Ebbaruha ya Paulo Hali Abarooma
7 Ab’oruganda, (ningambira abo abamanyire ebiragiro*), timumanyire ngu Ebiragiro birema omuntu obu arukuba akyali mwomeezi? 2 Ekyokurorraho, omukazi ow’aswirwe aba hansi y’ekiragiro kya iba, iba obu arukuba akyali mwomeezi; baitu iba obu afa, aba atakyali hansi y’ekiragiro kye. 3 Nahabweki, iba obu arukuba akyali mwomeezi, akaswerwa omusaija ondi, ayetwa omusiihani. Baitu iba obu afa, aba atakyali hansi y’ekiragiro kye, nahabweki obu aswerwa omusaija ondi, aba atasiihaine.
4 Nahabweki, ab’oruganda, kuraba omu mubiri gwa Kristo, na inywe mukafa obukirukuhika ha birukukwata ha Biragiro nukwo musobole kufooka ab’ondi, ogu ayahumbwirwe kuruga omu bafu, nukwo twane ebyana hali Ruhanga. 5 Habwokuba obu tukaba nituhondera omubiri, okwegomba okubi okwasisiimurwaga Ebiragiro, kwakorraga omu mibiri yaitu nikwana ebyana eby’okufa. 6 Baitu hati tukalekerwa kuruga omu Biragiro, habwokuba tukafa hali eki ekikaba nikitulemesa, nukwo tusobole kuba bairu omu mulingo omuhyaka kuraba omu mwoyo hatali omu mulingo omukuru kuraba omu biragiro ebikaba bihandiikirwe.
7 Hati, tugambe ki? Ebiragiro biine ekibi? Nangwa! Mali tinaakumanyire ekibi, kakuba Ebiragiro bikaba bitaroho. Ekyokurorraho, tinaakumanyire ngu okwegomba kibi kakuba Ebiragiro bitaragambire biti: “Otalyegomba.” 8 Baitu ekiragiro kikaha ekibi omugisa kundeetera okwegomba okwa buli mulingo habwokuba nambere hatali ebiragiro ekibi kiba kifiire. 9 Amananu gali, nkaba ndi mwomeezi nambere hakaba hatali biragiro. Baitu ekiragiro obu kyaizire, ekibi kikongera kyafooka kyomeezi, baitu nyowe nafa. 10 Kandi ekiragiro ekikaba ky’okuleeta obwomeezi, nkakizoora ngu nikireeta okufa. 11 Habwokuba ekiragiro kikaha ekibi omugisa, ekibi kyansoonasoona kandi kyanyita kuraba omu kiragiro. 12 Nahabweki, Ebiragiro habwabyo nibyera, kandi ekiragiro nikyera, ky’okuhikirra kandi kirungi.
13 Hati tugambe ngu, ekirungi kikandeetera kufa? Nangwa! Baitu ekibi nikyo kyandeetiire kufa, nukwo kisobole kweyoleka ngu ekibi nikyo kyandeetiire okufa kuraba omu kirungi, nukwo ekibi kyeyongere kuzooka ngu kibi kuraba omu kiragiro. 14 Habwokuba tukimanyire ngu Ebiragiro by’eby’omwoyo, baitu nyowe ndi w’omubiri kandi nkatundwa omu kibi. 15 Habwokuba tindukwetegereza eki ndukukora. Habwokuba tinkora ebi ndukugonza, baitu nkora ebi ntarukugonza. 16 Baitu kakuba nkora ebi ntarukugonza, ninyikiriza ngu Ebiragiro birungi. 17 Baitu hati tali niinyowe arukubikora, baitu ekibi ekiri omuli nyowe. 18 Habwokuba nkimanyire ngu omu mubiri gwange tiharumu ekirungi kyona; habwokuba ngonza kukora ekirungi, baitu ndemwa okukikora. 19 Habwokuba tinkora ekirungi eki mba ningonza kukora, baitu ekibi eki mba ntarukugonza, nikyo nkora. 20 Hati, obu ndaaba ninkora eki ntarukugonza, ogu naaba atakyali nyowe arukukikora, baitu ekibi ekiri omuli nyowe.
21 Nindora ekiragiro kinu omuli nyowe, obu ngonza kukora ekihikire, ekibi kiba na nyowe. 22 Amananu gali, nsemerererwa ekiragiro kya Ruhanga omu mutima gwange, 23 baitu ndora ekiragiro ekindi omu mubiri gwange nikirwanisa ekiragiro ekiri omu biteekerezo byange, ekirukundeetera kuba mwiru w’ekiragiro ky’ekibi ekiri omu mubiri gwange. 24 Nyowe ndi musaija w’obujune! Nooha alinjuna omu mubiri ogurukundeetera okufa? 25 Ruhanga asiimwe kuraba omuli Yesu Kristo Mukama waitu! Nahabweki omu biteekerezo byange, ndi mwiru w’Ekiragiro kya Ruhanga, baitu omu mubiri gwange, ndi mwiru w’ekiragiro ky’ekibi.