Ebbaruha ya Paulo ey’Okubanza Hali Timoseo
6 Leka abo abali hansi y’ekikoligo ky’obwiru baikalege nibatamu bakama baabo ekitiinisa kingi, nukwo ibara lya Ruhanga hamu n’enyegesa bitabazibwaho kubi. 2 Baitu abo abaine bakama baabo abali omu kwikiriza, batabajooga ngu habwokuba b’oruganda. Oihireho, baheereze basemeriirwe, habwokuba abo abagasirwa omu buheereza bwabo oburungi, bali baikiriza kandi abagonzebwa.
Ikara nooyegesa ebintu binu kandi oteererre. 3 Kakuba omuntu weena ayegesa ebirukwahukana hali binu kandi atarukwikirraniza n’obuhabuzi oburukugasa, oburukuruga hali Mukama waitu Yesu Kristo, n’enyegesa erukuhikaana n’okwemarra hali Ruhanga, 4 naaba ali w’emyehembo, kandi atarukwetegereza ekintu kyona. Akatamiira kuhakana n’okuteera empaka ha bigambo. Ebintu binu bireetaho ihali, okukungana, okuhangirra,* okuteekerezaaho kubi abantu, 5 n’okuteera empaka buli kaire ha bintu ebitarumu okuleetwaho abantu abaine enteekereza ey’esiisikaire kandi abatakyayetegereza amananu, nibateekereza ngu kwemarra hali Ruhanga guli mulingo ogw’okwetungira obuguuda. 6 Amananu gali, kwemarra hali Ruhanga n’okumarwa, kirumu amagoba maingi. 7 Habwokuba tutaleete ekintu kyona omu nsi, kandi titusobora kwihamu ekintu kyona. 8 Nahabweki, obu turaabaga twine ebyokulya n’ebyokujwara,* leka ebi bitumale.
9 Baitu abo abacweriiremu kimu kuba baguuda, bagwa omu kwohebwa n’omu mutego, nibatwalirizibwa okwegomba okutarumu kandi okw’akabi, ekireetera abantu baingi kugwa omu kuhwerekerra kandi bakahweraho kimu. 10 Habwokuba kugonza muno sente niyo endugirro y’ebibi ebya buli mulingo, kandi habw’okuzigonza muno, abamu bahabisiibwe baaruga omu kwikiriza kandi beecumisire bonka baayereetera obusaasi bwingi.
11 Baitu iwe omusaija wa Ruhanga, ebintu binu obiirukege.* Baitu oyekambege muno kuba ow’okuhikirra, kwemarra hali Ruhanga, kuba n’okwikiriza, okugonza, okugumiisiriza, hamu n’obuculeezi. 12 Rwana obulemu oburungi obw’okwikiriza, kwatira kimu obwomeezi obutahwaho obu wayetiirwe kandi wayatura omu rwijwire omu maiso g’abakaiso baingi.
13 Omu maiso ga Ruhanga anyakwikaza ebintu byona biri byomeezi, n’omu maiso ga Kristo Yesu anyakuli kaiso, ayahaire obwakaiso oburungi omu rwijwire omu maiso ga Pontiyo Piraato, ninkuragira 14 kworobera ekiragiro otaine kamogo koona noobu kyakuba ekirukukujunaanwa kyona, kuhikya ha kwolekwa kwa Mukama waitu Yesu Kristo, 15 ogu ow’asemeriirwe kandi wenka anyakwine obusobozi bwingi obu alyeyoleka, akasumi akatairweho obu kalihika. Nuwe Omukama w’abo abarukulema nk’abakama kandi Omulemi w’abo abarukulema nk’abalemi, 16 nuwe wenka atasobora kufa, ow’arukwikara omu kyererezi omuntu weena eki atasobora kwirra haihi, atakarorwaga omuntu weena kandi busaho muntu asobora kumurora. Aheebwe obusobozi n’ekitiinisa ebiro n’ebiro. Amiina.
17 Ragira abo abanyakuli baguuda omu nteekaniza ey’ebintu* ey’akasumi kanu, bateerora nk’abarukukira abandi kandi okunihira kwabo batakuta omu itungo erirukuhwaho, baitu bakute omuli Ruhanga, ow’atuha omu bwingi ebintu byona ebi twegondezaamu. 18 Bagambire bakolege ebirungi, babe baguuda omu kukora ebikorwa ebirungi, babe bagabi, beeteekaniize kubagana ebi baine n’abandi. 19 Obu baraakora eki, nibaija kuba nibeeyahurra kurungi eky’obuguuda, ogu nugwo omusingi omurungi ogw’omu kasumi ak’omumaiso, nukwo basobole kukwatira kimu obwomeezi bwonyini.
20 Timoseo, linda eki wayahuziibwe obu nooyetantara ebigambo ebitarumu ebirukusiisa ebintu ebirukwera, kandi weetantale n’enteekereza ezitahikire ezeetwa “okumanya.” 21 Abamu bahabire baaruga omu kwikiriza habw’okugonza kweyoleka ngu baine okumanya nk’oku.
Embabazi enyingi muno* zibe na iwe.