Ebbaruha ya Paulo ey’Okubanza Hali Abakolinso

15 Hati ab’oruganda, nimbaijukya amakuru amarungi aga nabatebiize, na inywe aga mwaikiriize kandi mwagaikaramu. 2 Kuraba omuli go na inywe muliyo nimujunwa kakuba mukwatira kimu amakuru amarungi aga nabatebiize, rundi buli obu muraaba mwaikiririize busa.

3 Bimu ha bintu ebi nabandize kubagambira nibyo na nyowe nahairwe, ngu Kristo akafa habw’ebibi byaitu nkooku Ebyahandiikirwe bigamba; 4 kandi ngu akaziikwa, yahumbuuka ha kiro ekya kasatu nkooku Ebyahandiikirwe bigamba; 5 kandi akabonekera Keefa,* kandi hanyuma hali ikumi na babiri. 6 Hanyuma y’ebi, akabonekera ab’oruganda abarukuhingura omu 500 ha murundi gumu, kandi abarukukira obwingi bakyali na itwe, noobu kiraaba ngu abamu bakagwijagira omu kufa. 7 Hanyuma akabonekera Yakobbo, kandi hanyuma yabonekera abakwenda boona. 8 Hanyuma y’okubonekera boona, akabonekera na nyowe nk’omwana ow’azaarwa atahikire.

9 Niinyowe arukumalirrayo omu bakwenda, kandi tikinsemeriire kwetwa omukwenda, habwokuba nkahiiganiza ekitebe kya Ruhanga. 10 Baitu habw’embabazi za Ruhanga enyingi muno, ndi eki ndi. Kandi embabazi ze enyingi muno hali nyowe zitafe busa, baitu nkakora muno okubakira boona; baitu akaba atali niinyowe, baitu zikaba ziri embabazi za Ruhanga enyingi muno ezikaba ziri na nyowe. 11 Nahabweki, k’abe nyowe rundi bo, nukwo tutebeza tuti kandi nukwo mwaikiriize.

12 Hati obu kiraaba nikitebezebwa ngu Kristo akahumbuurwa kuruga omu bafu, nikiija kita ngu bamu omuli inywe mugamba ngu busaho okuhumbuuka okw’abafu? 13 Amananu gali, obu haraaba hataroho kuhumbuuka kw’abafu, eki nikimanyisa ngu na Kristo atahumbuurwe. 14 Baitu Kristo obu araaba atarahumbwirwe, mali okutebeza kwaitu nikuba kwa busa, n’okwikiriza kwanyu nakwo nikuba kwa busa. 15 Mali obu kiraaba ngu abafu tibarukwija kuhumbuurwa, nituba tufookere bakaiso ba Ruhanga ab’ebisuba, habwokuba nituba tuhaire obwakaiso obw’ebisuba hali Ruhanga, nitugamba ngu akahumbuura Kristo kandi kunu atamuhumbuule. 16 Obu kiraaba ngu abafu tibarukwija kuhumbuuka, na Kristo atahumbuurwe. 17 Kandi Kristo obu araaba atarahumbwirwe, okwikiriza kwanyu tikwine mugaso; kandi nimuba mukyali omu bibi byanyu. 18 Ekindi, n’abo abaafiire bali omu bumu na Kristo bahwerekeriire. 19 Kakuba omu bwomeezi bunu bwonka tuba tunihiriire omu Kristo, tuli b’okuganyirwa kukira omuntu ondi weena.

20 Baitu hati Kristo ahumbwirwe omu bafu, omuganuro gw’abo abagwijagiire omu kufa. 21 Nkooku okufa kwaizire kuraba omu muntu, n’okuhumbuuka kw’abafu kwija kuraba omu muntu. 22 Nkooku boona bafa kuraba omu Adamu, nukwo boona baliba boomeezi kuraba omu Kristo. 23 Baitu buli omu, omu rubu rwe: Kristo nugwo muganuro, hanyuma abo abali ba Kristo omu kasumi ak’okubaho* kwe. 24 Hanyuma, ha kumalirra, alihayo Obukama hali Ruhanga we kandi Ise, obu aliba amazire kuhwerekereza obulemi bwona, obusobozi bwona hamu n’amaani. 25 Habwokuba asemeriire kulema nk’omukama kuhikya Ruhanga obu alimara kuta abanyanzigwa boona hansi y’ebigere bye. 26 Kandi omunyanzigwa ow’okumalirra aliihwaho, nukwo okufa. 27 Habwokuba Ruhanga “akateeka ebintu byona hansi y’ebigere bye.” Baitu obu agamba ngu ‘ebintu byona bikateekwa hansi ye,’ nikyeyolekera kimu kurungi ngu nikiba kitarukutwarramu Ogu ayataire ebintu byona hansi ye. 28 Baitu ebintu byona obu birimara kuteekwa hansi ye, Omwana na uwe alyeteeka hansi y’Ogu ayataire ebintu byona hansi ye, nukwo Ruhanga asobole kuba byona hali boona.

