Ebbaruha ya Paulo ey’Okubanza Hali Abakolinso

8 Obukirukuhika ha byokulya ebihongiirwe ebisisani, itwena tumanyire kurungi ebirukukwata ha nsonga enu. Okumanya kuleeta emyehembo, baitu okugonza kwombeka. 2 Kakuba omuntu ateekereza ngu amanyire ekintu, aba atakimanyire nkooku asemeriire kukimanya. 3 Baitu omuntu weena obu aba naagonza Ruhanga, omuntu ogu aba amanyirwe Ruhanga.

4 Hati, obukirukuhika ha kulya ebyokulya ebihongiirwe ebisisani, tukimanyire ngu ebisisani tibiine mugaso omu nsi kandi ngu busaho Ruhanga ondi weena oihireho omu wenka. 5 Noobu kiraaba ngu haroho abarukwetwa baruhanga, ka babe omu iguru rundi omu nsi, nkooku haroho “baruhanga” baingi na “bamukama” baingi, 6 amananu gali, hali itwe haroho Ruhanga omu, Isiitwe nambere ebintu byona biruga, na itwe turoho habwe; kandi haroho Mukama waitu omu, Yesu Kristo, ebintu byona bikahangwa kuraba omuli uwe, kandi na itwe tukahangwa kuraba omuli uwe.

7 Baitu tibali boona abamanyire ebintu ebi. Baitu habwokuba baingi ha kubanza baaramyaga ebisisani, nibalya ebyokulya ebihongiirwe ebisisani, kandi habwokuba omuntu wabo ow’omunda muceke, asiisikara. 8 Baitu ebyokulya tibisobora kutwiriza haihi na Ruhanga; kakuba tutalya, titufeerwa kintu kyona, kandi obu tulya titwongerwaho kintu kyona. 9 Mwerindege nukwo obugabe bwanyu obw’okucwamu butafooka ekintu ekirukutabaijura hali abo abaceke. 10 Kakuba omuntu arora iwe ow’amanyire ebintu ebi, nooliira omu yekaru y’ebisisani, omuntu ow’omunda ow’omuntu omuceke, talimuleetera kulya ebyokulya ebihongiirwe ebisisani? 11 Nahabweki, habw’okumanya kwawe, ow’oruganda omuceke Kristo ou yafeeriire aliyo naahwerekerra.* 12 Obu osiisira ab’oruganda bagenzi baawe omu mulingo gunu kandi okahutaaza omuntu wabo ow’omunda omuceke, oba noosiisira Kristo. 13 Egi niyo ensonga habwaki kakuba ebyokulya biba nibitabaijura ow’oruganda mugenzi wange, tindyongerra kimu kulya enyama naakake, nukwo ntaleetera ow’oruganda mugenzi wange kutabaijuka.