Ebbaruha ya Paulo ey’Okubanza Hali Timoseo
3 Ebigambo binu nibyesigwa: Omusaija weena obu ayekamba kufooka omuroleerezi,* aba ayegombere omulimo omurungi. 2 Nahabweki, omuroleerezi asemeriire kuba muntu ow’ataine eki arukujunaanwa, aine omukazi omu, naayetanga omu byona, naayetegereza kurungi,* arukukora ebintu omu mulingo oguteekaniziibwe kurungi, ow’amakune, amanyire kwegesa kurungi, 3 atali mutamiizi, atagonza kurwana,* arukwetegereza, atakungana, atagonza muno sente, 4 arukwebembera* kurungi eka ye, aine abaana abahulizi kandi abaine engeso enungi 5 (habwokuba omusaija obu araaba atamanyire omulingo ogw’okwebemberamu eka ye, araasobora ata kurolerra* ekitebe kya Ruhanga?), 6 ataba muntu ayaakahinduka, habwokuba naasobora kutunga emyehembo, kandi akacwerwa omusango ogwacweriirwe Sitaani.* 7 Ekindi, asemeriire kuba naabazibwaho kurungi abantu ab’aheeru,* nukwo atajumwa kandi akagwa omu mutego gwa Sitaani.*
8 Abaheereza* na bo basemeriire kuba ab’obujunaanizibwa, abatarukubaza ebisuba,* abatarukunywa amaarwa maingi, abataine mururu, kandi abatarukukozesa obugobya kutunga ebi barukugonza, 9 nibakwatira kimu ensita erukwera* ey’okwikiriza baine omuntu ow’omunda omwecumi.
10 Kandi leka babanze balengesebwe kurora obu baraaba basemeriire; nukwo hanyuma bakomwe nk’abaheereza, habwokuba tibaine eki barukujunaanwa.
11 Abakazi na bo basemeriire kuba ab’obujunaanizibwa, abatarukuhangirra abandi, abarukwetanga omu ngeso zaabo, kandi abeesigwa omu byona.
12 Omuheereza* asemeriire kuba aine omukazi omu, kandi naayebembera kurungi eka ye hamu n’abaana be. 13 Habwokuba abasaija abaheereza kurungi, baba nibeekorra ibara erirungi nukwo basobole kubaza ha kwikiriza kwabo omu Kristo Yesu batarukutiina.
14 Nakuhandiikira ebintu binu, noobu kiraaba ngu ninnihira kwija oku omu bwire obutali bwa hara, 15 baitu kakuba nkeerererwa, osobole kumanya omulingo oraayetwazaamu omu ka ya Ruhanga, kandi eki nikyo ekitebe kya Ruhanga omwomeezi, ekinyakuli enyomyo* y’amananu kandi ekigasagika. 16 Mananu kwo ensita erukwera* enu ey’okwemarra hali Ruhanga nkuru muno: ‘Akazookera omu mubiri, yarangirirwa omu mwoyo ngu ahikiriire, yabonekera bamalaika, yatebezebwaho omu mahanga, ab’omu nsi baamwikiriza, kandi yatangirirwa omu kitiinisa.’