Ebikorwa by’Abakwenda
9 Baitu Saulo obu akaba naakyatiinisiriza abeegeswa ba Mukama waitu kandi naagonza kubaita, yagenda hali nyakatagara omukuru* 2 yamusaba ebbaruha ezirukumwikiriza kugenda omu masorrokaniro ag’omu Damasiko, nukwo akwate abasaija n’abakazi ab’Omuhanda abaleete Yerusaalemu ababohere.
3 Obu akaba naagenda ali haihi kuhika Damasiko, ahonaaho ekyererezi kuruga omu iguru kyayaka nikimwehinguliriza, 4 yagwa hansi kandi yahurra iraka nirimugambira liti: “Saulo, Saulo, habwaki nompiiganiza?” 5 Na uwe yakaguza ati: “Niiwe oha Mukama wange?” Yagamba ati: “Niinyowe Yesu ou oliyo noohiiganiza. 6 Baitu imuka ogende omu rubuga kandi oraamanyisibwa eki oine kukora.” 7 Nubwo abasaija abakaba nibagenda na uwe baaburwa eky’okubaza habwokuba bakaba nibahurra iraka baitu batarukurora omuntu weena. 8 Hanyuma Saulo yaimuka hansi, noobu kiraaba ngu amaiso ge gakaba gaziburwire, akaba atasobora kurora ekintu kyona. Nahabweki baamukwata ha mukono baamutwara Damasiko. 9 Kandi akamara ebiro bisatu atarukurora kintu kyona kandi atalye noobu kwakuba okunywa.
10 Omu Damasiko hakaba haliyo omusaija arukwetwa Ananiya, kandi Mukama waitu akamubonekera omukwolekwa yamugambira ati: “Ananiya!” Yagarukamu ati: “Ndi hanu Mukama wange.” 11 Mukama waitu yamugambira ati: “Imuka, ogende ha ruguudo orurukwetwa Oruterekeriire, ogende ha nju y’omusaija arukwetwa Yuda, oserre omusaija arukwetwa Saulo kuruga Taruso. Dora! aliyo naasaba, 12 kandi omu kwolekwa arozere omusaija arukwetwa Ananiya naija naataaha nambere ali kandi naamutaho emikono nukwo asobole kwongera kuhweza.” 13 Baitu Ananiya yagarukamu ati: “Mukama wange, mpuliire ebirukukwata ha musaija onu kuruga h’abantu baingi, n’ebintu byona ebibi ebi yakozere abarukwera baawe omu Yerusaalemu. 14 Kandi hati ahairwe obusobozi kuruga hali bakuru ba banyakatagara* kukwata* abo boona abarukweta ibara lyawe.” 15 Baitu Mukama waitu yamugambira ati: “Genda habwokuba omusaija onu ali kibindi* eki nkomeremu kumanyisa ibara lyange hali abamahanga, n’abakama, na hali abaana ba Isaleeri. 16 Habwokuba niinyija kumwoleka ebintu bingi ebi arukwija kurabamu naabonabona habw’ibara lyange.”
17 Nubwo Ananiya yagenda, yataaha omu nju, kandi yamuteekaho emikono naagamba ati: “Ow’oruganda Saulo, Mukama waitu Yesu, ow’akubonekiire obu obaire oli omu muhanda noija, antumire nambere oli nukwo osobole kuhweza kandi oijule omwoyo ogurukwera.” 18 Ahonaaho ebintu ebirukusisana nk’ebigaragamba by’encu byaragara kuruga h’amaiso ge kandi yayongera kuhweza. Hanyuma yaimuka, yabatizibwa, 19 kandi yalya ebyokulya yagarukwamu amaani.
Akaikara n’abeegeswa omu Damasiko kumara ebiro bike, 20 kandi ahonaaho yatandika kutebeza omu masorrokaniro ebirukukwata hali Yesu nkooku ali Mwana wa Ruhanga. 21 Baitu abo boona abaamuhuliire, baahunirra nibagamba bati: “Omusaija onu tinuwe ayahiiganizaaga ab’omu Yerusaalemu abaabazaahoga ibara linu? Taizirege hanu n’ekigendererwa eky’okubakwata akabatwara* hali bakuru ba banyakatagara?” 22 Baitu Saulo yaikara naayeyongera kuba w’amaani n’okuhuniiriza Abayudaaya abaikaraga omu Damasiko, obu naasoborra omu mulingo ogurukwetegerezebwa kurungi nkooku Yesu nuwe Kristo.
