Nk’oku Yahandiikirwe Matayo
21 Obu bairiire haihi na Yerusaalemu, kandi bahikire Besifage ha Rusozi rw’Emizaituuni, Yesu yatuma abeegeswa babiri, 2 naabagambira ati: “Mugende omu kyaro kiri eki murukurora, obu muraaba mwakataahamu muti, nimwija kurora endogoya esibikirwe eri n’omwana gwayo. Muzisumurre muzindeetere. 3 Omuntu weena obu araabakaguza mumugambire ngu: ‘Mukama waitu naazetaaga.’ Ahonaaho naija kuzibaha.”
4 Kinu kikabaho kuhikiiriza ebyabaziibwe kuraba omu nabbi, ayagambire ati: 5 “Gambira omuhara wa Sayuni* oti: ‘Dora! Omukama waawe naija nambere oli, kandi muculeezi aikaliire ha ndogoya, ego, na ha mwana gw’endogoya.’”
6 Nahabweki, abeegeswa bakagenda baakora nkooku Yesu akaba abaragiire. 7 Baaleeta endogoya n’omwana gwayo, baazaaraho ebijwaro byabo ebya haruguru hanyuma yaikarraho. 8 Abantu baingi baayara ebijwaro byabo ebya haruguru omu muhanda, kandi abandi baacwa amataagi g’emiti baaganjara omu muhanda. 9 Baitu abantu abaali bamwebeembiire, n’abo abakaba nibamuhondera, bakaba nibatokera haiguru nibagamba ngu: “Nitusaba, ojune, Omwana wa Daudi! Aine omugisa ogu ow’aizira omu ibara lya Yahwe!* Nitusaba iwe anyakuli omu iguru, omujune!”
10 Kandi obu yataahire omu Yerusaalemu, orubuga rwona rukabamu akaimukirro, abantu boona nibakaguza bati: “Ogu nooha?” 11 Abantu bakaikara nibagamba bati: “Ogu ni nabbi Yesu kuruga Nazaleesi eya Galiraaya!”
12 Yesu yataaha omu yekaru, yabinga abo boona abaali nibatunda kandi nibagura ebintu omu yekaru, kandi yajuumika emeeza z’abo abaali nibahingisa sente, hamu n’entebe z’abo abaali nibatunda amaiba. 13 Kandi yabagambira ati: “Kikahandiikwa ngu: ‘Enju yange eryetwa enju ey’okusabiramu,’ baitu mugifoire obwingira bw’abasuma.” 14 Kandi abafu b’amaiso n’abalema bakaija nambere ali omu yekaru yabakiza.
15 Bakuru ba banyakatagara* hamu n’abahandiiki, obu baarozere ebintu ebirukuhuniiriza ebi yakozere, n’abaana abakaba bali omu yekaru nibatoka nibagamba ngu, “Nitusaba, ojune, Omwana wa Daudi!” baabiihirwa muno 16 kandi baamukaguza bati: “Noohurra banu eki baliyo nibagamba?” Yesu yabagarukamu ati: “Ego, timukasomaga ngu: ‘Oleetiire akanwa k’abaana abato n’enkerembe, okukukugiza’?” 17 Yabasigaho yagenda aheeru y’orubuga, kandi oku nuho yaraara.
18 Obu akaba naagaruka omu rubuga nyenkyakara muno, yarumwa enjara. 19 Yalengera omuti gw’omutiini harubaju rw’omuhanda, kandi yagenda nambere guli, baitu tiyasangaho ekijuma kyona, oihireho amababi gonka, kandi yagugambira ati: “Tolyongera kwana ekijuma kyona ebiro n’ebiro.” Kandi ahonaaho omuti gwayoma. 20 Abeegeswa be obu baaboine eki, baahunirra muno kandi baamukaguza bati: “Kisobokere kita omuti omutiini kwoma ahonaaho?” 21 Yesu yabagarukamu ati: “Mananu kwo nimbagambira nti, obu muraaba mwine okwikiriza kandi mutarukugurukyagurukya, timuligarukira ha kukora eki nkozere omuti gw’omutiini, baitu noobu muligambira orusozi muti: ‘Ruga hanu ogwe omu nyanja,’ nukwo kiriba kiti. 22 Kandi ebintu byona ebi musaba mwine okwikiriza, mulibiheebwa.”
