Ebbaruha ya Paulo eya Kabiri Hali Abakolinso
12 Nsemeriire kwehaisa. Tikirukugasa, baitu leka mbazeeho okwolekwa n’okusuukururwa okwa Mukama waitu. 2 Mmanyire omuntu ow’ali omu bumu na Kristo, emyaka 14 enyuma—ayatwairwe omu iguru erya kasatu, k’abe akaba ali omu mubiri rundi atali omu mubiri, timmanyire; Ruhanga nuwe amanyire. 3 Ego, omuntu ogu mmumanyire—k’abe akaba ali omu mubiri rundi atali omu mubiri, timmanyire; Ruhanga nuwe amanyire— 4 ayatwairwe omu rugonjo rwa Ruhanga kandi akahurra ebigambo ebitasobora kugambwa kandi omuntu ebi atarukwikirizibwa kubaza. 5 Leka nyehaise habw’omuntu ogu, baitu tindukwija kwehaisa habw’ebi ebirukunkwataho, oihireho habw’obuceke bwange. 6 Noobu naakubaire ningonza kwehaisa, tinaakubaire nk’omuntu atarukwetegereza, habwokuba naakubalize amananu. Baitu tindukwija kwehaisa nukwo hatagira omuntu ayateekereza ngu nkozere ebirukukira hali ebi, ebi arukurora rundi ebi arukuhurra kuruga hali nyowe, 7 ngu habwokuba nkasuukulirwa ebintu bingi ebirukuhuniiriza nk’ebi.
Kusobora kuntanga kwehaisa ekihinguraine, nkacumitwa* ihwa omu mubiri, malaika wa Sitaani aikara nanteera, nukwo nteehaisa ekihinguraine. 8 Nkeesengereza Mukama waitu emirundi esatu ha nsonga enu, ngu lindugemu. 9 Baitu akangambira ati: “Embabazi zange enyingi muno nizikumara, habwokuba amaani gange gahikirra omu buceke.” Nahabweki, n’okusemererwa ndaayehaisiza omu buceke bwange, nukwo amaani ga Kristo gasobole kwikara hali nyowe nk’eheema. 10 Nahabweki ninsemerererwa omu buceke bwange, omu kujumwa, omu bwire bw’obwetaago, omu kuhiiganizibwa n’omu bizibu habwa Kristo. Habwokuba obu mba ndi muceke, nubwo mba w’amaani.
11 Nfookere muntu atarukwetegereza. Niinywe mwampambiriize habwokuba mukaba musemeriire kunsiima. Busaho kintu na kimu abakwenda banyu abakuru eki barukunkiza, noobu kiraaba ngu tinyine mugaso. 12 Mali obwokurorraho bw’omukwenda bukeeyoleka omuli inywe kuraba omu kugumiisiriza kw’amaani, n’obwokurorraho, ebirukuhuniiriza, hamu n’ebyamahano. 13 Kiki ekyaleetiire ebitebe ebindi kubakiraho, obundi ngu habwokuba ntabe mugugu hali inywe? Nimbasaba munganyire habw’ensobi egi.
14 Dora! Gunu guli murundi gwa kasatu nyeteekaniize kwija nambere muli, kandi tindukwija kufooka mugugu hali inywe. Habwokuba tindukuserra ebintu byanyu, baitu ninserra inywe; habwokuba abaana tibarukunihirwa kwahurra abazaire baabo, baitu abazaire nibanihirwa kwahurra abaana baabo. 15 Habwange niinyija kusemererwa kuhayo buli kimu kandi na nyowe nkozesebwe omu bwijwire habw’obwomeezi bwanyu. Obu kiraaba ngu nimbagonza muno, na inywe timusemeriire kungonza nkooku ndukubagonza? 16 Noobu kiraaba nukwo kiri, ntabe mugugu hali inywe. Baitu nabwo mugamba ngu nkaba “mugobya” kandi ngu nkababiihabiiha omu “magezi.” 17 Nkatwara ebyanyu kuraba omuli abo abanatumire nambere muli? 18 Nkateererra Tito kandi natuma ow’oruganda aije hamu na uwe. Mali Tito akabatwaraho ebyanyu? Tutagendere omu mwoyo nugwo gumu? Kandi tutagendere omu bigere nibyo bimu?
19 Mwikaire nimuteekereza ngu nitwetonganaho omu maiso ganyu? Baitu nk’abahondezi ba Kristo, nitubaza amananu omu maiso ga Ruhanga. Baitu abagonzebwa, byona ebi tukora, tubikora kwombeka inywe. 20 Habwokuba eki ndukutiina nikyo ngu, obu ndiija nambere muli ninsobora kubasanga mutali nkooku naakugondeze mube kandi na nyowe ninsobora kutaba nkooku mwakugondeze mbe, baitu nihasobora kubaho enkungani, ihali, kubalizangana omu mulingo ogw’ekiniga, kuteera empaka, kugeyangana, orugambo, kuba n’emyehembo, hamu n’akajagarro. 21 Obundi obu ndyongera kwija, Ruhanga wange naasobora kunswaza omu maiso ganyu, kandi ninsobora kuganya habwa baingi abaakozere ebibi kara, baitu abatakeegarukiremu engeso zaabo ezitasemiire, obusiihani,* n’engeso ezijunzire ezi* baakozere.