Ebbaruha ya Paulo Hali Abefeeso
4 Nahabweki, nyowe omunyankomo omu Mukama waitu, nimbeesengereza murubatire omu kwetwa oku mwayeserwe nkooku kisemeriire, 2 n’obwebundaazi bwona, n’obuculeezi, n’okugumiisiriza, hamu n’okugumiisirizangana omu kugonza, 3 kandi mwekambe kwikazaaho obumu obw’omwoyo, n’obusinge obubateeraniza hamu. 4 Haroho omubiri gumu, n’omwoyo gumu, nkooku mwayeserwe omu kunihira kumu; 5 Mukama waitu omu, okwikiriza kumu, okubatizibwa kumu; 6 Ruhanga omu, Ise boona anyakuli haiguru ya byona kandi kuraba omu byona kandi omu byona.
7 Hati, buli omu hali itwe akaheebwa embabazi enyingi muno* kusigikirra ha mulingo Kristo yamupimiire ekisembo ekya busa. 8 Habwokuba ekyahandiikirwe kigamba kiti: “Obu yatembere haiguru, akatwara abanyagwa, yagaba abantu nk’ebisembo.”* 9 Hati, ekigambo “akatemba” nikimanyisa ki? Nikimanyisa ngu akasirimuka hansi, egi niyo ensi. 10 Ogu weenyini ayasirimukire nuwe wenyini ayatembere kuhingura haiguru omu iguru muno, nukwo asobole kuhikiiriza ebintu byona.
11 Kandi akaha abamu okuba abakwenda, abamu nka banabbi, abamu nk’abatebezi,* abamu nk’abaliisa, kandi abamu nk’abeegesa, 12 n’ekigendererwa eky’okutereekereza* abarukwera habw’omulimo ogw’obuheereza, kwombeka omubiri gwa Kristo, 13 kuhikya itwena obu tuliba omu bumu omu kwikiriza n’okutunga okumanya okuhikire okw’Omwana wa Ruhanga, n’okufooka muntu ow’akuzire, kuhikira kimu ha rulengo orw’obukuru bwa Kristo. 14 Nahabweki, tutaikara tuli nk’abaana, nitutwarwatwarwa nk’ebigonzi, kandi nitucundwacundwa nitutwarwa hanu na hali n’omuyaga ogw’enyegesa eza buli mulingo, kuraba omu bisuba by’abantu, n’enteekereza ez’ebisuba ezirukuhabisa. 15 Baitu omu kubaza amananu, leka okugonza kutwekambise kukura omu bintu byona omu Kristo anyakuli omutwe. 16 Omuli uwe, omubiri gwona guteeraniziibwe hamu kurungi kandi gukorra hamu kuraba omu buli ngiga ey’ekora ekiba nikyetaagisa. Buli kicweka ky’omubiri obu kikora kurungi, kinu kireetera omubiri kukura, nigweyombeka omu kugonza.
17 Nahabweki, kinu nikyo ndukugamba kandi nimpa obwakaiso omu Mukama waitu ngu, muleke kwetwaza* nkooku abamahanga barukwetwaza* omu butarumu obw’ebiteekerezo byabo. 18 Habwokuba ebiteekerezo byabo biri omu mwirima, kandi beebaganiize ha bwomeezi oburuga hali Ruhanga, habw’obutamanya obuli omuli bo, habw’okugumangana kw’emitima yabo. 19 Habwokuba tibakyaine ensoni naakake, bakeehayo hali engeso ezijunzire* kukora okutasemera kwona okwa buli mulingo n’omururu.
20 Baitu mukeega kandi mwamanya ngu Kristo tinukwo ali ati, 21 mananu kwo obu muraaba mwamuhuliire kandi mwayegesebwa kuraba omuli uwe nkooku amananu gali omu Yesu. 22 Mukeegesebwa kujuura omuntu owa ira, ow’arukuhikaana n’engeso zanyu eza kara kandi arukusiisikara habw’okwegomba kwe okw’ebisuba okurukuhabisa. 23 Kandi mugumizeemu nimuhindurwa kuba abahyaka omu nteekereza yanyu,* 24 kandi musemeriire kujwara omuntu omuhyaka ayahangirwe kusigikirra ha kugonza kwa Ruhanga omu kuhikirra okw’amananu hamu n’obwesigwa bwonyini.
25 Nahabweki, nkooku mweyihireho ebisuba, buli omu hali inywe abaze amananu na mutaahi we, habwokuba tuli bicweka by’omubiri gumu. 26 Mukwatwe ekiniga, baitu mutasiisa; mutaikiriza izooba kugwa mukyaine ekiniga; 27 mutaha Sitaani* omugisa. 28 Ogu arukwiba aleke kwiba, oihireho akole n’amaani, akole emirimo enungi n’emikono ye, nukwo asobole kuba n’eki araabagana n’omuntu ondi ow’ali omu bwetaago. 29 Ekigambo ekijunzire kitaliruga omu kanwa kanyu, baitu harugemu ekirungi ekiraayombeka abandi kusigikirra ha bwetaago, nukwo kigasire abo abarukukihurra. 30 Kandi muleke kusaaliza omwoyo gwa Ruhanga ogurukwera ogwakozesiibwe kubateekaho emanyikirizo* habw’ekiro eky’okulekerwa kuraba omu kicunguro.
31 Mweiheho okwahura enzigu okwa buli mulingo, okubiihirwa, ekiniga, kukaayuuka,* kubaza ebigambo ebirukujuma, otwaliiremu n’ebikorwa byona ebibi. 32 Baitu mwolekangane embabazi, musaalirirwe abandi, muganyirangane, nkooku Ruhanga yabaganyiire kuraba omu Kristo.