23 Hanyuma y’okutaaha omu yekaru, bakuru ba banyakatagara hamu n’abakuru b’abantu, baija nambere ali obu akaba naayegesa, baamukaguza bati: “Obusobozi obw’okukora ebintu binu noobwiha nkaha? Kandi nooha yabukuhaire?” 24 Yesu yabagarukamu ati: “Na nyowe leka mbakaguze ekintu kimu; obu murangarukamu, na nyowe nubwo ndaabagambira nambere nyiha obusobozi obw’okukora ebintu binu: 25 Yohaana akaiha nkaha obusobozi obw’okubatiza? Kuruga omu iguru rundi hali abantu?” Baatandika kugambirangana bonka bati: “Obu turaamugarukamu ngu: ‘Kuruga omu iguru,’ na uwe naija kutukaguza ati: ‘Habwaki mutaramwikiriize?’ 26 Baitu obu turaamugarukamu ngu: ‘Kuruga hali abantu,’ nitutiina ekitebe ky’abantu, habwokuba boona batwara Yohaana nka nabbi.” 27 Nahabweki baagarukamu Yesu bati: “Titumanyire.” Na uwe yabagambira ati: “Na nyowe tindukwija kubagambira nambere nyiha obusobozi obw’okukora ebintu binu.
28 “Nimuteekereza ki? Omusaija akaba aine abaana babiri. Yahikirra ow’okubanza, yamugambira ati: ‘Mwana wange, kiro kinu genda okole omu musiri gw’emizabbibbu.’ 29 Omwana yamugarukamu ati: ‘Tindukugyayo,’ baitu hanyuma yayegarukamu yagenda, omu musiri. 30 Yahikirra omwana owa kabiri, yamugambira ekintu nikyo kimu. Onu yamugarukamu ati: ‘Niinyija kugenda,’ baitu tiyagenda. 31 Hali banu babiri, nooha ayakozere isebo eki arukugonza?” Baamugarukamu bati: “Ow’okubanza.” Yesu yabagambira ati: “Mananu kwo nimbagambira nti, abasorooza b’omusoro na bamalaaya, nibaija kubabanza kutaaha omu Bukama bwa Ruhanga. 32 Yohaana akaija hali inywe naabooleka omuhanda ogw’okuhikirra, baitu mutamwikirize. Baitu abasorooza b’omusoro na bamalaaya bakamwikiriza, noobu mwarozere eki, muteegarukemu kumwikiriza.
33 “Muhurre orufumo orundi: Hakaba haroho omusaija ow’akaba aine ekibanja kye, ayabyaire omusiri ogw’emizabbibbu, yagwetorooza orugo, yalima ah’okujungira eviini, yayombeka omunaara, kandi omusiri yagusigira abalimi kugurolerra, hanyuma yagenda omu ihanga erindi. 34 Akasumi ak’okunoga emizabbibbu obu kaahikire, yatuma abairu be hali abalimi kugenda kunoga emizabbibbu. 35 Baitu abalimi baakwata abairu be baabateera, abandi baabaita, kandi abandi baabateera amabaale. 36 Yayongera yatuma abairu abandi abarukukira ab’okubanza, baitu na bo baabakora ebintu nibyo bimu. 37 Ha kumalirra yatuma mutabani we naagamba ati, ‘Mutabani wange nibaija kumutamu ekitiinisa.’ 38 Obu baarozere omutabani, abalimi baagambirangana bonka bati: ‘Onu nuwe omugwetwa. Mwije, tumwite nukwo tutwale obugwetwa bwe!’ 39 Nahabweki baamukwata, baamunaga aheeru y’omusiri, kandi baamwita. 40 Mukama w’omusiri obu aliija, abalimi abo alibakorra ki?” 41 Baamugarukamu bati: “Habwokuba abalimi abo babi, alibahwerekereza kandi omusiri agukwase abalimi abandi, abaraamuha emizabbibbu akasumi obu karaahika.”
42 Yesu yabagambira ati: “Timukasomaga omu Byahandiikirwe ngu: ‘Ibaale abombeki eri baayangire, niryo lifookere ibaale erikuru erya ha nsonda.* Linu lirugire hali Yahwe,* kandi nirihuniiriza omu maiso gaitu’? 43 Enu niyo ensonga habwaki nimbagambira nti, Obukama bwa Ruhanga bulibaihwaho, buheebwe ihanga erirukwana ebijuma. 44 N’omuntu arukugwa ha ibaale eri alisasangurwa. Kandi weena ou lirigwera, lirimusasangura.”
45 Bakuru ba banyakatagara hamu n’Abafalisaayo obu baahuliire enfumo ze, baakimanya ngu nubo akaba naabazaaho. 46 Noobu kiraaba ngu bakagonza kumukwata, bakatiina ekitebe ky’abantu habwokuba baamutwaraga kuba nabbi.