Ebbaruha ya Paulo Hali Abagaratiya
2 Hanyuma y’emyaka 14, nkongera nagenda Yerusaalemu ndi na Bbaranabba, kandi na Tito nkagenda na uwe. 2 Nkagendayo habw’okusuukururwa oku natungire, kandi nabagambira amakuru amarungi aga ndukutebeza hali amahanga. Baitu kinu nkakikora omu nsita, omu maiso g’abasaija abaatwarwaga kuba b’ekitiinisa muno, nukwo nkigumye ngu tinairukira busa rundi ngu nkaba ntairukiire busa. 3 Kandi na Tito ow’akaba ali na nyowe, atahambirizibwe kusarwa noobu kiraaba ngu akaba ali Muyonaani. 4 Baitu ensonga enu ekaijaho habw’ab’oruganda ab’ebisuba abaaleserwemu tutamanyire, abaataahiremu kutata obugabe obu turukwegondezaamu habw’okuba omu bumu na Kristo Yesu, nukwo basobole kutuforra kimu abairu. 5 Banu tutaboorobere noobu kwakuba habw’akacu kake,* nukwo amananu ag’amakuru amarungi gasobole kwikara omuli inywe.
6 Baitu obukirukuhika hali abo abaayetwaraga kuba b’omugaso—kyona eki baayetwaraga kuba, tikiri ky’embaganiza hali nyowe, habwokuba Ruhanga tahondera enzooka y’omuntu eya haruguru. Abasaija abo abaayetwaraga kuba b’omugaso bataanyongereho kintu kyona. 7 Oihireho, obu baarozere ngu mpairwe omulimo ogw’okutwara amakuru amarungi hali abo abatasazirwe, nkooku Petero yahairwe omulimo ogw’okugatwarra abasazirwe— 8 habwokuba ogu ayahaire Petero obusobozi obw’okuba omukwenda hali abo abasazirwe, na nyowe nuwe yampaire obusobozi obw’okuba omukwenda hali abamahanga. 9 Kandi obu baarozere embabazi enyingi muno ezanyolekerwe, Yakobbo, Keefa,* Yohaana, hamu n’abo abaazookaga kuba nk’enyomyo, baikiriza nyowe na Bbaranabba kukwataniza* hamu nukwo tugende hali abamahanga, baitu bo bagende hali abo abasazirwe. 10 Bakatusaba ekintu kimu kyonka ngu twikale nituteekerezaaho abanaku, kandi kinu na nyowe nikyo nyekambire kukora.
11 Baitu Keefa* obu yaizire Antyokiya, nkahakaniza maiso h’amaiso eki yakozere, habwokuba akaba ali omu nsobi. 12 Habwokuba abasaija abamu kuruga hali Yakobbo obu bakaba batakaizire, yalyaga hamu n’abantu ab’amahanga, baitu obu baizire, akaleka kulya na bo kandi yabeecwaho habw’okutiina abo abasazirwe. 13 Abayudaaya abandi na bo bakamweteeranizaaho omu bugobya bunu, kandi na Bbaranabba na uwe yabahondera omu bugobya bwabo. 14 baitu obu narozere ngu tibarukurubatira omu mananu ag’amakuru amarungi, nagambira Keefa* omu maiso gaabo boona nti: “Iwe Omuyudaaya obu oraaba nooyetwaza nk’abantu ab’amahanga, hatali nk’Abayudaaya, noosobora ota kuhambiriza abantu ab’amahanga kuhondera engeso ez’Abayudaaya?”
15 Itwe abaazairwe tuli Bayudaaya, kandi tutali basiisi abarukuruga omu mahanga, 16 tukimanyire ngu omuntu ayetwa ow’okuhikirra hatali habw’okukora ebiri omu biragiro,* baitu kuraba omu kwikiririza omuli Yesu Kristo kyonka. Nahabweki tutaire okwikiriza kwaitu omuli Kristo Yesu, nukwo twetwe ab’okuhikirra habw’okwikiririza omu Kristo, hatali habw’okukora ebiri omu biragiro,* habwokuba busaho n’omu alyetwa ow’okuhikirra habw’okukora ebiri omu biragiro.* 17 Hati na itwe obu turaaba niturorwa nk’abasiisi, obu nitugonza kwetwa ab’okuhikirra kuraba omu Kristo, hati Kristo naaba ali muheereza w’ekibi? Nangwa. 18 Ebintu byonyini ebi naseesere, kakuba nyongera kubyombeka, nimba ninyoleka ngu ndi musiisi. 19 Kuraba omu biragiro nkafa hali ebiragiro, nukwo nsobole kuba mwomeezi hali Ruhanga. 20 Ntiirwe emisumaali* ha muti* hamu na Kristo. Takyali nyowe arukwomeera, baitu Kristo nuwe arukwomeera omu bumu na nyowe. Amananu gali ngu obwomeezi obu ndukwomeera hati omu mubiri, ninyomeera habw’okwikiririza omu Mwana wa Ruhanga, ayangondeze kandi yayehayo habwange. 21 Tindukwanga embabazi za Ruhanga enyingi muno, habwokuba omuntu obu araaba afooka w’okuhikirra kuraba omu biragiro, Kristo naaba yafeeriire busa.