Ebbaruha ya Paulo Hali Abarooma
8 Nahabweki, abo abali omu bumu na Kristo Yesu tibacwerwa omusango. 2 Habwokuba ekiragiro eky’omwoyo oguha obwomeezi kuraba omu Kristo Yesu kibafoire b’obugabe kuruga omu kiragiro ky’ekibi n’okufa. 3 Ebiragiro* eki byalemerwe kukora habwokuba bikaba biri biceke habw’obutahikirra bw’abantu, Ruhanga akakikora naatuma Omwana we omu kisisani eky’omubiri ogw’ekibi, nukwo asobole kwihaho ekibi, kandi yacwerwa omusango ekibi ekiri omu mubiri, 4 nukwo ebintu eby’okuhikirra ebirukwetaagisa omu Biragiro bisobole kuhikirra omuli itwe, abatarukugenda kusigikirra ha mubiri, baitu kusigikirra ha mwoyo. 5 Habwokuba abo abomeera nibasigikirra ha mubiri, bata ebiteekerezo byabo ha bintu eby’omubiri, baitu abo aboomeera kusigikirra ha mwoyo, bata ebiteekerezo byabo ha bintu eby’omwoyo. 6 Kuteekerezaaho ebintu eby’omubiri kirugamu okufa, baitu kuteekerezaaho ebintu eby’omwoyo kirugamu obwomeezi hamu n’obusinge; 7 habwokuba kuteekerezaaho ebintu eby’omubiri kireetera omuntu kuba munyanzigwa wa Ruhanga, habwokuba omubiri tigulemwa ebiragiro bya Ruhanga kandi amananu gali, tigusobora kuba hansi yabyo. 8 Nahabweki, abo abakora okwegomba okw’omubiri, tibasobora kusemeza Ruhanga.
9 Baitu mali omwoyo gwa Ruhanga obu guraaba guli omuli inywe, mukora ebintu eby’omwoyo hatali eby’omubiri. Baitu omuntu weena obu ataba n’omwoyo gwa Kristo, omuntu ogu taba wa Kristo. 10 Baitu Kristo obu aba omu bumu na inywe, omubiri guba gufiire habw’ekibi, baitu omwoyo guha obwomeezi habw’okuhikirra. 11 Nahabweki, omwoyo gw’ogu ayahumbwire Yesu kuruga omu bafu obu guraaba guli omuli inywe, ogu ayahumbwire Kristo Yesu kuruga omu bafu, alyomeeza emibiri yanyu erukufa kuraba omu mwoyo gwe oguli omuli inywe.
12 Nahabweki, ab’oruganda, titusemeriire kwikiriza emibiri yaitu kutulema, ekatuleetera kukora ebi erukugonza; 13 habwokuba kakuba mukora ebintu kusigikirra ha mubiri, nimwija kufa, baitu obu muralekera kimu* ebikorwa by’omubiri kuraba omu mwoyo, nimwija kwomeera. 14 Habwokuba boona abeebemberwa omwoyo gwa Ruhanga, baba baana ba Ruhanga mali. 15 Mutaheebwe omwoyo ogw’obwiru ogurukubaleetera kwongera kutiina, baitu mukaheebwa omwoyo ogurukubafoora abaana, kandi habw’omwoyo ogu, tubaliza haiguru tuti: “Abba,* Isiitwe!” 16 Omwoyo gwa Ruhanga, gumanyisa omwoyo* gwaitu ngu tuli abaana ba Ruhanga. 17 Obu turaaba tuli baana, tuli bagwetwa—bagwetwa ba Ruhanga, kandi bagwetwa hamu na Kristo—baitu tusemeriire kubanza kubonabonesebwa hamu na uwe nukwo na itwe tusobole kunyumizibwa hamu na uwe.
