Ebbaruha ya Paulo eya Kabiri Hali Abakolinso
1 Nyowe Paulo, omukwenda wa Kristo Yesu nkooku Ruhanga yagondeze, hamu na Timoseo ow’oruganda mugenzi waitu, nimpandiikira abali omu kitebe kya Ruhanga ekiri omu Kolinso, otwaliiremu n’abarukwera boona abali omu Akaya yoona:
2 Embabazi enyingi muno* hamu n’obusinge kuruga hali Ruhanga Isiitwe, na hali Mukama waitu Yesu Kristo bibe na inywe.
3 Asiimwe Ruhanga kandi Ise Mukama waitu Yesu Kristo, Isiitwe ow’okuganyira kandi Ruhanga ow’okuhuumuza kwona, 4 ow’atuhuumuza* omu mihito yaitu yoona, nukwo na itwe tusobole kuhuumuza abandi abali omu mihito n’okuhuumuzibwa oku tutunga kuruga hali Ruhanga. 5 Habwokuba nitubonabona muno habwa Kristo, okuhuumuzibwa oku tutunga kuraba omuli uwe nakwo kwingi. 6 Obu tuhikwaho ebirengo,* bituhikaho nukwo musobole kuhuumuzibwa n’okujunwa, ekibakoonyera na inywe kugumiisiriza okubonabona na itwe okutuhikaho. 7 Kandi okunihira oku twine omuli inywe kugumire muno, habwokuba tukimanyire nkooku murukubonabona hamu na itwe, na inywe nimwija kuhuumuzibwa hamu na itwe.
8 Ab’oruganda, nitugonza mumanye emihito ei twarabiremu omu isaza lya Asiya. Tukabonabona muno ekihinguraine kuhika harulengo ngu tukaba tutakyamanya obu turaasigara tuli boomeezi. 9 Amananu gali, tukeehurra nk’abacweriirwe ogw’okufa. Kinu kikabaho nukwo tuteeyesiga itwenka, baitu twesige Ruhanga ow’ahumbuura abafu. 10 Akatujuna kuruga omu kabi ak’amaani ak’okufa kandi naija kutujuna, n’okunihira kwaitu omuli uwe kuli ngu, naija kugumizaamu naatujuna. 11 Na inywe nimusobora kutukoonyera kuraba omu kutwesengerereza, nukwo baingi basobole kusiima habwaitu habw’embabazi ezitwolekwa omu kugarukamu okusaba kwa baingi.
12 Habwokuba ekintu eki turukwenyumiririzaamu nikyo kinu, omuntu waitu ow’omunda naatuheera obwakaiso ngu, omulingo twayetwaizeemu omu nsi kukira muno omuli inywe, gukaba ogurukwera kandi ogutali gw’obugobya, tuteesige amagezi g’abantu baitu embabazi za Ruhanga enyingi muno. 13 Titurukubahandiikira ekintu ekindi kyona, oihireho ebi musobora kusoma,* mukeetegereza, kandi ninnihira ngu nimwija kugumizaamu nimwetegereza ebintu binu omu bwijwire,* 14 nkooku mwayetegeriize ngu niitwe abarukubaleetera kwenyumiza nkooku na inywe mulituleetera kwenyumiza ha kiro kya Mukama waitu Yesu.
15 Habwokuba ningumya kinu, nkaba ningonza kubanza kwija nambere muli, nukwo mwongere musemererwe habw’omurundi ogwa kabiri;* 16 habwokuba nkaba ningonza kubabungira obu nkaba ningenda Makedoni, hanyuma nyongere mbarole ninduga Makedoni, hanyuma mundage ngende Buyudaaya. 17 Obu nkaba nyine ekigendererwa eki, ntakitwale nk’ekikuru? Rundi ebi nteekaniza kukora, mbikora nk’omuntu ow’omubiri, nukwo ningamba “Ego,” hanyuma ningamba “Nangwa”? 18 Baitu nkooku Ruhanga ali mwesigwa, ebi twabagambiire bikaba bitali “ego” kandi hanyuma byaba “nangwa.” 19 Habwokuba Omwana wa Ruhanga Yesu Kristo ayatebeziibwe omuli inywe kuraba omuli nyowe, Sirwano,* hamu na Timoseo, atafooke “ego” kandi hanyuma yafooka “nangwa,” baitu omuli uwe “ego” efookere “ego.” 20 Noobu kiraaba ngu emirago ya Ruhanga nyingi, efookere “ego” kuraba omuli Yesu. Nahabweki, kuraba omuli uwe tugamba “Amiina” hali Ruhanga, ekimuleetera kunyumizibwa kuraba omuli itwe. 21 Baitu ogu ow’arukukigumya ngu inywe hamu na itwe tuli ba Kristo, kandi ogu ayatuseesereho amagita* nuwe Ruhanga. 22 Atutaireho emanyikirizo* ye kandi atuhaire obwakaiso hali eki ekirukugenda okwija kandi ogu nugwo omwoyo oguli omu mitima yaitu.
23 Hati niinnyeta Ruhanga okuba kaiso wange, habwokuba ntagonze mweyongere kusaasa, niyo ensonga habwaki ntaraizire omu Kolinso. 24 Tikiri ngu twine obusobozi ha kwikiriza kwanyu, baitu tuli bakozi bagenzi banyu habw’okusemererwa kwanyu, habwokuba mwemeriire habw’okwikiriza kwanyu.