Ebbaruha ya Paulo Hali Abefeeso
6 Abaana, mworoberege abazaire banyu omu Mukama waitu, habwokuba kinu ky’okuhikirra. 2 “So na nyoko obateekemuga ekitiinisa” nikyo kiragiro eky’okubanza ekiroho omurago ogurukugamba ngu: 3 “Nukwo osobole kuba kurungi* kandi oikale omu nsi kumara akasumi akaraihire.” 4 Kandi baisebaana, mutabiihiza abaana banyu, baitu mugumizeemu nimubooroora omu kuhana n’omu kuteerererwa kwa* Yahwe.*
5 Abairu, mworobere abakama banyu ab’omu nsi, obu nimutiina kandi nimutukumira, mwine emitima ey’amananu, nkooku mukora hali Kristo, 6 hatali obu muba nimurorwa honka, habw’okugonza kusemeza abantu, baitu nk’abairu ba Kristo abarukukora Ruhanga ebi agonza n’obwomeezi bwanyu bwona. 7 Muheereze bakama banyu mwegondiize, mwine enteekereza enungi nk’abarukukorra Yahwe* hatali abantu, 8 habwokuba mukimanyire ngu ekirungi kyona omuntu eki akora, Yahwe* naija kwongera akimugarurre, k’abe ali mwiru rundi w’obugabe. 9 Na inywe bakama b’abairu, mubatwaze omu mulingo nugwo gumu, hatali kubatiinisiriza, habwokuba mukimanyire ngu Mukama wabo kandi anyakuli Mukama waanyu ali omu iguru, kandi tasoroora.
10 Eky’okumalirra, mugumizeemu nimutunga amaani omu Mukama waitu n’omu maani ge amaingi muno. 11 Mujwale ekijwaro eky’okurwanisa kyona kuruga hali Ruhanga nukwo musobole kwemerra mugumire, murwanise emitego ya Sitaani;* 12 habwokuba titurukurwana* n’esagama n’omubiri, baitu niturwana n’obulemi, n’obusobozi, abalemi b’ensi ab’omwirima gunu, n’emyoyo emibi enyakuli omu biikaro eby’omu iguru. 13 Habw’ensonga egi, mujwale ekijwaro kyona eky’okurwanisa ekiruga hali Ruhanga nukwo musobole kwerwanaho ha kiro ekibi, hanyuma y’okukora byona, musobole kwemerra mugumire.
14 Nahabweki, mwemerre mugumire, mweteegere omu nda yanyu omweko ogw’amananu, mujwaire eky’omu kifuba eky’okuhikirra, 15 mujwaire enkaito omu bigere byanyu mweteekaniize kurangirra amakuru amarungi ag’obusinge. 16 Oihireho ebi byona, mukwate engabu enkooto ey’okwikiriza, ey’eraabasobozesa kuzimya obusaali obw’omurro obw’omubi.* 17 Ekindi, mwikirize enkofiira ey’okujunwa, hamu n’empirima ey’omwoyo, kandi eki nikyo ekigambo kya Ruhanga, 18 ha murundi nugwo gumu, musabe omu miringo yoona kandi mwesengerezeege nimusaba obwire bwona omu mwoyo. Habw’ensonga enu, mwikale nimurora, nimwesengerereza abarukwera boona buli kaire. 19 Na nyowe munsabire nsobole kuheebwa ebigambo eby’okubaza obu ndaayesamyaga akanwa kange, nsobole kubaza n’obumanzi omu kumanyisa ensita erukwera ey’amakuru amarungi, 20 agandeetiire kufooka ngabwa ndi omu njegere, kandi nsobole kugabazaaho n’obumanzi nkooku kinsemeriire kugabazaaho.
21 Inywe kusobora kumanya ebirukunkwataho n’okumanya nkooku ndi, Tukiko ow’oruganda omugonzebwa kandi omuheereza omwesigwa omu Mukama waitu, alibibagambira. 22 Nimmutuma nambere muli habw’ekigendererwa eki, nukwo musobole kumanya nkooku tuli, kandi asobole kuhuumuza emitima yanyu.
23 Obusinge, okugonza, n’okwikiriza ebiruga hali Ruhanga Isiitwe hamu na Mukama waitu Yesu Kristo, bibe n’ab’oruganda. 24 Embabazi enyingi muno* zibe n’abo boona abaine okugonza okutahwaho hali Mukama waitu Yesu Kristo.