Ebikorwa by’Abakwenda
8 Saulo akasagika okwitwa kwa Sitefano.
Kuruga kiro eki, ekitebe ekikaba kiri omu Yerusaalemu kyatandika kuhiiganizibwa muno; kandi abeegeswa boona oihireho abakwenda, baararangira omu biikaro byona ebya Buyudaaya na Samaliya. 2 Baitu abasaija abaatiinaga Ruhanga baatwara Sitefano kumuziika, kandi baaganya muno habwe. 3 Nubwo Saulo yatandika kuhiiganiza muno ekitebe. Yataahirraga buli nju, naasikamu abasaija n’abakazi naabatwara omu nkomo.
4 Baitu abo abakaba bararangire, baagenda omu biikaro ebi byona nibarangirra ekigambo kya Ruhanga. 5 Nubwo Firipo yagenda omu rubuga rwa Samaliya kandi yatandika kubatebeza ebirukukwata hali Kristo. 6 Ebitebe by’abantu bakaba nibahuliiriza n’omutima gumu, Firipo ebi akaba naabaza, kandi nibarora n’ebyamahano ebi akaba naakora. 7 Baingi bakaba baine emyoyo emibi, kandi yakungaga omu iraka lya haiguru n’ebarugamu. Kandi baingi abakaba basaraire, hamu n’abalema bakakizibwa. 8 Nubwo haabaho okusemererwa kwingi omu rubuga oru.
9 Omu rubuga hakaba harumu omusaija arukwetwa Simooni, ayakoraga eby’amasano kandi naahuniiriza muno ihanga lya Samaliya, naayefoora kuba muntu w’amaani. 10 Boona, kurugira kimu hali ogu ow’arukukirayo kuba wa hansi, kuhikira kimu hali ogu ow’arukukirayo kuba ow’ekitiinisa, baamuhuliirizaaga kandi nibagamba bati: “Omusaija onu nuwe Maani ga Ruhanga agarukwetwa Amaingi.” 11 Nahabweki baamuhuliirizaaga habwokuba akaba amazire akasumi naabahuniiriza n’ebikorwa bye eby’amasano. 12 Baitu obu baikiriize Firipo ow’akaba naatebeza amakuru amarungi ag’Obukama bwa Ruhanga hamu n’ibara lya Yesu Kristo, abasaija n’abakazi boona baabatizibwa. 13 Simooni na uwe akaikiriza kandi hanyuma y’okubatizibwa yaikara ali na Firipo, kandi akahunirra muno obu yarozere obwokurorraho n’ebyamahano ebirukukorwa.
14 Abakwenda omu Yerusaalemu obu baahuliire ngu ab’omu Samaliya baikiriize ekigambo kya Ruhanga, baabasindikira Petero na Yohaana; 15 kandi banu baagendayo kubasabira nukwo batunge omwoyo ogurukwera. 16 Habwokuba busaho n’omu hali bo ou gukaba gwakaizireho, baitu bakaba babatiziibwe omu ibara lya Mukama waitu Yesu kyonka. 17 Hanyuma baabataho emikono yabo, kandi baatandika kutunga omwoyo ogurukwera.
18 Simooni obu yarozere ngu omwoyo gubahairwe kuraba omu kuteekwaho emikono y’abakwenda, yabaha sente 19 naagamba ati: “Na nyowe mumpe obusobozi obu, nukwo weena ou ndaataho emikono yange asobole kutunga omwoyo ogurukwera.” 20 Baitu Petero yamugambira ati: “Leka efeeza yaawe ohwerekerre nayo, habwokuba oteekeriize ngu noosobora kuhayo sente kutunga ekisembo kya Ruhanga ekya busa. 21 Toine mugabo gwona omu nsonga enu, habwokuba omutima gwawe tigutereekeriire omu maiso ga Ruhanga. 22 Nahabweki wegarukemu ekibi kyawe kinu kandi oyesengereze Yahwe* nukwo obu kiraaba nikisoboka, akuganyire habw’ekigendererwa ekibi ekiri omu mutima gwawe; 23 habwokuba nindora oli butwa oburukusarra kandi oli mwiru ow’okutahikirra.” 24 Nubwo Simooni yamugarukamu ati: “Munyesengerereze hali Yahwe* nukwo hatagira ekintu na kimu ekyampikaho ha bintu binu ebi mubalize.”
25 Nahabweki, obu baamazire kuha obwakaiso buli hamu n’okugamba ekigambo kya Yahwe,* baagaruka Yerusaalemu, kandi baagenda nibarangirra amakuru amarungi omu byaro bingi eby’Abasamaliya.
26 Baitu, malaika wa Yahwe* yagambira Firipo ati: “Imuka ogende omu muhanda ogurukusirimuka kuruga Yerusaalemu kugenda Gaza.” (Omuhanda gunu niguraba omu irungu.) 27 Nubwo yaimuka yagenda, kandi dora! Omunyaisiyopiya omukonwa,* omusaija ow’akaba aine obusobozi omu bulemi bwa Kandake, omukama omukazi owa Isiyopiya kandi nuwe yarolerraga eby’obuguuda bye byona. Akaba agenzere Yerusaalemu kuramya, 28 kandi omu kasumi ako akaba aikaliire omu kigaali,* naasoma omu iraka erya haiguru ebyahandiikirwe nabbi Isaaya. 29 Nubwo omwoyo gwagambira Firipo guti: “Genda oirre haihi n’ekigaali eki.” 30 Firipo yairuka yairra haihi n’ekigaali, yamuhurra naasoma omu iraka erya haiguru ebyahandiikirwe nabbi Isaaya, kandi yamukaguza ati: “Mali nooyetegereza* ebi orukusoma?” 31 Yagamba ati: “Hati ndaabyetegereza nta, ntaine muntu arukunkoonyera kubyetegereza?” Nubwo yayesengereza Firipo atembe omu kigaali aikarre na uwe. 32 Binu nibyo ebigambo eby’omu Kyahandiikirwe eki akaba naasoma: “Akaleetwa kwitwa nk’entaama, nk’omwana gw’entaama oguculiire oguli omu maiso g’omusazi w’ebyoya, ateesamye akanwa ke. 33 Akaswazibwa kandi n’omusango gwe batagucwe omu bwinganiza. Nooha alibaza ebirukukwata ha ndugirro ye? Habwokuba obwomeezi bwe bwihirwe omu nsi.”
34 Omukonwa yagambira Firipo ati: “Ninkwesengereza onsoborre, hanu nabbi akaba naabazaaho oha? Akaba naayebazaaho? Rundi akaba naabazaaho omuntu ondi?” 35 Firipo yatandika kubaza kandi kutandikira ha kyahandiikirwe kinu, yamutebeza amakuru amarungi agarukukwata hali Yesu. 36 Obu bakaba nibagenda omu muhanda, baahika h’amaizi amaingi, omukonwa yagamba ati: “Dora! Amaizi nganu, kiki ekirukuntanga kubatizibwa?” 37* —— 38 Nubwo yaragira ekigaali kyemerezebwe, kandi Firipo n’omukonwa baasirimuka baagenda omu maizi, kandi yamubatiza. 39 Obu baarugire omu maizi, omwoyo gwa Yahwe* gwatwara Firipo bwangu, kandi omukonwa atongere kumurora, baitu yagumizaamu n’orugendo rwe asemeriirwe muno. 40 Baitu Firipo yayesanga ali omu Asidodi,* yaraba omu kiikaro eki kandi yaikara naarangirra amakuru amarungi omu mbuga zoona kuhikya obu yahikire Kaisaliya.