Ebbaruha ya Paulo Hali Abarooma
3 Hati, kiki Omuyudaaya eki arukukiza abandi, rundi okusarwa nikugasa ki? 2 Naabakira omu miringo nyingi. Eky’okubanza, Abayudaaya nubo baakwasiibwe ebigambo bya Ruhanga ebirukwera. 3 Baitu hati, tugambe ki? Abamu obu baraaba baalemerwe kuba n’okwikiriza, bo obutaba n’okwikiriza, nikimanyisa ngu Ruhanga na uwe tali mwesigwa? 4 Amananu gali ngu nangwa! Ruhanga aikara ali w’amananu, buli muntu weena noobu aba mubiihi w’ebisuba, nkooku kyahandiikirwe kiti: “Nukwo osobole kukyolekera kimu ngu oli w’okuhikirra omu bigambo byawe, kandi osinge obu oba noocwerwa omusango.” 5 Baitu obutahikirra bwaitu obu buraaba nibwoleka okuhikirra kwa Ruhanga, hati itwe tugambe ki? Ruhanga obu ayoleka ekiniga kye, eki kimanyisa ngu tali w’obwinganiza? (Nimbaza nkooku abantu babaza.) 6 Nangwa! Hati, Ruhanga obu araaba atali w’obwinganiza, araacwera ata ensi omusango?
7 Baitu obu kiraaba ngu kuraba omu kisuba kyange amananu ga Ruhanga geeyongiire kwolekwa n’okumuhaisa ekitiinisa, habwaki nincwerwa omusango nk’omusiisi? 8 Habwaki tutagamba nk’abantu abamu okubatuhangirra ngu itwe tugamba ngu: “Leka tukole ebintu ebibi nukwo ebirungi biije”? Omusango ogucwerwa abantu abo gw’obwinganiza.
9 Hati tugambe ki ekindi? Itwe Abayudaaya nitukira abandi? Nangwa! Habwokuba tukyolekere ngu Abayudaaya n’Abayonaani, boona nibalemwa ekibi; 10 nkooku kyahandiikirwe kiti: “Busaho muntu ow’ahikiriire, noobu yaakuba omu, 11 tiharoho n’omu anyakwine okwetegereza kwona; tiharoho n’omu arukuserra Ruhanga. 12 Abantu boona bahabire, boona bafookere abataine mugaso; busaho n’omu hali bo arukwoleka embabazi, noobu yaakuba omu wenka.” 13 “Emimiro yabo kiri kituuro ekyesamire; babiiha ebisuba n’endimi zaabo.” “Omu kanwa kaabo harugamu obusegwa bw’enjoka.” 14 “Kandi akanwa kaabo kaijwiremu okukyena n’okusarra.” 15 “Ebigere byabo birahuka kuseesa esagama.” 16 “Omu byona ebi bakora baleetaho* okuhwerekerra n’obujune, 17 kandi tibamanyire omuhanda ogw’obusinge.” 18 “Tibatiina Ruhanga.”*
19 Hati tukimanyire ngu byona ebirukubazibwaho omu Biragiro nibikwataho abo abali hansi y’Ebiragiro,* nukwo buli kanwa koona kaculeezebwe kandi kyolekwe ngu ensi yoona ine omusango omu maiso ga Ruhanga kandi ngu esemeriire kufubirwa. 20 Nahabweki, busaho n’omu alyetwa ow’okuhikirra omu maiso ge habw’okukora ebiri omu biragiro,* habwokuba ebiragiro bikoonyera omuntu kumanya kurungi ekibi.
21 Baitu hati Ruhanga ayolekere okuhikirra kwe okutarukusigikirra ha biragiro, nkooku Ebiragiro na Banabbi biha obwakaiso, 22 kandi abo boona abaine okwikiriza, bahika ha kuhikirra kwa Ruhanga kuraba omu kwikiririza omuli Yesu Kristo. Habwokuba busaho kusoroora. 23 Habwokuba boona bakasiisa kandi baalemwa kuhika ha kitiinisa kya Ruhanga, 24 kandi habw’ekisembo ekya busa ekyahairwe, beetwa ab’okuhikirra habw’embabazi ze enyingi muno kuraba omu kulekerwa okurukusigikirra ha kicunguro Yesu Kristo eki yasaswire. 25 Ruhanga akamuhayo nk’ekihongwa eky’okulihirra, yatuteeraho omuhanda ogw’okugarraho enkoragana yaitu na Uwe, kuraba omu kwikiririza omu sagama ya Yesu. Kinu Ruhanga akakikora kwoleka okuhikirra kwe habwokuba omu kugumiisiriza kwe akaba naaganyira ebibi ebyakozerwe kara. 26 Akaba naagonza kwoleka okuhikirra kwe omu kasumi kanu, nukwo asobole kweta omuntu arukwikiririza omuli Yesu, ow’okuhikirra.
27 Hati, tusemeriire kwehaisaniza? Nangwa! Kiragiro ki ekitarukutwikiriza kwehaisaniza? Eky’ebikorwa? Amananu gali, nangwa, baitu ekiragiro eky’okwikiriza. 28 Habwokuba tukitwara ngu omuntu ayetwa ow’okuhikirra habw’okwikiriza, hatali habw’okukora ebiri omu biragiro. 29 Rundi ali Ruhanga w’Abayudaaya bonka? N’abantu ab’amahanga tali Ruhanga wabo? Ego, n’abantu ab’amahanga na bo ali Ruhanga wabo. 30 Nkooku Ruhanga ali omu, alyeta abantu abasazirwe ab’okuhikirra habw’okwikiriza kwabo, kandi n’abatasazirwe alibeeta b’okuhikirra habw’okwikiriza kwabo. 31 Hati turaihaho ebiragiro habw’okwikiriza kwaitu? Nangwa! Oihireho, tugumya ebiragiro.