Ebbaruha ya Paulo Hali Abagaratiya
1 Nyowe Paulo, omukwenda atarakomerwe abantu, baitu ayakomerwe Yesu Kristo na Ruhanga Isiitwe, ayahumbwire Yesu kuruga omu bafu, 2 ndi hamu n’ab’oruganda boona, nimpandiikira ebitebe eby’omu Garatiya:
3 Embabazi enyingi muno* n’obusinge kuruga hali Ruhanga Isiitwe na hali Mukama waitu Yesu Kristo bibe na inywe. 4 Akeehayo wenka habw’ebibi byaitu nukwo asobole kutujuna hali enteekaniza ey’ebintu* enu embi ey’akasumi kanu, kusigikirra ha kugonza kwa Ruhanga waitu kandi Isiitwe, 5 aheebwe ekitiinisa ebiro n’ebiro. Amiina.
6 Mpuniriire ngu murahukire kuruga hali Ogu ayabeesere n’embabazi enyingi muno eza Kristo, mwahuliiriza amakuru amarungi ag’omulingo ogundi. 7 Tikiri ngu haroho amakuru amarungi agandi; baitu haroho abo abarukubatuntuza nibagonza kuhindahindura amakuru amarungi agarukukwata hali Kristo. 8 Baitu noobwakuba itwe, rundi malaika kuruga omu iguru, kakuba abagambira amakuru amarungi agarukwahukana hali ago aga twabagambiire, leka akyenwe. 9 Nkooku twasangirwe tubagambiire, niinyongera kubagambira nti; Omuntu weena arukubatebeza amakuru amarungi agarukwahukana hali ago aga mwaikiriize, akyenwe.
10 Nindengaho kusemeza abantu, rundi Ruhanga? Rundi, ningonza kusemeza abantu? Kakuba mbaire ninkyasemeza abantu, tinaakubaire mwiru wa Kristo. 11 Ab’oruganda, ningonza mukimanye ngu amakuru amarungi aga nabatebiize, gataruge hali abantu; 12 habwokuba ntagatunge kuruga hali omuntu weena, kandi busaho ayaganyegeseze, oihireho Yesu Kristo nuwe yagansuukuliire.
13 Ky’amananu ngu mukahurra enyetwaza yange obu nkaba nkyali omu diini ey’Ekiyudaaya, nkooku naikaraga nimpiiganiza muno ekitebe kya Ruhanga n’ekigendererwa eky’okukihwerekereza; 14 kandi nkaba ninkurakurana muno omu diini ey’Ekiyudaaya kukira baingi ab’emyaka yange omu ihanga lyange, habwokuba nayekambaga muno kuhondera emigenzo yabaisenkurunyowe. 15 Baitu Ruhanga ayanyihire omu nda ya nyinanyowe, kandi yannyeta kuraba omu mbabazi ze enyingi muno, akakirora ngu kirungi 16 kumanyisa ebirukukwata ha Mwana we kuraba omuli nyowe, nukwo nsobole kurangirra amakuru amarungi agarukumukwataho hali amahanga, kandi obu yankomere kukora eki, ntanguhe kwekaguzaaho omuntu weena;* 17 noobu kwakuba kugenda Yerusaalemu hali abo abambandize kufooka abakwenda, baitu nkagenda omu Buharabbu kandi hanyuma nagaruka Damasiko.
18 Hanyuma y’emyaka esatu nkagenda Yerusaalemu kubungira Keefa,* kandi nkaikara na uwe kumara ebiro ikumi na bitaano. 19 Baitu ntarole abakwenda abandi, oihireho Yakobbo mugenzi wa Mukama waitu. 20 Nimbagumya omu maiso ga Ruhanga ngu ebintu binu ebi ndiyo nimbahandiikira, tibiri bisuba.
21 Hanyuma y’eki, nkagenda omu bicweka bya Siriya,* na Kirikiya. 22 Baitu nkaba ntamanyirwe omu bitebe bya Buyudaaya ebikaba biri omu bumu na Kristo. 23 Baahurraga kwonka ngu: “Omusaija ayatuhiiganizaaga kara, hati naarangirra amakuru amarungi agarukukwata ha nyikiriza ei akaba naagonza kuhwerekereza.” 24 Nahabweki, bakatandika kukugiza Ruhanga habwange.