Ebbaruha ya Paulo Hali Abafiripi
2 Nahabweki, obu haraaba haroho okugarurwamu amaani kwona omu Kristo, okuhuumuzibwa omu kugonza, kukwataniza hamu omu mwoyo,* kwoleka okugonza hamu n’embabazi, 2 mwijuze okusemererwa kwange kuraba omu kuba n’enteekereza emu, okugonza kumu, mubeere kimu omu bumu,* kandi mwine enteekereza emu. 3 Mutakora ekintu kyona omu kuhakana rundi habw’okugonza kwoleka ngu nimukira abandi, baitu n’obwebundaazi, murole abandi nk’abarukubakira, 4 mutarukwebembeza ebi murukugonza byonka, baitu nimwebembeza n’eby’abandi.
5 Mwikale n’enteekereza enu, Kristo Yesu na uwe ei akaba aine, 6 noobu kiraaba ngu akaba ali omu kisisani kya Ruhanga, atalengeho n’okukiteekerezaaho ngu nainganaingana na Ruhanga. 7 Baitu akeeyihaho buli kimu kyona eki akaba aine, yafooka nk’omwiru kandi yafooka omuntu.* 8 Kukira hali eki, obu yaizire nk’omuntu,* akeebundaaza wenka kandi yafooka muhulizi kuhika ha kufa, ego, kufeera ha muti.* 9 Habw’ensonga enu, Ruhanga akamunyumiza yamuta omu kiikaro ekya haiguru muno, kandi habw’embabazi ze akamuha ibara erirukukira amabara agandi goona, 10 nukwo buli omu weena anyakuli omu iguru, omu nsi, na hansi omu itaka, ateeze okuju omu ibara lya Yesu 11 kandi buli rulimi rwatule omu rwijwire ngu Yesu Kristo nuwe Mukama waitu nukwo Ruhanga Isiitwe aheebwe ekitiinisa.
12 Nahabweki, abagonzebwa, nkooku mwikaire muli bahulizi obwire bwona, hatali obu mba ndi na inywe honka, baitu hati n’okukiraho muli bahulizi ntali na inywe, mwikale nimukorra okujunwa kwanyu mwine okutiina kandi nimutukumira. 13 Habwokuba Ruhanga nuwe abasobozesa kusigikirra ha kugonza kwe, naabaha okugonza* n’amaani ag’okukora. 14 Mwikale nimukora ebintu byona mutarukutontorroma kandi mutarukuteera empaka, 15 nukwo musobole kuba abataine musango kandi abatarukujunaanwa ekintu kyona, abaana ba Ruhanga abataine kamogo omu businge bunu oburamaire kandi obuhabire obu murukwakiramu nk’amataara omu nsi, 16 nimwikara mukwatiire kimu ekigambo eky’obwomeezi. Nukwo nsobole kutunga ensonga ey’okusigikirraho kusemererwa ha kiro kya Kristo habw’okukimanya ngu ntairukire busa rundi kukorra busa. 17 Noobu ndaaba ninseeswa nk’ekihongwa eky’okunywa* ekiseeswa ha kihongwa hamu n’obuheereza oburukwera nambere okwikiriza kwanyu kubeekambisa kukora, nsemeriirwe kandi ninsemererwa hamu na inywe inywena. 18 Omu mulingo nugwo gumu, na inywe musemeriire kusemererwa kandi mukyanganuke hamu na nyowe.
19 Hati ninnihira omu Mukama waitu Yesu, kutuma Timoseo nambere muli omu kasumi akatali ka hara nukwo ngarurwemu amaani obu ndaahurra ebirukubakwataho. 20 Habwokuba busaho omuntu ondi ou nyine ow’aine omutima nk’ogwe, ow’araafaaho kwo ebyetaago byanyu. 21 Habwokuba abandi boona nibeeserurra ebyabo bonka, hatali ebya Yesu Kristo. 22 Baitu na inywe mumanyire omulingo yayolekeremu ngu asemeriire, kusisanaho omwana na ise akakorra hamu na nyowe kurarangya amakuru amarungi. 23 Nahabweki, nuwe ndukunihira kutuma nambere muli omu bwangu hanyuma y’okurora ebyange nambere biraagarukira. 24 Mali ninkigumya omu Mukama waitu ngu na nyowe niinyija kwija omu bwangu.
25 Baitu hati nkiteekeriizeeho ngu nikyetaagisa kutuma nambere muli Epafurodito mugenzi wange, omukozi mutaahi wange, omuserikale mutaahi wange, omutumwa waanyu kandi omuheereza wange omu byetaago byange, 26 habwokuba aine ekihika eky’okubarora inywena kandi ayenuubire habwokuba mukahurra ngu akaba arwaire. 27 Mananu kwo, akarwara kandi akaba ali haihi kufa; baitu Ruhanga yamwoleka embabazi, kandi amananu gali, atazooleke uwe wenka baitu akazooleka na nyowe nukwo ntatunga obujune obuhonderaine. 28 Nahabweki, nimmutuma omu bwangu nukwo obu muraamurora, mwongere musemererwe nukwo na nyowe okweraliikirra kwange kukeehe. 29 Mumutangirre n’okusemererwa kwona nkooku mutangirra abahondezi ba Mukama waitu, kandi abantu nk’abo mubatwalege nk’ab’omuhendo, 30 habwokuba akaba ali haihi kufa habw’omulimo gwa Kristo,* yateeka obwomeezi bwe omu kabi kusobora kukora inywe ebi mwakunkoliire habwokuba mukaba mutali na nyowe.