Ebbaruha ya Paulo Hali Abarooma
4 Eki obu kiraaba nukwo kiri kiti, kiki isenkuruitwe Ibburahimu eki yatungire kusigikirra ha mubiri? 2 Ekyokurorraho, Ibburahimu kakuba yayeserwe ow’okuhikirra habw’ebikorwa bye, yaakubaire aine eky’okusigikirraho kwehaisaniza baitu hatali omu maiso ga Ruhanga. 3 Ekyahandiikirwe nikigamba ki? “Ibburahimu akaikiririza omuli Yahwe* kandi yabarwa nk’ow’okuhikirra.” 4 Baitu obukirukuhika ha muntu ow’arukukora omulimo, empeera ei aheebwa tebarwa nk’embabazi enyingi ezimwolekerwe baitu nk’ibanja erisemeriire kumusasurwa. 5 Harubaju orundi, omuntu ow’atakora mulimo baitu akaikiririza omuli Ogu anyakweta omuntu atarukutiina Ruhanga ow’okuhikirra, abarwa nk’ow’okuhikirra habw’okwikiriza kwe. 6 Nkooku Daudi abazaaho okusemererwa kw’omuntu Ruhanga ou arora nk’ow’okuhikirra hatali habw’ebikorwa ati: 7 “Baine okusemererwa abo abaganyiirwe ebikorwa byabo ebibi kandi abaihirweho* ebibi byabo; 8 aine okusemererwa omuntu Yahwe* ou atalibarra ebibi bye.”
9 Abantu abasazirwe nubo batunga okusemererwa oku bonka rundi n’abatasazirwe? Habwokuba tugamba tuti: “Ibburahimu akabarwa nk’ow’okuhikirra habw’okwikiriza.” 10 Nyikara ki ei akaba arumu obu yabazirwe nk’ow’okuhikirra? Obu akaba asazirwe rundi atasazirwe? Akaba atakasazirwe hatali ngu akaba amazire kusarwa. 11 Kandi akatunga akokurorraho—oku nukwo okusarwa, nk’emanyikirizo ey’okuhikirra* habw’okwikiriza oku akaba aine atakasazirwe, nukwo asobole kuba ise abo boona abaine okwikiriza batakasazirwe, kusobora kubarwa nk’ab’okuhikirra; 12 kandi nukwo asobole kuba ise abo abasazirwe hatali abo bonka abaikiriza okusarwa, baitu n’abo boona abooleka okwikiriza nk’okwa isiitwe Ibburahimu oku akaba aine atakasazirwe.
13 Ibburahimu n’oruzaaro rwe* bakaheebwa omurago ogw’okugwetwa ensi, habw’okuhikirra kwe yagutunga habw’okwikiriza hatali habw’ebiragiro.* 14 Abo abahondera ebiragiro obu baraaba bali bagwetwa, okwikiriza nikuba kutakyaine mugaso, n’omurago niguba guhoireho. 15 Amananu gali, Ebiragiro bireeta ekiniga kya Ruhanga, baitu nambere hatali ebiragiro tihabaho okusiisa.
16 Egi niyo ensonga habwaki omurago ogu gwatuhairwe kuraba omu kwikiriza, nukwo kibe kusigikirra ha mbabazi ze enyingi muno, kandi oruzaaro rwa* Ibburahimu rwona rusobole kutunga omurago, hatali abo bonka abarukworobera Ebiragiro, baitu n’abo abaine okwikiriza nk’okwa Ibburahimu anyakuli isiitwe itwena. 17 (Nkooku kyahandiikirwe kiti: “Nkukomere kuba ise amahanga maingi.”) Kinu kikabaho omu maiso ga Ruhanga ou yaikiririzaamuga ow’ahumbuura abafu kandi ebintu ebitaroho abibazaaho nk’ebiroho kwo.* 18 Noobu kiraaba ngu akaba ataine eky’okusigikirraho kuba n’okunihira, akanihira kandi akaba aine okwikiriza ngu alifooka ise amahanga maingi kusigikirra ha kikaba kigambirwe kiti: “Nukwo oruzaaro* rwawe ruliba ruti.” 19 Noobu kiraaba ngu okwikiriza kwe kutaceke, akarora omubiri gwe guli nk’ogufiire (habwokuba akaba ahikize nk’emyaka 100), kandi na mukazi we Saara akaba ali ngumba. 20 Baitu habw’omurago gwa Ruhanga, ataceke omu kwikiriza baitu akafooka w’amaani habw’okwikiriza kwe, yanyumiza Ruhanga 21 kandi akaba naakigumiza kimu ngu Ruhanga eki akaba amuraganiize, akaba naasobora kukikora. 22 Nahabweki, “akabarwa nk’ow’okuhikirra.”
23 Baitu ekigambo “akabarwa,” kitahandiikwe habwe wenka, 24 baitu na habwaitu abarukwija kubarwa nk’ab’okuhikirra, habwokuba nitwikiririza omuli Ogu ayahumbwire Yesu Mukama waitu kuruga omu bafu. 25 Akaheebwayo habw’ebibi byaitu, kandi yahumbuurwa nukwo tusobole kwetwa ab’okuhikirra.