Ebikorwa by’Abakwenda
3 Kandi Petero na Yohaana obu bakaba nibagenda omu yekaru omu saaha ey’okusaba, saaha mwenda,* 2 omusaija ayazairwe ali mulema akaba ahimbirwe. Buli kiro baamuteekaga ha mulyango gwa yekaru ogurukwetwa Omulyango Omurungi, nukwo asabiirize abo abarukutaaha omu yekaru. 3 Obu yarozere Petero na Yohaana nibagenda kutaaha omu yekaru, yatandika kubasabiiriza. 4 Baitu Petero, ali hamu na Yohaana, baamwikazaaho amaiso kandi baagamba bati: “Turole.” 5 Yabarolerra naanihira ngu nibaija kugira ekintu eki baraamuha. 6 Baitu Petero yamugambira ati: “Efeeza n’ezaabbu timbiine, baitu eki nyine nikyo ndaakuha. Omu ibara lya Yesu Kristo Omunyanazaalesi, rubata!” 7 Nubwo yakwata omukono gwe ogw’obulyo, yamwimukya. Ahonaaho ebigere bye n’obufumbarume* bwe byaguma; 8 kandi yatandika kurubata, yagenda na bo omu yekaru naarubata kandi naakugiza Ruhanga. 9 Abantu boona baamurora naarubata kandi naakugiza Ruhanga. 10 Baatandika kumumanyirra ngu nuwe ayaikarraga ha Mulyango Omurungi ogwa yekaru, alindiriire abantu kumukwatirwa embabazi bakamuha ebisembo. Baahunirra muno kandi baasemererwa habw’ekikaba kimubaireho.
11 Omusaija ogu obu akaba akyakwatiriire Petero na Yohaana, abantu boona bairuka baija nambere bali ha Muhanda gwa Suleimaani* bahuniriire. 12 Petero obu yarozere eki, yagambira abantu ati: “Basaija inywe aba Isaleeri, habwaki kinu kibahuniriize, kandi habwaki mututunuliire oti rundi kinu tukikozere habw’amaani gaitu, rundi ngu habw’okwemarra hali Ruhanga nikyo kitusobozeseze kumukoonyera kurubata? 13 Ruhanga owa Ibburahimu, owa Isaka, kandi owa Yakobbo, Ruhanga wa baisenkuruitwe, anyumiize Omuheereza we, Yesu, ou mwahaireyo hali Piraato kandi mwamwehakana noobu kiraaba ngu akaba acwiremu kumulekera. 14 Mali, mukehakana ogu arukwera kandi ow’okuhikirra, mwasaba alekere omusaija ow’akaba ali mwisi, 15 baitu mwaita Omukuru w’Obwomeezi. Baitu Ruhanga akamuhumbuura kuruga omu bafu, kandi kinu itwe nitukiheera obwakaiso. 16 Kandi kuraba omu ibara lye, na habw’okwikiriza oku twine omu ibara lye, nikyo kyaleetera omusaija onu ou murukurora kutunga amaani. Okwikiriza oku nukwo kukiriize kimu omusaija onu ou murukurora omu maiso ganyu. 17 Kandi hati, ab’oruganda, nkimanyire ngu kinu mukakikora omu butamanya, nkooku n’abalemi banyu baakozere. 18 Baitu omu mulingo gunu, Ruhanga ahikiiriize ebintu ebi yarangire kuraba omu kanwa ka banabbi be boona, ngu Kristo yaakubonabonesiibwe.
19 Nahabweki, mwegarukemu,* kandi muhinduke nukwo ebibi byanyu bisiimuurwe,* nukwo obusumi obw’okuhuumuzibwa busobole kwija nambere muli kuruga hali Yahwe* weenyini* 20 kandi asobole kutuma Kristo ou yabakomiire, Yesu. 21 Ogu asemeriire kwikara omu iguru, okuhikya obusumi obw’okugarraho buhyaka ebintu byona Ruhanga ebi yabalize kuraba omu kanwa ka banabbi be abarukwera aba ira. 22 Mananu kwo, Musa akagamba ati: ‘Yahwe* Ruhanga waanyu alibaimukiza nabbi ali nka nyowe kuruga omu bagenzi banyu. Musemeriire kuhuliiriza byona ebi araabagambira. 23 Mali, omuntu weena atalihuliiriza Nabbi ogu, alihwerekerezebwa kuruga omu bantu.’ 24 Kandi banabbi boona, kurugira kimu hali Samwiri hamu n’abo abaamuhondiire, baingi nkooku baagambire, bakarangirra ebiro binu. 25 Muli baana ba banabbi kandi ab’ekiragaano Ruhanga eki yakozere na baisenkuruinywe, naagambira Ibburahimu ati: ‘Kuraba omu ruzaaro rwawe,* enganda zoona ez’omu nsi ziriheebwa omugisa.’* 26 Ruhanga obu yamazire kuhumbuura Omuheereza we, akabanza kumutuma hali inywe abahe omugisa kuraba omu kuhindura buli omu hali inywe aruge omu bikorwa bye ebibi.”