23 Hanyuma y’okurabaho ebiro bingi, Abayudaaya baayekoba kumwita. 24 Baitu Saulo yakimanya. Bakaba nibalinda kurungi emiryango y’orubuga nyamusana n’ekiro nukwo bamwite. 25 Baitu omu bwire bw’ekiro abeegeswa be baamurabya omu kihuru ekikaba kiri ha kisiika baamusirimura hansi omu kigega.
26 Obu yahikire omu Yerusaalemu, yalengaho muno kweteeranizaaho abeegeswa, baitu boona bakaba nibamutiina, habwokuba bakaba batarukukiikiriza ngu afookere mwegeswa. 27 Bbaranabba yaija yamukoonyera yamutwara hali abakwenda, kandi yabagambira omu bwijwire nkooku Saulo yarozere Mukama waitu kandi yabaza na uwe, kandi nkooku yabalize n’obumanzi omu ibara lya Yesu omu Damasiko. 28 Nahabweki yaikara na bo naagendagenda* omu Yerusaalemu atarukutiina, kandi n’obumanzi naabaza omu ibara lya Mukama waitu. 29 Akaba naabaza kandi naahakana n’Abayudaaya abarukubaza Oruyonaani, baitu banu baalengaho kumwita. 30 Ab’oruganda obu baakimanyire, baamuleeta Kaisaliya kandi baamugambira agende Taruso.
31 Hanyuma y’ebi, ekitebe* kyona omu Buyudaaya, Galiraaya, hamu na Samaliya kyaba omu kasumi ak’obusinge kandi kyagumibwa; obu kyagumizeemu kugendera omu kutiina Yahwe* n’omu kuhuumuzibwa okw’omwoyo ogurukwera, kyayeyongera kukanya.
32 Petero obu akaba naagenda omu kicweka eki kyona, yahika na h’abarukwera abaikaraga omu Luda. 33 Oku yasangayo omusaija arukwetwa Ayineya ow’akaba amazire emyaka munaana atarukusobora kwimuka ha kitabu kye habwokuba akaba asaraire. 34 Petero yamugambira ati: “Ayineya, Yesu Kristo yakukiza. Imuka oyale ekitabu kyawe.” Kandi ahonaaho yaimuka. 35 Abo boona abaikaraga omu Luda n’omu byeya bya Salooni obu baamurozere, baahindukira Mukama waitu.
36 Omu Yopa hakaba haliyo omwegeswa arukwetwa Tabbisa, obu lihindurwa limanyisa, “Dolika.”* Yakoraga ebirungi bingi kandi naagabira abanaku ebisembo bingi. 37 Baitu omu kasumi ako akarwara kandi yafa. Nahabweki baamwogya, baamubyamya omu kisiika ekya haiguru. 38 Nkooku Luda ekaba eri haihi na Yopa, abeegeswa obu baahuliire ngu Petero akaba ali omu rubuga oru, baatumayo abasaija babiri bamwesengereze bati: “Caali, rahuka oije nambere tuli omu bwangu.” 39 Ahonaaho Petero yaimuka yagenda na bo. Obu yahikireyo, baamutwara omu kisiika ekya haiguru kandi abafaakati boona baija nambere ali nibarra kandi baamwoleka engoye nyingi* Dolika ezi yakozere obu akaba akyali mwomeezi. 40 Hanyuma, boona Petero yabaturukya aheeru, yateeza amaju yasaba. Yahinduka yarora omutumbi, yagamba ati: “Tabbisa, imuka.” Tabbisa yaziburra amaiso ge, kandi obu yarozere Petero, yaimuka yaikarra. 41 Petero yamukwata omukono, yamwemereza, yayeta abarukwera boona n’abafaakati kandi yamubooleka ali mwomeezi. 42 Kinu kikamanywa omu Yopa yoona kandi baingi baikiriza Mukama waitu. 43 Nubwo yaikara omu Yopa habw’ebiro bingiho ali na Simooni omuhazi w’empu.