Ebbaruha ya Paulo Hali Abagaratiya
4 Hati nimbagambira ngu kakuba omugwetwa aba akyali mwana muto, naaba ataine mbaganiza hali omwiru noobu kiraaba ngu nuwe mukama w’ebintu byona, 2 baitu aba hansi y’abaroleerezi hamu n’abakeeto kuhikya akasumi ise aka yataireho. 3 Omu mulingo nugwo gumu, na itwe obu tukaba tuli baana, tukaba tuli bairu habw’ebintu eby’okubandizaaho eby’omu nsi. 4 Baitu akasumi akaatairweho obu kaahikire, Ruhanga akatuma Omwana we, ayazairwe omukazi kandi ow’akaba ali hansi y’ebiragiro,* 5 nukwo asobole kucungura abo abali hansi y’ebiragiro kuraba omu kubagura nukwo tufooke abaana.
6 Habwokuba hati tuli baana, Ruhanga asindikire omwoyo gw’Omwana we omu mitima yaitu kandi gutokera haiguru nigugamba guti: “Abba,* Isiitwe!” 7 Nahabweki timukyali bairu, baitu muli baana kandi obu muraaba muli baana, muli bagwetwa kuraba omuli Ruhanga.
8 Baitu obu mukaba mutamanyire Ruhanga, mukaba muli bairu b’abo abatali baruhanga bonyini. 9 Baitu hati obu mumanyire Ruhanga, rundi nkooku Ruhanga abamanyire, hati kiija kita ngu mugarukiire ebintu ebiceke eby’okubandizaaho ebitaine mugaso, kandi nimugonza kwongera kufooka bairu babyo? 10 N’obwegendereza nimujaguza ebiro, emyezi, obusumi hamu n’emyaka. 11 Nyeraliikiriire habwanyu ngu ninsobora kuba nabasiisiireho amaani gange.
12 Ab’oruganda, nimbasaba mufooke nka nyowe habwokuba na nyowe nkaba ndi nka inywe. Mutankole kibi kyona. 13 Baitu mukimanyire ngu habw’oburwaire bwange, nkatunga omugisa ogw’okubatebeza amakuru amarungi habw’omurundi ogw’okubanza. 14 Noobu kiraaba ngu oburwaire bwange bukaba buli kirengo hali inywe, mutanyeganye rundi kunnuga,* baitu mukantangirra nka malaika wa Ruhanga, kandi nka Kristo Yesu. 15 Okusemererwa oku mukaba mwine, kuli nkaha? Habwokuba nimbaheera obwakaiso ngu kakuba kikaba nikisoboka, mwakwihiremu amaiso ganyu mugampa. 16 Hati, nfookere munyanzigwa waanyu, habw’okubagambira amananu? 17 Beekamba kubasoonasoona hatali habw’ekigendererwa ekirungi, baitu nibagonza munyecweho, nukwo musobole kuba n’ekihika eky’okubahondera. 18 Baitu kirungi obwire bwona omuntu kwekamba kubagarra harubaju rwe habw’ekigendererwa ekirungi, hatali obu ndukuba ndi na inywe honka, 19 inywe abaana bange abato abongiire kundeetera ebisa eby’okwongera kuzaara, kuhikya Kristo obu alyeyolekera* omuli inywe. 20 Hati naakugondeze kuba na inywe kandi mbaze omu mulingo ogundi, habwokuba nimumpuniiriza muno.
21 Mungambire inywe abarukugonza kuba hansi y’ebiragiro; Timumanyire Ebiragiro eki birukugamba? 22 Ekyokurorraho, kikahandiikwa ngu Ibburahimu akaba aine abaana babiri, omu akamuzaara omu muzaana, kandi ondi yamuzaara omu mukazi ow’obugabe; 23 ogu ou yazaire omu muzaana akazaarwa nk’abaana abandi boona, baitu omwana ow’omukazi ow’obugabe akazaarwa kuraba omu murago. 24 Ebintu binu by’akokurorraho habwokuba abakazi banu, nibamanyisa ebiragaano bibiri, ekiragaano* eky’okubanza nikyo ekyakozerwe ha Rusozi Sinai, ekirukuzaara abaana ab’obwiru, kandi ogu nuwe Hagara. 25 Hati, Hagara naamanyisa Sinai orusozi oruli omu Buharabbu kandi naalengesanizibwa na Yerusaalemu ey’eroho kasumi kanu, kandi ali omu bwiru hamu n’abaana be. 26 Baitu Yerusaalemu eya haiguru y’obugabe kandi nuwe nyinaitwe.
27 Habwokuba kikahandiikwa kiti: “Semererwa iwe omukazi engumba atarukuzaara; tokera haiguru n’okusemererwa iwe omukazi atarumwa bisa; habwokuba abaana b’omukazi ayalekerweho baingi muno, kukira abo ab’omukazi ow’aine iba.” 28 Hati inywe ab’oruganda muli baana b’omurago nkooku Isaka na uwe akaba ali. 29 Baitu ogu ayazairwe nk’abaana abandi boona, nkooku yatandikire kuhiiganiza ogu ayazairwe kuraba omu mwoyo, nukwo kiri na hati. 30 Baitu ekyahandiikirwe kigamba kita? “Binga omuzaana n’omwana we, habwokuba omwana w’omuzaana taliba mugwetwa hamu n’omwana w’omukazi ow’obugabe.” 31 Nahabweki ab’oruganda, tuli baana ab’omukazi ow’obugabe hatali ab’omuzaana.