29 Abafu obu baraaba batarukwija kuhumbuurwa, abo ababatizibwa n’ekigendererwa ky’okufa, balikora ki? Obu kiraaba ngu abafu tibalihumbuurwa naakake, hati habwaki nibabatizibwa habw’ekigendererwa eky’okufa? 30 Habwaki tuli omu kabi obwire bwona? 31 Buli kiro okufa kuba kundindiriire. Kinu ninkigumya ngu nimbeesiimisa inywe ab’oruganda omu Kristo Yesu Mukama waitu. 32 Obu kiraaba ngu kusisanaho n’abantu abandi,* ndwaine n’enyamaiswa omu Efeeso, eki nikingasira ki? Abafu obu baraaba batali b’okuhumbuuka, “leka tulye kandi tunywe habwokuba nyenkya nitwija kufa.” 33 Mutabiihwabiihwa. Abanywani ababi basiisa engeso enungi. 34 Mugarukwemu amagezi omu mulingo ogw’okuhikirra kandi mutakora ekibi, habwokuba abamu tibamanyire Ruhanga. Nimbagambira nukwo mukwatwe ensoni.

35 Baitu omuntu naija kugamba ati: “Abafu baraahumbuurwa bata? Baraahumbuuka baine mibiri ya mulingo ki?” 36 Iwe atarukwetegereza, eki osiga tikisobora kufooka kyomeezi rundi buli kibandize kufa. 37 Habwokuba obu obyara, tobyara omubiri oguraakura, baitu obyara embibo yonka, k’ebe y’engano rundi embibo endi yoona; 38 baitu Ruhanga agiha omubiri nkooku aba agondeze, kandi buli mbibo agiha omubiri gwayo. 39 Omu mulingo nugwo gumu, emibiri yoona terukusisana; haroho ogw’abantu, haroho omubiri ogw’ente, omubiri ogw’ebinyonyi, n’ogw’encu. 40 Haroho emibiri ey’omu iguru n’emibiri ey’omu nsi; baitu ekitiinisa eky’emibiri ey’omu iguru kindi, n’ekitiinisa eky’emibiri ey’omu nsi kindi. 41 Ekitiinisa ky’izooba kindi, n’ekitiinisa eky’okwezi kindi, kandi n’ekitiinisa eky’enyunyuuzi kindi; amananu gali, enyunyuuzi emu neeyahukana ha nyunyuuzi endi omu kitiinisa.

42 N’okuhumbuuka kw’abafu nukwo kuli kuti. Gusigwa omu kujunda; guhumbuurwa omu kutajunda. 43 Gusigwa gutaine kitiinisa; guhumbuurwa omu kitiinisa. Gusigwa omu buceke; guhumbuurwa omu maani. 44 Gusigwa guli mubiri ogw’enyama, guhumbuurwa guli mubiri ogw’omwoyo. Obu haraaba haroho omubiri ogw’enyama, haroho n’omubiri ogw’omwoyo. 45 Nahabweki kikahandiikwa kiti: “Omuntu ow’okubanza Adamu, akafooka omuntu omwomeezi.” Adamu ow’okumalirra, akafooka omwoyo ogurukuha obwomeezi. 46 Baitu omubiri ogw’omwoyo tinugwo gubanza. Omubiri ogw’enyama nugwo gubanza, kandi hanyuma nihaija ogw’omwoyo. 47 Omuntu ow’okubanza akaruga omu nsi kandi akakorwa omu cuucu; omuntu owa kabiri akaruga omu iguru. 48 Kusisanaho n’ogu ayakozerwe omu cuucu, n’abo abakozerwe omu cuucu nukwo bali; kandi kusisanaho ogu ayarugire omu iguru, n’abo ab’omu iguru nukwo bali. 49 Kandi nkooku twasisaine ogu ayarugire omu cuucu, nukwo tulisisana ogu ayarugire omu iguru.

50 Baitu ab’oruganda nimbagambira kinu, omubiri n’esagama tibisobora kugwetwa Obukama bwa Ruhanga, kandi okujunda tikusobora kugwetwa okutajunda. 51 Dora, nimbagambira ensita erukwera: Itwena titurukwija kugwijagira omu kufa, baitu itwena tulihindurwa, 52 omu kacu kake muno, nk’okukoimya okw’eriiso, engwara* ey’okumalirra obu erigamba. Habwokuba engwara erigamba, abafu balihumbuurwa batunge emibiri etarukujunda kandi tulihindurwa. 53 Omubiri gunu ogurukujunda gusemeriire kujwara obutajunda, kandi gunu ogufa gusemeriire kujwara okutafa. 54 Baitu gunu ogurukujunda obu gulijwara okutajunda, kandi gunu ogurukufa obu gulijwara okutafa, nubwo ekyahandiikirwe kinu kirihikirra ekirukugamba ngu: “Okufa kumizirwe ebiro n’ebiro.” 55 “Okufa, obusinguzi bwawe buraha? Okufa, obusaalizi bw’omubuli gwawe buraha?” 56 Omubuli oguleeta okufa nikyo ekibi, kandi amaani g’ekibi nibyo Ebiragiro.* 57 Baitu Ruhanga asiimwe, habwokuba naatuha obusinguzi kuraba omu Mukama waitu Yesu Kristo.

58 Nahabweki ab’oruganda abagonzebwa, mugume, mutatengesebwa, mwikalege mwine bingi eby’okukora omu mulimo gwa Mukama waitu, nimukimanya ngu amaani ganyu tigarukufa busa omu Mukama waitu.