Noija kusemererwa, okyanganuke muno, kandi baingi balisemererwa habw’okuzaarwa kwe, 15 habwokuba aliba mukuru omu maiso ga Yahwe.* Baitu atalinywa eviini rundi ekitamiiza kyona, kandi aliijura omwoyo ogurukwera kurugira kimu omu nda ya nyina,* 16 kandi aligarra abaana ba Isaleeri baingi hali Yahwe* Ruhanga wabo. 17 Ekindi, alimwebembera aine omwoyo n’amaani nka Eriya ebi akaba aine, agarre emitima ya baise baana hali abaana baabo kandi n’abajeemu batunge amagezi ag’abahikiriire, nukwo ateekanirize Yahwe* abantu abeeteekaniize kumuheereza.”
18 Zaakaliya yakaguza Malaika ati: “Kinu ninsobora kukigumya nta? Nyowe ngurusire kandi na mukazi wange akaikwire.” 19 Malaika yamugarukamu ati: “Niinyowe Gabulyeri ow’ayemerra omu maiso ga Ruhanga, ntumirwe kubaza na iwe n’okukugambira amakuru amarungi. 20 Baitu dora! noija kufa omunwa kandi olemwe kubaza kuhikya ebintu binu obu birihikirra, habwokuba toikiriize ebigambo byange ebirukwija kuhikirra omu kasumi akatairweho.” 21 Abantu baikara balindiriire Zaakaliya, kandi baahunirra habwokuba akamara obwire bwingi omu yekaru. 22 Obu yaturukire aheeru, akaba atasobora kubaza na bo, kandi baakyetegereza ngu atungire okwolekwa obu abaire ali omu yekaru. Habwokuba akaba atarukusobora kubaza, akaikara naakozesa obwokurorraho. 23 Ebiro eby’okuheereza kwe obu byahoireyo, yagaruka omuka ye.
24 Hanyuma y’ebiro bike, mukazi we Erizabbeesi akatwara enda, kandi yamara emyezi etaano atarukuruga omu nju, naagamba ati: 25 “Kinu nikyo Yahwe* ankoliire omu biro binu. Anyijukire yanswarura omu bantu.”
26 Enda ye obu yahikize emyezi mukaaga, Ruhanga yatuma malaika Gabulyeri omu rubuga rwa Nazaleesi orw’omu Galiraaya, 27 hali omwisiki ow’atakabyamaga n’omusaija, ow’akaba ajumbiirwe omusaija arukwetwa Yusufu ow’omu nju ya Daudi, kandi ibara ly’omwisiki ogu akaba nuwe Malyamu. 28 Malaika yaija nambere ali yamugambira ati: “Obusinge bube na iwe, iwe ow’asiimirwe muno, Yahwe* ali na iwe.” 29 Baitu Malyamu yayeraliikirra habw’ebigambo ebi, kandi yalengaho kwetegereza amakuru g’okuramukya oku. 30 Baitu malaika yamugambira ati: “Otatiina Malyamu, habwokuba osiimirwe omu maiso ga Ruhanga. 31 Dora! olitwara enda, ozaale omwana omwojo, kandi olimuruka ibara lye Yesu. 32 Aliba mukuru muno kandi alyetwa Omwana ow’Ogu Anyakuli Haiguru Muno, kandi Yahwe* Ruhanga alimuha ekitebe ky’obukama ekya ise Daudi, 33 kandi alirema nk’Omukama omu nju ya Yakobo ebiro n’ebiro, kandi Obukama bwe tibulihwaho.”
34 Baitu Malyamu yakaguza malaika ati: “Kinu kiraasoboka kita, kandi kunu tinyine musaija ou ndukuteerana na uwe?” 35 Malaika yamugarukamu ati: “Omwoyo ogurukwera* gulikwijaho, kandi amaani g’Ogu Anyakuli Haiguru Muno galikuswekerra. Habw’ensonga egi, ogu alizaarwa alyetwa arukwera, Omwana wa Ruhanga. 36 Kandi dora! Erizabbeesi omunyabuzaale waawe, ayayetwaga engumba, n’omu bukaikuru bwe, hati aine enda ey’omwana ow’obwojo ey’emyezi mukaaga; 37 habwokuba hali Ruhanga, busaho ekigambo* ekisobora kulemwa kuhikirra.” 38 Nubwo Malyamu yagamba ati: “Dora, omuzaana wa Yahwe!* Leka kibe hali nyowe, nkooku ogambire.” Nubwo malaika yarugaho yagenda.
39 Omu biro ebi, Malyamu yarahuka yagenda omu nsi y’ensozi omu rubuga rwa Yuda, 40 kandi yataaha omu nju ya Zaakaliya yaramukya Erizabbeesi. 41 Erizabbeesi obu yahuliire okuramukya kwa Malyamu, omwana omu nda ye yagurukaguruka, kandi Erizabbeesi yaijura omwoyo ogurukwera. 42 Yatokera haiguru naagamba ati: “Oli w’omugisa omu bakazi, n’omwana ow’olizaara w’omugisa! 43 Niinyowe oha, kutunga omugisa ogw’okubungirwa nyina Mukama wange? 44 Dora! obu mpuliire iraka ery’okuramukya kwawe, omwana omu nda yange agurukagurukire habw’okusemererwa. 45 Na iwe ayaikiriize oine okusemererwa, habwokuba byona Yahwe* ebi yakugambiire nibiija kuhikirra.”
