Ebbaruha ya Paulo eya Kabiri Hali Abasesalonika
2 Baitu ab’oruganda, obukirukuhika ha birukukwata ha kubaho* kwa Mukama waitu Yesu Kristo, n’okusoroozebwa kwaitu hali uwe, nitubasaba 2 mutanguha kutengesebwa mukaruga ha nteekereza yanyu kandi mutanguha kujabirra* habw’okuhurra ekigambo ekitereekereziibwe* rundi obutumwa oburukubazibwa rundi habw’ebbaruha ey’erukuzooka nk’ey’erugire hali itwe, nimumanyisibwa ngu ekiro kya Yahwe* kihikire.
3 Hatabaho n’omu ayabahabisa omu mulingo gwona habwokuba ekiro eki tikirihika rundi buli abeecwireho* okuramya okw’amananu bamazire kwija, hamu n’omwemi, omwana w’okuhwerekerra amazire kwolekwa. 4 Ahakaniza kandi ayenyumiza hali weena ow’ayetwa ruhanga rundi n’ekintu kyona ekiramibwa nukwo aikarre omu heema ya Ruhanga, naayeyoleka omu rwijwire ngu nuwe ruhanga. 5 Timurukwijuka ngu obu nkaba nkyali na inywe, nabagambiraga ebintu binu?
6 Kandi hati mumanyire ekirukumutanga kuzooka, nukwo ayolekwe akasumi ke akahikire obu kalihika. 7 Ky’amananu ngu kasumi kanu obwemi bunu buroho omu nsita kandi nibukora omulimo, baitu nibwija kwikara buti, kuhikya ogu arukumutanga hati obu alirugaho. 8 Hanyuma, omwemi alyolekwa, Mukama waitu Yesu ou alihwerekereza n’omwoyo ogw’akanwa ke kandi amuhwerekereze n’okwolekwa okw’okubaho kwe. 9 Baitu okubaho kw’omwemi kuleserweho Sitaani naakozesa buli kikorwa kyona eky’amaani, obwokurorraho obw’ebisuba, ebirukuhuniiriza 10 hamu n’okutahikirra kwona, n’ebisuba ebya buli mulingo hali abo abarukuhwerekerra nk’ekifubiro habwokuba bataikirize kugonza amananu nukwo basobole kujunwa. 11 Enu niyo ensonga habwaki Ruhanga abaleka bahabisibwe, baikirize ebisuba 12 nukwo boona bacwerwe omusango, habwokuba bataikirize amananu baitu bakasemerererwa omu butahikirra.
13 Baitu itwe, tusemeriire kusiima Ruhanga butoosa habwanyu, ab’oruganda abarukugonzebwa Yahwe,* habwokuba kuruga ha kubanza Ruhanga akabakomamu nukwo mujunwe kuraba omu kubeeza n’omwoyo gwe na habw’okwikiriza kwanyu omu mananu. 14 Akabeetera eki kuraba omu makuru amarungi aga turukurangirra, nukwo musobole kutunga ekitiinisa ekya Mukama waitu Yesu Kristo. 15 Nahabweki ab’oruganda, mwemerre mugumire kandi mwikale mukwatiire kimu ebi mwayegesiibwe ka kibe kuraba omu bigambo rundi omu bbaruha ezi twabahandiikiire. 16 Ekindi, leka Mukama waitu Yesu Kristo na Ruhanga Isiitwe, ayatugondeze yatuha okuhuumuzibwa okutahwaho n’okunihira okurungi kuraba omu mbabazi ze enyingi muno,* 17 ahuumuze emitima yanyu kandi abagumye omu buli kikorwa kyona ekirungi n’omu buli kigambo kyona.