Ebbaruha ya Paulo ey’Okubanza Hali Abakolinso
9 Tinyine bugabe? Tindi mukwenda? Ntarole Yesu Mukama waitu? Inywe timuli mulimo gwange omu Mukama waitu? 2 Noobu kiraaba ngu tindi mukwenda hali abantu abandi, ninkigumya ngu ndi mukwenda hali inywe! Habwokuba muli manyikirizo ey’erukugumya obukwenda bwange omu Mukama waitu.
3 Ninyetonganaho hali abo abarukuncwera omusango, nti: 4 Titwine obugabe* obw’okulya n’okunywa? 5 Titwine obugabe obw’okuswera n’okugendaga n’abakazi baitu abaikiriza nk’abakwenda abandi n’abagenzi ba Mukama waitu hamu na Keefa,* nkooku baakozere? 6 Rundi nyowe na Bbaranabba niitwe itwenka tutaine obugabe obw’okukora kusobora kwebeisaaho? 7 Muserikale ki ow’aheereza, ow’ayegurra ebintu ebi arukwetaaga ha sente ze? Nooha abyara omusiri gw’emizabbibbu atarukulya ha bijuma byayo? Rundi nooha aliisa igana ow’atanywa amata g’ebisoro bye?
8 Nimbaza ebintu binu kusigikirra ha nteekereza y’abantu? N’Ebiragiro* tinukwo bigamba biti? 9 Habwokuba kikahandiikwa omu Biragiro bya Musa kiti: “Otaliboha omunwa gw’enimi, obu erukuba neehuura.” Enimi nizo Ruhanga arukufaaho? 10 Rundi kinu akakibaza habwaitu? Mananu kwo kikahandiikwa habwaitu, habwokuba omuntu ow’alima, n’omuntu ow’ahuura, aine kukikora naanihira kutunga omugabo.
11 Obu turaaba twabyaire ebintu eby’omwoyo omuli inywe, nikiba kibi kugesa ebyetaago eby’omubiri kuruga omuli inywe? 12 Abantu abandi obu baraaba babaineho obusobozi, itwe titububaineho kubakira? Baitu titubukozeseze nkooku kisemeriire, oihireho nitugumiisiriza ebintu byona, nukwo omu mulingo gwona tutalemesa amakuru amarungi agarukukwata ha Kristo. 13 Timukimanyire ngu abasaija abakora emirimo ey’erukwera balya ha bintu ebya yekaru, kandi ngu n’abo abaheereza ha kyoto butoosa, batunga omugabo ha bintu ebiheebwayo ha kyoto? 14 Omu mulingo nugwo gumu, Mukama waitu akaragira abo abarukurangirra amakuru amarungi, baliisibwege amakuru amarungi.
15 Baitu nyowe, busaho na kimu ha bintu ebi, eki naakakozeseze. Mali timpandiikire ebintu binu nukwo ebintu ebi babinkorre, habwokuba kyakubaire kirungi kufa kukira omuntu kunyihaho ebintu ebirukundeetera kwenyumiza! 16 Hati, obu ndaaba nindangirra amakuru amarungi, teri nsonga ey’esemeriire kundeetera kwenyumiza,* habwokuba nikyo nsemeriire kukora. Mali zimboine kakuba ntarangirra amakuru amarungi! 17 Kinu obu nkikora nyegondiize, nyine empeera, baitu noobu nkikora mpambiriziibwe, nimba nkyaine obukeeto obwankwasiibwe. 18 Hati, empeera yange eri nkaha? Nukwo obu ndaarangirra amakuru amarungi, ngarangirre ntasaswirwe, kandi nyetantale kukozesa kubi obusobozi* bwange omu makuru amarungi.
19 Noobu kiraaba ngu ndi w’obugabe hali abantu boona, nyefoire mwiru hali boona nukwo nsobole kutunga abantu baingi nkooku kirukusoboka. 20 Hali Abayudaaya nkafooka Muyudaaya nukwo nsobole kutunga Abayudaaya; hali abo abali hansi y’ebiragiro, nkafooka nk’ow’ali hansi y’ebiragiro, nukwo nsobole kutunga abo abali hansi y’ebiragiro. 21 Hali abo abataine biragiro, nkafooka nk’ow’ataine biragiro, tikiri ngu tinyine biragiro bya Ruhanga, baitu ndi hansi y’ebiragiro bya Kristo, nukwo nsobole kutunga abo abataine biragiro. 22 Hali abaceke, nkafooka muceke, nukwo nsobole kutunga abaceke. Nfookere ebintu byona hali abantu aba buli mulingo, nukwo obu kiraaba kisobokere, nsobole kujuna abantu abamu. 23 Baitu ninkora ebintu byona habw’amakuru amarungi, nukwo nsobole kugagambiraho abandi.
24 Timukimanyire ngu abairuki omu kaliitango boona bairuka, baitu omu wenka nuwe aheebwa ekisembo? Mwiruke omu mulingo oguraabasobozesa kukitunga. 25 Hati, buli muntu weena ow’ayejumbira omu kaliitango,* ayetanga omu bintu byona. Amananu gali, bakikora kutunga ekondo ey’erukuhwaho, baitu itwe tulitunga egi ey’etarukuhwaho. 26 Nahabweki, omulingo ndukwirukamu, tindukwiruka nk’ow’ataine kigendererwa; omulingo nteeramu entomi zange tindi nk’ow’arukuteera amasa;* 27 baitu nteera* omubiri gwange kandi ngulema nk’omwiru, nukwo hanyuma y’okutebeza abandi, nyowe ntalemwa kusiimwa Ruhanga.