46 Kandi Malyamu yagamba ati: “Obwomeezi bwange nibukugiza Yahwe,* 47 n’omutima gwange tigusobora kuleka kusemerererwa Ruhanga Omujuni wange, 48 habwokuba arozere omuzaana we ow’ali omu kiikaro ekya hansi. Kandi dora! abantu ab’obusinge bwona baraanyetaga ow’okusemererwa, 49 habwokuba Ogu ow’amaani ankoliire ebikuru, ibara lye niryera, 50 kandi habw’ebiro n’ebiro embabazi ze ziba hali abo abanyakumutiina. 51 Akozere eby’amaani n’omukono gwe kandi ararangize abaine emyehembo omu mitima yabo. 52 Ab’amaani abaihire ha bitebe eby’obukama kandi yaimukya abanaku; 53 yaigusa abaine enjara n’ebintu ebirungi, kandi abaguuda yababinga bataine kantu. 54 Aizire kukoonyera Isaleeri omuheereza we, habw’okwijuka embabazi ze, 55 nkooku yagambiire baisenkuruitwe, hali Ibburahimu n’oruzaaro rwe* ebiro n’ebiro.” 56 Malyamu akaikara na Erizabbeesi kumara emyezi nk’esatu kandi hanyuma yagaruka omuka ye.
57 Akasumi obu kaahikire aka Erizabbeesi kuzaara, yazaara omwana omwojo. 58 Kandi abataahi n’abanyabuzaale be obu baahuliire ngu Yahwe* akaba amwolekere embabazi, baasemererwa na uwe. 59 Ha kiro ekya munaana baija kusara omwana kandi baali nibagonza kumuruka ibara lya ise, Zaakaliya. 60 Baitu nyina mwana yagamba ati: “Nangwa! naija kurukwa Yohaana.” 61 Nubwo baamugambira bati: “Busaho munyabuzaale waawe n’omu arukwetwa ibara linu.” 62 Hanyuma baakozesa obwokurorraho kukaguza ise ibara eri arukugonza baruke omwana. 63 Yasaba ah’okuhandiika, kandi yahandiika ati: “Ibara lye nuwe Yohaana.” Kandi boona baahunirra habw’eki. 64 Ahonaaho akanwa ke kaiguka, orulimi rwe rwasumurruka kandi yatandika kubaza naakugiza Ruhanga. 65 Abantu ab’omu kicweka kyabo baatiina muno, kandi baatandika kubazaaho ebintu binu byona omu nsi yoona ey’ensozi eya Buyudaaya. 66 Kandi boona abaabihuliire, baabita ha mitima yabo, nibagamba bati: “Omwana onu aliba muntu wa mulingo ki?” Habwokuba omukono gwa Yahwe* gukaba guli na uwe.
67 Hanyuma, Zaakaliya ise, yaijura omwoyo ogurukwera, yabaza obunabbi naagamba ati: 68 “Yahwe* akugizibwe Ruhanga owa Isaleeri, habwokuba aijukire abantu be yabajuna. 69 Kandi atwimukiize ihembe ery’okujuna* omu nju ya Daudi omuheereza we, 70 nkooku yakibalize kuraba omu kanwa ka banabbi be abarukwera aba ira, 71 kutujuna hali abanyanzigwa baitu n’omu mukono gw’abo boona abatunoba; 72 nukwo ayoleke embabazi ezi yaraganiize baisenkuruitwe naijuka ekiragaano kye ekirukwera, 73 ekirahiro eki yarahiriire isenkuruitwe Ibburahimu. 74 Ruhanga obu alimara kutujuna hali abanyanzigwa baitu, alitwikiriza kumuramya tutarukutiina kandi tuliikara nitumuheereza 75 n’obwesigwa n’okuhikirra ebiro byona. 76 Baitu iwe omwana omuto, olyetwa nabbi w’Ogu Anyakuli Haiguru Muno, habwokuba olyebembera Yahwe* kumuteekaniriza emihanda ye, 77 n’okumanyisa abantu be obutumwa obw’okujunwa kuraba omu kuganyirwa ebibi byabo, 78 habw’embabazi nyingi eza Ruhanga waitu. Habw’embabazi zinu, emamba eritusarra kuruga haiguru, 79 kuha ekyererezi abo abaikaliire omu mwirima n’omu kiituuru eky’okufa, n’okutereekereza ebigere byaitu omu muhanda ogw’obusinge.”
80 Kandi omwana omuto yakura yafooka w’amaani habw’omwoyo gwa Ruhanga, kandi yaikara omu irungu kuhikya ekiro obu yayeyolekere abantu ba Isaleeri bwerebwere.