18 Habwokuba nindora okubonabona okw’akasumi kanu kuke muno, kakuba okulengesaniza n’ekitiinisa ekirukwija kweyolekera omuli itwe. 19 Ebyahangirwe birindiriire n’ekihika okwolekwa kw’abaana ba Ruhanga. 20 Habwokuba ebyahangirwe bikalekwa kulemwa obutarumu hatali habw’okugonza kwabyo, baitu kuraba omuli ogu ayabirekere kulemwa obutarumu, baitu yabiha okunihira 21 ngu nibiija kulekerwa kuruga omu bwiru bw’okujunda kandi bitunge obugabe obw’ekitiinisa obw’abaana ba Ruhanga. 22 Habwokuba tukimanyire ngu ebyahangirwe byona biikaire nibisinda kandi nibisaasira hamu kuhikya na hati. 23 Hatali eki kyonka, baitu na itwe abaine ebyana eby’okubanza kandi ogu nugwo omwoyo, nitusinda obu tulindiriire n’ekihika okufoorwa abaana, kulekerwa kuruga omu mibiri yaitu kuraba omu kicunguro. 24 Habwokuba tukajunwa omu kunihira kunu, baitu ebintu ebirukunihirwa obu biba nibirorwa, oku kuba kutakyali kunihira. Omuntu naasobora kunihira ekintu eki arukurora? 25 Baitu obu tunihira ekintu eki tutarukurora, twikara tukirindiriire n’ekihika, twine okugumiisiriza.
26 Omu mulingo nugwo gumu, omwoyo nagwo gutukoonyera omu buceke bwaitu, obu tuba tutamanyire eki tusemeriire kusaba, omwoyo gutwesengerereza obu tuba nitusinda tutaine ebigambo by’okubaza.* 27 Ogu ow’ayekebiija emitima, aba amanyire omwoyo eki guba nigumanyisa, habwokuba gwesengerereza abarukwera nkooku Ruhanga agonza.
28 Tukimanyire ngu Ruhanga aleetera emirimo ye kukorra hamu habw’oburungi bw’abo abamugonza, abo abeeserwe kusigikirra ha kigendererwa kye; 29 habwokuba abo abayamanyire ha kubanza basisaniziibwe omu kisisani ky’Omwana we, nukwo asobole kuba muzigaijo omu bagenzi be abaingi. 30 Baitu abo aba yakomeremu ira, nubo yayesere kandi abo aba yayesere nubo yayesere ab’okuhikirra. Kandi abo aba yayesere ab’okuhikirra, nubo yanyumiize.
31 Hati, tugambe ki ha bintu binu? Ruhanga obu araaba ali ha rubaju rwaitu, nooha araaturwanisa? 32 Obu araaba ataralekere kuhayo Omwana we, baitu yamuhayo habwaitu itwena, tarukwija kutuha ebintu ebindi ebi turukwetaaga ali hamu n’Omwana we? 33 Nooha araajunaana abo Ruhanga abaakomeremu? Ruhanga nuwe abeeta ab’okuhikirra. 34 Nooha araabacwera omusango? Busaho n’omu, habwokuba Kristo Yesu nuwe yafiire kandi yahumbuurwa kuruga omu bafu, ali ha mukono gwa Ruhanga ogw’obulyo kandi naatutonganirra.
35 Nooha alitubaganiza hali okugonza kwa Kristo? Ebizibu rundi obujune rundi okuhiiganizibwa rundi enjara rundi kutaba n’ebijwaro rundi akabi rundi empirima? 36 Nkooku kyahandiikirwe kiti: “Habwawe nitwitwa buli kiro habwokuba tubazirwe nk’entaama ez’okubaagwa.” 37 Baitu omu ebi byona, nitusingurra kimu kuraba omuli ogu ayatugondeze. 38 Habwokuba ninkigumya ngu noobu kwakuba okufa, noobu bwakuba obwomeezi, noobu baakuba bamalaika, noobu baakuba ab’obusobozi, noobu byakuba ebintu ebiroho hati, noobu byakuba ebintu ebirukugenda okwija, noobu gaakuba amaani, 39 noobu kwakuba okuraiha, noobu kwakuba okuhama, noobu kyakuba ekyahangirwe ekindi kyona, busaho ekirisobora kutubaganiza hali okugonza kwa Ruhanga okuli omu Kristo Yesu Mukama waitu.