Ebbaruha ya Paulo Hali Abagaratiya
6 Ab’oruganda, kakuba omuntu ahaba baitu atakakimanyire, inywe abaine ebirukwetaagisa omu by’omwoyo mulengeho kutereekereza omuntu ogu omu mwoyo ogw’obuculeezi. Baitu mwerinde habwokuba na inywe nimusobora kwohebwa. 2 Mugumizeemu nimwetwekerahongana obulemeezi kandi omu mulingo gunu nimwija kuba nimuhikiiriza ekiragiro kya Kristo. 3 Kakuba omuntu weena ateekereza ngu wa haiguru kandi kunu taine eki ali, naaba naayebiihabiiha wenka. 4 Baitu leka buli omu ayekebiije ebikorwa bye, nubwo araaba n’eky’okusigikirraho kusemererwa habwe wenka, kandi atarukwerengesaniza n’omuntu ondi. 5 Habwokuba buli omu alyetweka omugugu gwe wenka.*
6 Ekindi, ogu weena arukwegesebwa ekigambo, abagane ebintu byona ebirungi n’ogu arukukyegesa.
7 Mutahabisibwa, Ruhanga tali w’okusekeereza habwokuba omuntu eki asiga, nikyo aligesa; 8 ogu ow’asiga naahondera omubiri gwe, aligesa okujunda kuruga omu mubiri gwe, baitu ogu ow’asiga naahondera omwoyo, aligesa obwomeezi obutahwaho kuruga omu mwoyo. 9 Nahabweki tutajwaha omu kukora ebirungi, habwokuba akasumi obu kalihika tuligesa kakuba tutajwaha. 10 Nahabweki, buli murundi turaatungaga omugisa,* leka tukorre boona ebirungi, baitu kukira muno abo aba tuli na bo omu kwikiriza.
11 Murole nkooku mbahandiikiire omu nyuguta enkooto ninkozesa omukono gwange.
12 Abo boona abarukugonza kweyoleka ngu barungi aheeru nubo barukulengaho kubahambiriza kusarwa,* kandi nibakora eki nukwo beetantale kuhiiganizibwa habw’omuti* gwa Kristo. 13 Habwokuba n’abo abarukusarwa, na bo bonka tibahondera Ebiragiro,* baitu nibagonza musarwe nukwo basobole kuba n’eky’okusigikirraho kwehaisa habw’emibiri yanyu. 14 Nyowe habwange tinaakugondeze kwehaisa, rundi buli omu muti gwa Mukama waitu Yesu Kristo, omu kurora okwange, kuraba omuli uwe ensi isirwe* kandi kusigikirra omu kurora okw’ensi na nyowe nyisirwe. 15 Okusarwa n’okutasarwa tibiine mugaso, baitu ekihangwa ekihyaka nikyo eky’omugaso. 16 Abo boona abagendera kurungi omu kiragiro kinu eky’engeso, obusinge n’embabazi bibe hali bo, ego hali Isaleeri* ya Ruhanga.
17 Kuruga hati, hatabaho omuntu weena ayantalibaniza, habwokuba ha mubiri gwange nyine enkojo ezirukwoleka ngu ndi mwiru wa Yesu.
18 Ab’oruganda, embabazi enyingi muno eza Mukama waitu Yesu Kristo zibe n’omwoyo ogu murukwoleka. Amiina.